پارلیمنٹ ءِ بالادستی، آئین ءِ حاکمیت ءُ جمہوریت ءِ تسلسل ملک ءِ دیمروئی ءُ وشحالی ءِ ضمانت انت۔ پارلیمنٹ راج ءِ واھشتانی جارکش اِنت۔ راج ءِ جیڈھ موثریں کانود سازی ءِ وسیلگ ءَ گیش ءُ گیوار کنگ بوت کن اَنت، راجی اسمبلی ءِ اسپیکر سردار ایاز صادق

اسلام آباد۔9اگست  (اے پی پی):راجی اسمبلی ءِ اسپیکر سردار ایاز صادق ءَ پاکستان ءِ آئین ساز اسمبلی ءِ جوڑیشت ءِ 78 سالی روچ ءِ درگت ءَ وتی کلوہ ءِ تہ ءَ گوشت کہ پاکستان ءِ یکوئی، دیمروئی ءُ وشھالی ءِ راز پارلیمنٹ ءِ بالادستی، برجائی ءُ کانود ءِ حاکمی اِنت۔ شمبے ءِ روچ ءَ راجی اسمبلی سیکرٹریٹ ءِ نیمگ ءَ جاڑی بوتگیں بیان ءِ تہ ءَ اسپیکر راجی اسمبلی ءَ گوشت کہ 10اگست 1947 ءَ کراچی ءَ برجم داشتگیں آئین ساز اسمبلی ءِ اولی دیوان پاکستان ءِ بُن ھشت ایر کنوک آنی جمہوری سوچ ءُ الس ءِ واھشت آنی عملی درشان اِنت۔ اے روچ مئے راجدپتر ءِ یک سنگ میل ءِ کہ نوکیں نسل ءَ را جمہوری قدر، آئینی دود ءُ ربیدگ ءُ پارلیمانی کرد ءِ بابت ءَ سرپد کنگ ءِ جوانیں راہ اِنت۔ اسپیکر راجی اسمبلی ءَ گوشت کہ پارلیمنٹ نہ ایوک ءَ 250ملین مردم آنی نمائندگی ادارگ اِنت بلکینگ ءَ الس ءِ گہبود ایشی ءِ اولی ءُ مستریں فرض اِنت۔ ملک ءِ دیم ءَ اوشتاتگیں جیڈھ آنی گیواری ءِ واستہ موثر ءُ بروقت کانود سازی المی اِنت۔ آئی ءَ گیش گوشت کہ شفافیت، کفایت شعاری ءُ نوکیں انتظامی اصلاحات ءَ را ھیال ءَ دارگ ءَ ایوان ءِ کارکردگی ءَ را گہتر کنگ ءِ واستہ بازیں گامگیج کنگ بوھگ ءَ انت۔ آئی ءَ پارلیمنٹ ءِ مھکمی ءُ جمہوریت ءِ دیمروئی ءِ واستہ سیاست ءَ چہ ابید سیاسی قوت آنی یکجائی ءَ کار کنگ ءِ ضلورت ءِ سر ءَ زور پر دات۔ پارلیمنٹ ایوکیں پلیٹ فارم اِنت کہ ایشی ءِ تہ ءَ ملک ءِ راجی، سیاسی ءُ معاشی جیڈھ آناں گیش ءُ گیوار کنگ بیت کنت۔ آئی ءَ گوشت کہ اے وھد ءَ مزنیں کساس ءَ ورنا راجی اسمبلی ءَ انٹرنشپ کنگ ءَ اَنت تانکہ آ پارلیمانی نظام، کانود سازی ءِ عمل ءُ جمہوری روایات آنی بابت ءَ اولی دست ءِ سرپدی ءَ بہ زور اَنت۔ اسپیکر سردار ایاز صادق ءَ گوشت کہ راجی اسمبلی سیکرٹریٹ ءَ نوکیں ٹیکنالوجی آرگ بوھگ ءَ انت تانکہ الس ءَ را ھال ءُ اھوال آنی وھد ءُ پاس ءِ پجاری ءَ را دل یکیمی کنگ، کارندہ آنی کارکردگی ءَ را گیش کنگ ءُ وسیلگ آناں جوانیں رنگ ءَ کارمرد کنگ ءَ را دل یکیمی کنگ بوھگ ءَ انت۔ آئی ءَ گوشت کہ پاکستان ءِ پارلیمنٹ ءَ را یک ھاسیں شرپ ءِ ھم ھست کہ اے پارلیمنٹ 2015ءَ چہ دگنیا ءِ اولی پارلیمنٹ اِنت کہ سرجمی ءَ شمسی توانائی ءِ سر ءَ کار کنگ ءَ اِنت۔آئی ءَ اے گپ ءِ پدرائی کت کہ پارلیمانی نظام ءِ تسلسل ءُ آئینی ادارگ آنی بالادستی ءَ ابید راجی دیمروئی ءِ ھچ وڑیں تصور ممکن نہ اِنت۔ آئی ءَ اے جزم ءِ پدا زور پر دات کہ استیں پارلیمنٹ آئین، کانود ءُ جمہوری اصول آنی رژنائی ءَ الس ءِ رہشونی ءُ ازمت ءَ برجاہ دار ایت۔ اے موہ ءِ سر ءَ راجی اسمبلی ءِ ڈپٹی اسپیکر سید غلام مصطفیٰ شاہ ءَ گوشت کہ پارلیمنٹ راجی یکوئی ءِ نشان ءُ 250لکھ مردم آنی اجتماعی حکمت ءِ مرکز اِنت۔ آئی ءَ گوشت کہ موثر کانود سازی، شفافیں حکومت داری ءُ راجی جیڈھ آنی دائمی گیواری ءِ وسیلگ ءَ ملک ءَ را دیمروئی ءُ وشھالی ءِ کشک ءَ رھشونی کت کناں۔