مزن وزیر محمد شہباز شریف ءِ گلگت بلتستان ءِ واستہ 100 میگاواٹ ءِ شمسی گس ءِ وعدہ پیلو بوتگ، ای سی این ای سی ءَ منظوری داتگ

اسلام آباد۔9اگست  (اے پی پی): مزن وزیر محمد شہباز شریف ءِ نیمگ ءَ گلگت بلتستان ءِ مہلوک ءَ گوں 100 میگاواٹ ءِ سولر فوٹوولٹک بجلی گس آنی پھجاری ءِ ھوالگ ءَ کتگیں دگہ یک وعدہ ءِ سرجم کنگ بوتگ۔ مزن وزیر ءِ جار ءَ چہ دو روچ ءَ پد راجی اقتصادی کونسل ءِ ایگزیکٹو کمیٹی ءَ گلگت بلتستان ءِ جتا جتائیں جاھاں 100میگاواٹ ءِ شمسی فوٹوولٹک پاور پلانٹ ءِ منصوبگ ءِ منظوری داتگ۔ مزن وزیر کارگس ءِ نیمگ ءَ جاڑی بوتگیں پریس ریلیز ءِ رد ءَ ای سی این ای سی ءِ منظوری ءَ پد منصوبگ ءِ سر ءَ باقاعدہ کار بندات کنگ بیت۔ اے منصوبگ ءِ کلیں ھرچ ءُ درچ 24.957ارب کلدار ءِ سر ءَ سئے سال ءَ سرجم کنگ بیت۔ مزن وزیر ءَ گلگت ءِ گوستگیں تر ءُ تاب ءِ ساھت ءَ جار جتگ ات کہ ای سی این ای سی زوت گلگت بلتستان ءِ واستہ 100میگاواٹ ءِ شمسی بجلی گس ءِ منصوبگ ءِ منظوری ءَ دنت۔ مرکزی دیمروئی ورکنگ پارٹی ءَ پیسر ءَ چہ اے منصوبگ ءِ منظوری داتگ۔ زانگ بہ بیت کہ اے منصوبگ ءَ چہ ضلع استورے، داریال، تنگر، دیمر، گھنچے، غیزر، گلگت، ہنزہ، اشکمان، نگر، رونڈو، اسکاردو ءُ شگر ءِ ضلع سیت زور انت۔ منصوبگ ءِ اولی بھر ءَ ضلع اسکاردو ءَ را 18.958میگاواٹ بجلی پجارینگ بیت وھدیکہ دومی بھر ءَ ضلع ھنزہ، گلگت ءُ ڈائمر ءَ را بالترتیب 6.005میگاواٹ، 28.013 میگاواٹ ءُ 13.126میگاواٹ بجلی پجارینگ بیت۔ ھمے رنگ ءَ سیمی بھر ءَ رند ءِ ضلع آناں 16.096میگاواٹ بجلی رس ایت۔ دیمترا اے منصوبہ ءَ چہ نادراھجاہ ءُ سرکاری کارگساں 18.162 میگاواٹ آف گرڈ بجلی ھم رس ایت۔