مزن وزیر شہباز شریف ءَ جناح میڈیکل کمپلیکس ءِ جوڑیشت ءِ ھوالگ ءَ پیشرفت ءِ چار ءُ تپاسی ءِ واستہ دیوان ءِ سروکی کت، جوڑیشت ءِ تہ ءَ ھاسیں جان سلامتی ءِ جھان ءِ درجہ ءِ معیار ءِ دارگ ءِ پنت ءُ شون کت

اسلام آباد۔6اگست  (اے پی پی): مزن وزیر محمد شہباز شریف ءَ جناح میڈیکل کمپلیکس ءِ جوڑیشت ءِ تہ ھاسیں جان سلامتی ءِ جھان ءِ درجہ ءِ معیار ءِ دارگ ءِ ہدایت کتگ ءُ گوشت کہ جناح میڈیکل کمپلیکس آزات کشمیر ءُ گلگت ءَ ھوار چاریں صوبگ آنی نادراہ آنی واستہ جھان ءِ درجہ ءِ ہسپتال جوڑ بیت۔ چار شمبے ءِ روچ ءَ مزن وزیر محمد شہباز شریف ءِ سروکی ءَ جناح میڈیکل کمپلیکس ءِ جوڑیشت ءِ ھوالگ ءَ پیشرفت ءِ چار ءُ تپاسی ءِ واستہ دیوان برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ ہدایت کتگ کہ جناح میڈیکل کمپلیکس ءِ جتا جتائیں بلاک آناں صوبہ آناں منسوب کنگ بہ بیت، جناح میڈیکل کمپلیکس ءِ جوڑیشت ءِ تہ ءَ شفافیت ءُ میرٹ ءَ را اولی ترجی دیگ بہ بیت، کارندہ آنی بھرتی، تعمیراتی کار ءِ کوالٹی ءَ را اولیت دیگ بہ بیت۔ مزن وزیر ءَ ہدایت کت کہ اسلام آباد ءَ پرائمری ءُ سیکنڈری ہیلتھ کیئر سسٹم ءَ را گہتر کنگ ءِ واستہ منصوبہ پیش کنگ بہ بیت تانکہ مزنیں ہسپتال آنی سر ءَ نادراہ آنی دباؤ کم کنگ بہ بیت۔ آئی ءَ گوشت کہ ھدا ءِ فضل ءُ کرم ءَ چہ پی کے ایل آئی جوانیں رنگ ءَ نادراہ آنی ازمت ءَ کنگ ءَ انت، جناح میڈیکل کمپلیکس ءَ را پاکستان کڈنی اینڈ لیور انسٹی ٹیوٹ اینڈ ریسرچ سینٹر (پی کے ایل آئی) ءَ چہ جوانیں ہسپتال جوڑ کنگ بیت ءُ انٹرنیشنل اسٹینڈرڈ ءِ آسراتی ءَ گوں لیس کنگ بیت۔ آئی ءَ اے ھم ہدایت کتگ کہ ہسپتال ءِ تہ ءَ جنیٹوریل ءَ ھوار دگہ درستیں سیادی داروکیں کار میرٹ ءِ سر ءَ آؤٹ سورس کنگ بہ بنت۔ گند ءُ نند ءَ مزن وزیر ءَ را ہسپتال ءِ کانسپٹ ڈیزائن، بورڈ ءِ جوڑیشت، زمین ءُ ہسپتال ءَ گوں ہمگرنچیں پیش کرتگیں کمرشل سنٹر ءِ ھوالگ ءَ پیشرفت ءِ بابت ءَ سرپد کنگ بوت۔ دیوان ءَ را سرپدی دیگ بوت کہ کانسپٹ ڈیزائن، زمین ءِ ٹرانسفر ءُ بورڈ ءِ گچینکاری گڈی پڑ ءَ انت، جیو ٹیک ءِ پٹ ءُ پول کنگ بوھگ ءَ انت تانکہ جوڑیشت ءِ جوانیں کوالٹی ءَ را دل یکیمی کنگ بہ بیت ءُ اسلام آباد ءُ آئی ءِ کش ءُ گور ءِ نندوکیں مردمانی واستہ ہسپتال ءِ افادیت ءِ ھوالگ ءَ چاگردی اثر ءِ پٹ ءُ پول کنگ بوھگ ءَ انت۔ دیوان ءَ جتاجتائیں گامگیج آنی ٹائم فریم ءُ ٹارگٹ آنی ھوالگ ءَ ھم سرپد کنگ بوت۔ گند ءُ نند ءَ وفاقی وزیر احسن اقبال، احد خان چیما، سید مصطفی کمال، مزن وزیر ءِ جان سلامتی ءِ کوآرڈینیٹرڈاکٹر مختار بھرتھ، چیئرمین پی کے ایل آئی پروفیسر ڈاکٹر سعید اختر  ءُ سیادی داروکیں کارندہ آں بھر زوری کت۔