حکومت نہادی خل و زیور آتا بشخ انا پبی کمکاری کن سنبرینگوک ءِ، جام کمال خان

اسلام آباد۔ 07 اگست (اے پی پی) بنجائی وزیر واپار جام کمال خان نہادی خل و زیور آتا بشخ آتے مون آ دننگ و غیرروایتی برآمد آتیٹی ودکی کن حکومت نا کنڈآن پبی مخ تفی نا پڑو کرینے۔ وزارت واپار نا کنڈآن جاری بیان نا رداٹ داخیال آتا درشانی ءِ او پنچ شنبے نادے آ آل پاکستان اسمال جیمز جیولرز اینڈ ٹریننگ ایسوسی ایشن نا ڈل اتون اوڑدہی ٹی کرے۔ ڈل انا کماشی ءِ سیکرٹری جنرل قاری محمد اشرف کرے، ہرا ایس۔ آر ۔او 760 نا بحالی و ایس ۔ آر۔ او924 آن استثنیٰ نا خواست کرے۔ اوتدوک آ چار سال تیٹی بشخ انا کنڈآن تعلقدار کانود نا پورو پاسداری نا حوالہ ءِ ترساپارے کہ دا فیصلہ غان برآمد کنندگان آتے غیرضروری مشکل مون تروک ءِ۔ بنجائی وزیر حکومت نا برآمد آتیا تالان زرگزرانی شونداری نا پالیسی ءِ مون آ تخا و پارے کہ نہادی خل و زیورآتا بشخ پاکستان نا برآمداتی تنوع حکمت عملی ٹی اہم کڑد ادا کننگ کیک۔ اوبریبر اصلاحات ، کاروباری آسانی و چنکا برآمد کنندگان  وکسبکار آتے گچین رسینگ نا گرج آ زور شاغا۔ جام کمال خان ڈل انا مثبت کوشست آتا ستاءِ کرے و پڑو کرے کہ وزارت واپار اوفتا سلاہ وسوج آتے وزیراعظم آفس آ گدریفک تانکہ درکار پارت و پالیسی گام گیج کننگ مرے۔ جہانی کہول آ پاکستانی مصنوعات آتا ساڑی گری ءِ ودفنگ کن وزیر واپار تعلقدار کمامدارآتے پارت کرے کہ فرانس، بنگلہ دیش  و ایتھوپیاٹی مروک آ بروک آ جہانی واپاری فورم تیٹی دا بشخ انا پبی بشخ ہلنگ ءِ پک کننگے۔ اوسرکاری و نجی اشتراک عمل، مہارت آ تالان تربیت و مارکیٹ لنکیج نا اہمیت آہم زور شاغا۔ بنجائی وزیر دا بشخ انا برآمد آتیٹی ودکی و روزگار نا وارخواہی ودی کننگ کن غٹ گمانی حکومتی کمکاری نا باوری کرفسا پارے کہ اسٹریٹجک گام گیج آتا کمک اٹ دا بشخ انا غیراستعمال مروک لائخی ءِ کاریم اٹ اتنگک۔