سیاسی گلانی نیام ءَ گپ ءُ تران جمہوریت ءُ پارلیمنٹ ءَ را گیش مھکم کت کنت، پاکستان ءِ آئین ساز اسمبلی ءِ 78 سالی روچ ءِ موہ ءَ پارلیمانی کارانی وفاقی وزیر ڈاکٹر طارق فضل چوہدری ءِ کلوہ

اسلام آباد۔10اگست  (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ پاکستان ءِ آئین ساز اسمبلی ءِ 78 سال ءِ درگت ءَ وتی کلوہ ءِ تہ ءَ گوشت کہ پارلیمنٹ الس ءِ توار اِنت ایشی ءِ وسیلگ ءَ ھمک جیڈھ گیش ءُ گیوار کنگ بوت کن اَنت۔ اگست 1947 ءَ اولی آئین ساز اسمبلی ءِ جوڑ کنگ ءَ چہ بانی قائداعظم محمد علی جناح ءِ جمہوری سوچ ءِ درشانی کنگ بیت۔ وفاقی وزیر ءَ گیش گوشت کہ سیاسی گپ ءُ تران ءِ نہ بوھگ ءِ سبب ءَ جمہوریت ءَ مدام جیڈھ آنی دیمپانی بوتگ۔ اے گپ ءِ وشی اِنت کہ پیپلز پارٹی ءُ مسلم لیگ ن ءَ گوستگیں ردی آں چہ سبق زرتگ ءُ جمہوریت ءِ منشور ءِ سرا تپاک کتگ ۔ گیش ءَ چہ گیش ڈاکٹر طارق فضل چوہدری ءَ گوشت کہ مرچی من تحریک انصاف ءَ ھمے مشورہ ءَ دیاں کہ آھانی درستیں جیڑہانی گیواری پارلیمنٹ ءَ گوں انت ءُ اے سیاسی گپ ءُ تران ءَ چہ ایوک ءَ ممکن انت۔ وفاقی وزیر طارق فضل چوہدری ءَ اے گپ ءِ سر ءَ زور پر دات کہ مرچیگیں اپوزیشن ءَ را ھم دگہ راجی جیڈھ آنی سر ءَ دگہ سیاسی گل آنی گوما نندگ ءَ جمہوریت ءُ پارلیمنٹ ءَ را مھکم کنگ لوٹ ایت۔ آئی ءَ گیش گوشت کہ اگاں اپوزیشن جوانیں تنقید ءِ پھجارینگ ءِ وھد ءَ راجی جیڈھ آناں گیواری ءِ واستہ حکومت ءِ گوما نند ایت گڈا معیشت، دفاع، وانگ ءُ زانگ ءُ جان سلامتی ءَ ھوار درستیں شوبگ مھکم بنت۔