11اگست اقلیت آتا حق انا رکھ و قومی ہم گرنچی نا عزم انا پوسکنی نا دے، دا قائد اعظم نا ہمو وژن نا یات دہانی کرفک ہراٹی ہرشاری ءِ بریبری و تین پہ تینی شرف نا حق دوئی ءِ، صدر مملکت آصف علی زرداری نا کلہو

اسلام آباد۔ 11 اگست (اے پی پی) صدر ءِ مملکت آصف علی زرداری پارینے کہ اینو اقلیت آتا حق انا رکھ و قومی ہم گرنچی نا عزم انا پوسکنی نادے ءِ، دادے قائد اعظم نا ہمووژن نا یات دہانی کرفک ہراٹی ہرشاری ءِ بریبری و تین پہ تینی شرف نا حق دوئی ءِ۔ اقلیت آتا دے انا وخت آ خصوصی کلہو اٹی صدر ءِ مملکت پارے کہ نن اقلیتی برادری تا خذمت آتے خراج تحسین پیش کینہ، اقلیت آک سلہہ بند فوج ، عدلیہ، سول سروس، تعلیم و جان جوڑی نا بشخ آتیٹی شاندار خذمت سرتسنو، اوفتا حب الوطنی و خذمت آک مچ آ قوم اکن گمر نا سوب ءُ۔ اوپارے کہ آئین ءِ پاکستان غٹ شاری تے بے پرخ بریبرحق انا ضامن و اوفتا سیاسی، زرگزرانی، مذہبی ، راجی و دودوربیدہ ئی حق انا پورو رکھ ءِ کیک۔ صدر ءِ مملکت پارے کہ حکومت اقلیت آتا راجی آسودہی و واکدار کننگ کن عملی گام گیج کرینے، اقلیتی طالب علم آتے وظیفہ و مالی کمک فراوان کننگ انگ ءِ۔ صدر ءِ مملکت 2009اٹی تینا اولیکو صدارت نا مد اٹی 11 اگست آ اقلیت آتادے ءِ گونداسس۔ اوپارے کہ بین المذاہب گپ وتران ءِ مون آ دننگ و قومی زند اٹی اقلیت آتا بامعنی بشخ ہلنگءِ پک کینہ۔ صدر ءِ مملکت پارے کہ اقلیت آتے واکدار کننگ، اوفتا شونداری و آسودہی کن کاریم ءِ برجاتخنہ۔ اونا پاننگ ئس کہ ایلمی، ہم گرنچی و یکجہتی نا کمک اٹ شونہال پاکستان اس جوڑ کینہ۔