پاکستان و عمان نا نیام اٹ برادرانہ تعلقداری اسیجائی مذہب، دودوربیدہ و قدر آتیا تالان ءِ، صدر مملکت آصف علی زرداری

اسلام آباد۔ 06 اگست (اے پی پی) صدر مملکت آصف علی زرداری پارے کہ پاکستان و عمان نا نیام اٹ برادرانہ تعلقداری اسیجائی مذہب، دودوربیدہ و قدر آتیا تالان ءِ، تین پہ تینی اقتصادی و واپاری تعلقداری تے پین ودفنگ نا گرج ءِ، آئی ٹی، تعمیرات، جان جوڑی، فوڈ سیکورٹی و توانائی نا بشخ آتیٹی زرکاری نا بھلو گمان اس ساڑی ءِ۔ چارشنبے نادے آ ایوان ءِ صدر نا پریس ونگ انا کنڈآن جاری بیان نا رداٹ داخیال آتا درشانی ءِ صدر مملکت آصف علی زرداری عمان نا سفیر فہد سلیمان خلف الخاروصی تون گپ وتران کرسا کرے ہرا صدر مملکت تون ایوان ءِ صدر اٹی اوڑدہی کرے۔ اوڑدہی ٹی ہڑتوم آ ملک آتا تاریخی و برادرانہ تعلقداری تے پین مون آ دننگ نا عزم انا درشانی اتون اوار اوار واپار، زرکاری و توانائی نا بشخ آتیٹی تین پہ تینی کمکاری نا مون آ دننگ آ سرجمی اٹ گپ وتران کننگا۔ داوخت آ صدر مملکت پارے کہ پاکستان وعمان نا نیام اٹ برادرانہ تعلقداری اسیجائی مذہب، دودوربیدہ و قدر آتیا تالان ءِ، ہڑتوم آ کنڈآتا اقتصادی و واپاری تعلقداری تے پین ودفنگ نا گرج ءِ۔ اوپارے کہ آئی ٹی، تعمیرات، جان جوڑی ، فوڈ سیکورٹی و توانائی نا بشخ آتیٹی زرکاری ءِ ودفنگ نا بھلو گمان اس ساڑی ءِ، حکومتی و نجی بشخ انا خڑکی رابطہ غاتیان زرگزرانی و واپاری کمکاری ٹی ودکی مریک۔ صدر ءِ مملکت پاکستان نا سلامتی کونسل نا بے آخبتی رکنیت کن عمان نا مخ تفی آ منت واری ءِ ہرفے۔