وزیراعظم نا پارت آ قومی میرات و دودوربیدہ ڈویژن نا مون آ دننگ و بحالی کن غٹ وسیلہ غاتے کاریم اٹ اتنگ انگ ءِ، بنجائی وزیر اورنگزیب خان کھچی

لاہور۔ 11 اگست (اے پی پی) بنجائی وزیر قومی میرات و دودوربیدہ ڈویژن اورنگزیب خان کھچی پارینے کہ وزیراعظم محمد شہباز شریف ناپارت آ قومی میرات و دودوربیدہ نا مون آدننگ و بحالی کن غٹ وسیلہ غاتے کاریم اٹ اتنگ انگ ءِ، اردوبولی ننا تہذیب، دودوربیدہ و قومی وحدت نا نشانی ءِ دانا مون آدننگ کن ڈویژن نا غٹ ادارہ غاتے پبی کڑد ادا کروئی مریک، قومی شناختی نا مظہر ادارہ غاتیٹی رائٹ سائزنگ کپننگ انگ ءِ۔ داخیال آتا درشانی ءِ دوشنبے نادے اردو سائنس بورڈ اٹی ڈیجیٹل پرنٹنگ سیل انا بنانا وخت آ گپ وتران کرساکرے۔ داوخت آ سینئر جوائنٹ سیکرٹری قومی میرات و دودوربیدہ ڈویژن سبینو سکندر جلال، ڈائریکٹر جنرل ادارہ فروغ قومی زبان  پروفیسر ڈاکٹر محمد سلیم مظہر، ڈائریکٹر اردوسائنس بورڈ ضیاء اللہ خان، ڈائریکٹر اقبال اکیڈمی ڈاکٹر عبدالرؤف رفیقی، ڈائریکٹر ادارہ زبان و ادبیات پنجاب یونیورسٹی پروفیسر ڈاکٹر بصیرہ عنبرین و ڈائریکٹر ٹریننگ ٹیوٹا عنبر افضل چٹھہ تون اوار ایلوفک ہم ساڑی ئسر۔ بنجائی وزیرپارے کہ وزیراعظم محمد شہباز شریف نا پارت آ حکومت قومی میرات و دودوربیدہ نا مون آ دننگ و بحالی ءِ اولیت تننگ انگ ءِ، تاریخی ہند، روایتی فنون، بولی و دودوربیدہ ئی سرجزآتا رکھ و شونداری کن بجٹ، چاہندار و پوسکن آسراتی تتون اوار غٹ دوئی وسیلہ غاتے کاریم اٹ اتنگ انگ ءِ، دا گام گیج نئے بیرہ ملک انا تاریخی پہچان ءِ رکھ تخنگ اٹ کمکار مریک بلکن قومی بولی، سیل و سوات و زرگزران نا مون آ دننگ اٹ ہم اہم کڑد ادا کیک۔ اوپارے کہ قومی میرات و دودوربیدہ ڈویژن نا غٹ ادارہ غاک قومی شناخت نا درشانی ءِ، اونا شونداری و سوگوی آن نئے بیرہ ننا تہذیبی پہچان برقرار سلک بلکن دنیا ٹی پاکستان نا مثبت دروشم ہم تالان مریک۔ بنجائی وزیر قومی زبان نا مون آ دننگ اٹ ادارہ نا کوشست آتے وخت انا اہم گرج گونداو پارے کہ اردوزبان ننا تہذیب، دودوربیدہ و قومی وحدت نا نشانی ءِ ، دانا مون آدننگ کن قومی میرات و دودوربیدہ ڈویژن نا غٹ ادارہ غاتے اسیجائی کڑد ادا کروئی مریک۔