پاکستان عدل، بریبری و رواداری نا اصول آتیا جوڑمس، ہندا بنداوتیا مدام قائم سلک، محسن نقوی

اسلام آباد۔ 11 اگست (اے پی پی) بنجائی وزیر داخلہ محسن نقوی پارینے کہ پاکستان دین اسلام نا روشنا اصول  عدل، بریبری و رواداری آ جوڑ مس و ہندا بنداوتیا مدام قائم سلک، پاکستان اقلیت آتا جون و مال، عقیدہ و عبادت نا آجوئی ءِ آئینی زمواری ہی آخا، ریاستی پہچان تکک، پاکستان اٹی رہینگوک آ ہر شاری چائے او ہراکہ مذہب آن مرے، بریبرنا پاکستانی ءِ، اقلیت آتا قومی دے آ تینا کلہو اٹی وزیرداخلہ محسن نقوی پارے کہ دین اسلام جور انا ممانعت، عقیدہ نا آجوئی و انسانیت نا شرف نا رغامک وہندا رغاموک اقلیت آتا رکھ انا بنداو ءِ، قائداعظم 11 اگست 1947 نا تران اٹی پیدوار کرے کہ پاکستان نا ہر بندغ بریبرحیثیت تخک، آئین ءِ پاکستان اقلیت آتا بنداوی حق انا ضمانت ایتک۔ محسن نقوی پارے کہ پاکستان نا غٹ اقلیت آک، عزت، بریبری و شریداری اتون قومی شونداری ٹی شریک و گمرنا قابل سنگت آک ءُ، اقلیت آک تعلیم، جان جوڑی، دفاع، سیاست تون اوار ہر بشخ اٹی بے مٹ خذمت سرتسنوہرا ستاکڑزک، اقلیت آتا کڑد پاکستان نا قومی میرات نا روشنا ءُ بشخ اسے۔ حب الوطنی ، خذمت و کڑد ہی قومی شناخت نا معیار ءِ، پاکستان و پاکستانی امتیاز ناقائل اف۔ اوپارے کہ ریاست مدام اقلیت آتا جون ومال و مقدس ہند آتا رکھ ءِ اولیت ایتک، عبادت گاہ تا تزئین و آرائش مرے یا دود آتا سیکورٹی، ریاست تینا مدام زمواری ءِ پورو کیک۔ اوپارے کہ جنگی حالیت آتیٹی ہم کرتارپور راہداری و ننکانہ صاحب ءِ ملوک و رکھ تخنگ، پاکستان نا امن، مہرومریبت و بین المذاہب ہم گرنچی نا عملی شاہدی ءِ، پاکستان اقلیت آتے اوفتا پورو حق ایتک انتئے کہ او ریاست نا بریبر نا وارث ءُ، ننا پالیسی، نیت وعمل اسٹ ءِ، اقلیت آتارکھ، آجوئی و شریداری آ ہچ ءُ سمجھوتہ اس مفک۔ اقلیت آتا قومی دے آبحیثیت قوم اقلیت آتا بنداوی حق انا رکھ انا عزم انا درشانی ءِ کینہ۔