شست درسد ملک ءِ آبادی ءِ تہ ءَ ورنا ھوار اَنت کہ آ پاکستان ءِ رژنائیں آیوکیں باندات اَنت، میر سرفراز بگٹی

اسلام آباد۔12اگست  (اے پی پی): بلوچستان ءِ سر وزیر میر سرفراز بگٹی ءَ گشتگ ملک ءِ شست درسد آبادی ورنا آں چہ جوڑ بوتگ کہ آ پاکستان ءِ روشنیں باندات انت۔ بلوچستان حکومت ءِ تہ ءَ اولی ورنا پالیشی جوڑ کنگ بوتگ ءُ اے پبلک سیکٹر ڈویلپمنٹ پروگرام ءِ تہ ءَ ھوار کنگ بوتگ تانکہ ورنا دیمروئی بہ کن اَنت ءُ آھاں دیم ءَ روگ ءِ جوانیں موہ بہ رس اَنت۔ بلوچستان ءِ سر وزیر ءَ میاں اوستمانی ورنا روچ ءِ درگت ءَ وتی کلوہ ءِ تہ ءَ گوشت کہ استیں دور ءَ ورنا جتاجتائیں چیلنج آنی دیمپان اَنت۔ اے دور راست ءُ نادرست، راستی ءُ دروگ، زانتکاری ءُ گمراہ کنوکیں بیانیہ ءِ شناخت ءِ دور اِنت۔ چوشیں جاوراں ورنایاں پٹ ءُ پول کنگ ءُ راستی ءَ دیم ءَ آرگ ءِ مزنیں ذمہ واری گون اِنت۔ آئی ءَ گوشت کہ ورنا چاگردی جیڈھ آنی سر ءَ ھاسیں رنگ ءَ سوشل میڈیا ءَ گوں سیادی داروکیں جیڈھ آنی سر ءَ پٹ ءُ پول کنان ءَ راستی ءَ را دیم ءَ برگ ءُ دیم ءَ برگ لوٹ ایت پرچا کہ اے مئے مذھبی، اخلاقی، قبائلی ءُ چاگردی فرض انت۔ آئی ءَ گوشت کہ من وتی ورناہی ءَ گوں وعدہ کتگ ات کہ من ھچ وڑیں کارے ءِ بہا کنگ ءَ نہ دیاں ءُ من انگت ھمے وعدہ ءِ سر ءَ اوشتاتگ آں ۔ محکمہ تعلیم ءَ میرٹ فارمولہ جوڑ کنان ءَ شفاف بھرتی کنگ بوتگ، ہمے رنگ ءَ بلوچستان ءَ اولی رند ءَ یوتھ اسکلز ڈویلپمنٹ پروگرام ءِ بندات کنگ بوتگ۔ آئی ءَ ورنا آنی سر ءَ زور پر دات کہ آ اے پروگرام ءِ بھر بہ بنت ءُ وت ءُ وتی ھاندان ءِ وشھالی ءِ ھواری ءَ ملک ءَ زرّ ءِ کمائی ءِ تہ ءَ ھم کرد پیلو بہ کن اَنت۔ بنجاھی وزیر میر سرفراز بگٹی ءَ گوشت کہ حکومت نودربر آناں انٹرنشپ ءُ ورنا آناں آسانیں قسط آنی سر ءَ وام دیگ ءَ انت۔ بے سودیں وام ءِ پروگرام ءَ جنوبی سیمسر ءِ دمگ آنی ورنا آناں اولیت دیگ بوھگ ءَ اِنت تانکہ آ ناجائزیں قاچاق ءَ چہ دور کنگ بہ بنت ءُ شرپداریں روزگار ءِ نیمگ ءَ رھادگ کنگ بہ بنت۔ آئی ءَ گوشت کہ ورنا جتا جتائیں شوبگ آنی تہ ءَ کاروباری منصوبگ آنی گوما بیا اَنت ءُ حکومت آخوت ءُ بی آر ایس پی ءِ کمک ءَ آھاں تجارتی وسیلگ پجاری کنت۔ ما ورنا آناں پیسلہ کنگ ءُ معاشی رد ءَ مھکم جوڑ کن ایں ءُ آھاں وتی پاد آنی سر ءَ اوشتارین ایں ۔ میر سرفراز بگٹی ءَ گوشت کہ ناامیتی گستاخی انت پمیشکا ورنا کدی ناامیت مہ بنت۔ ردیں حکومت داری ءِ سبب ءَ ورنا ءُ ریاست ءِ نیام ءَ پیداکیں فرق ءَ را گپ ءُ تران ءُ گپ ءُ تران ءِ وسیلگ ءَ پُل کنگ لوٹیت۔ بلوچ ورنا بہ جیڑ اَنت کہ آ بے سوبیں جنگے نیمگ ءَ رھادگ بوھگ ءَ اَنت ۔ پاکستان یک انچیں ملکے کہ آئی ءِ تہ ءَ منظم ءُ شرپداریں لشکر ھست ءُ گوں انچیں لشکر ءَ پاکستان کدی پرشت نہ کنت۔ آئی ءَ گوشت کہ اے جنگ ءِ آسر ھون ریچی ءَ ابید دگہ ھچ نہ انت۔ بلوچستان پکّا پدمنتگ اِنت بلے اے پدمنتگی ءِ ھلاس کنگ ءِ دگہ راہ ھست اَنت۔ دنیا ءِ جتا جتائیں دمگاں نا متوازنیں دیمروئی ءِ جیڑہ است انت۔ جیڈھ آناں گہتریں حکومت داری ءِ میرٹ ءُ شفافیت ءِ دیمروئی ءِ وسیلگ ءَ گیش ءُ گیوار کنگ بوت کنت ءُ صوبائی حکومت اے رد ءَ عملی گامگیج زورگ ءَ انت۔ پی ایس ڈی پی ءَ را ورنا آنی لوٹ آنی گوما ھمگرنچ کنگ بوتگ۔ بنجاہی وزیر ءَ گوشت کہ ورنا آنی مستریں جیڈھ روزگار ءِ پیداک کنگ ءَ گوں سیادی دار ایت، البت اے گپ پدّر انت کہ سرکاری شوبگ آنی تہ ءَ روزگار ءِ پیداک کنگ ءِ مشینری ءِ ذمہ واری حکومت نہ انت، بلکیں روزگار ءِ موہ پجارینگ ءُ راستیں راہ ءَ رہشونی کنگ انت تانکہ ورنا شرپ مندیں روزگار ءَ بہ رس انت۔ میر سرفراز بگٹی ءَ بلوچستان ءِ ورنا آں گوں تران کنان ءَ گوشت کہ شما وتی استان، مات ءُ پت، سیاد ءُ حکومت ءِ یک ارزشتی ایں مڈّی ات، نوکیں دور ءَ ھما چیلنج آنی واستہ وت ءَ را تیار کنگی انت۔ آئی ءَ گوشت کہ پاکستان ءِ ریاست ءَ گوں مہر ایمان ءِ بھر اِنت۔ ورنا دیم ءَ بہ رو اَنت ءُ حکومتی گامگیجاں چہ پائدگ چست بہ کن اَنت ءُ وتی اقتصادی برجائی ءُ ملک ءِ دیمروئی ءِ واستہ سرگرمیں کرد ءَ پیلو بہ کن اَنت۔