بھارت ءَ یک پاکستانی بالی گرابے ھم ایر نہ کتگ، میاں اوستمانی اعتراف بھارت ءِ دروگاں پدر کن اَنت، وزیر دفاع خواجہ محمد آصف

اسلام آباد۔9اگست  (اے پی پی):وزیر دفاع خواجہ محمد آصف ءَ گشتگ کہ بھارت ءَ یک بالی گرابے ھم پاکستانی تیرگواری نہ کتگ ءُ نہ ایشی ءِ تباہ کتگ۔ بھارتی بالی گرابانی ایر کنگ ءِ اعتراف میاں اوستمانی تک ءَ پدر بوتگ انت، راستی ءَ را در کنگ ءِ ھاترا دوئیں ملک آنی بالی گراب آنی انوگیں اسٹاک ءِ آزاتیں رنگ ءَ پٹ ءُ پول کنگ بہ بیت۔ شمبے ءِ روچ ءَ بھارتی ایئر فورس ءِ سروک ءِ بیان ءِ سر ءَ رد عمل پیش کنان ءَ وزیر دفاع خواجہ محمد آصف ءَ سوشل میڈیا ءِ سر ءَ وتی پوسٹ ءِ تہ ءَ گوشت کہ آپریشن سندور ءِ وھد ءَ پاکستانی بالی گراب آنی مبینہ تباہی ءِ ھوالگ ءَ بھارتی ایئر فورس ءِ سروک ءِ نیمگ ءَ دیریں دعویٰ ھمے رنگ ءَ نا مناسب ءُ وھد ءِ سر ءَ ناقابل فہم انت۔ اے گپ ھم طنز ءِ گپ اِنت کہ ھندی مزنیں فوجی افسر چوں ھندی سیاست داناں چہ وتی اسٹریٹجک دور اندیشی ءِ سبب ءَ بوتگیں ناکامی ءَ چہ رکھینگ ءِ ھاترا کارمرز کنگ بوھگ ءَ اَنت۔ آئی ءَ گوشت کہ سئے ماہ ءَ چوشیں دعویٰ دیم ءَ نہ اتکگ، وھدیکہ پاکستان ءَ ترندیں رنگ ءَ میاں اوستمانی میڈیا ءَ را سرجمیں تکنیکی بریفنگ داتگ ءُ رافیل ءَ ھوار بازیں بھارتی بالی گراب آنی گار بوھگ ءِ سر ءَ آزاتیں نگدکار، جھان ءِ سروک، بھارتی مزنیں سیاست دان آنی واستہ انٹیلی جنس ءَ بگر داں وسیلگ آنی نیمگ ءَ بازیں رنگ ءَ منگ بوتگ۔ ہندوستان ءَ یک پاکستانی بالی گرابے ھم ایر کنگ ءُ ھلاس کنگ نہ بوتگ۔ پاکستان ءَ ھندی 6 جنگی بالی گراب، ایس 400 ھوائی دفاعی بیٹری ءُ ھندی بے پائلٹیں بالی گراب تباہ کتگ ءُ بازیں ھوائی اڈہ آناں تاوان داتگ۔ لائن آف کنٹرول ءِ سر ءَ ھندی لشکر ءِ تاوان ھم نسبتاً گیش بوتگ اَنت۔ آئی ءَ گوشت کہ اگاں راستی ءِ جُست بہ بیت گڈا دوئیں نیمگ وتی بالی گراب آنی انوینٹری ءَ را آزاتیں تصدیق ءِ واستہ پچ بہ کن اَنت پرچا کہ مارا شک اِنت کہ ایشی ءَ چہ ھما راستی پدر بیت کہ بھارت آئی ءَ را چہ وتی چماں شموشگ لوٹ ایت۔ آئی ءَ گوشت کہ جنگ دروگ ءَ چہ سوبمند نہ بنت بلکیں اخلاقیات، راجی جزم ءُ پیشہ وارانہ صلاحیت ءَ چہ سوبمند بنت۔ اے وڑیں مزاحیہ بیانیہ کہ پہ اندری سیاسی مصلحت ءِ ھاترا جوڑ کنگ بوتگ انت، ایٹمی چاگرد ءَ اسٹریٹجک ردیں حساب ءُ کتاب ءِ مزنیں خطرہاں گیش کن انت، چو کہ آپریشن بانی مرسوس ءِ وھد ءَ پدر بوتگ۔ آئی ءَ گوشت کہ پاکستان ءِ وت واجہی ءُ سرزمین ءِ یکوئی ءِ ھرچ وڑیں ھلاپ ورزی ءَ را ترندیں، پیسلہ ءُ زوراکیں پسو ءِ گوما دیم پہ دیم کنگ بیت ءُ ایشی ءَ چہ پد ھرچ وڑیں گیشی ءِ ذمہ واری سرجم ءَ ستراتیژیک رد ءَ نا سرپدیں سروک آنی سر ءَ بیت کہ آ یک لحظہ ءِ سیاسی نفع ءِ واستہ جنوبی ایشیا ءَ امن ءِ گوما جوا کن اَنت۔