اسلام آباد۔ 05 اگست (اے پی پی) قومی اسمبلی ’’قرارداد یوم استحصال ‘‘ نا امنائی منظوری ءِ ترسا پارینے کہ پاکستان بھارت نا ہمو غٹ کانود و پالیسی تے مسترد کیک ہرافتا مسخت اونا غیرکانودی کوزہ ٹی جموں و کشمیر نا آبادیاتی پنجر و سیاسی نقشہ ءِ بدل کیک، بھارت 5 اگست نا اسہ کنڈی و غیرکانودی گام ءِ پدی ہلے، انسانی حق انا حالیت آتے گچین کے۔ سے شنبے نادے آ قومی اسمبلی ٹی حکومت واپوزیشن نا کنڈآن امنائی قرارداد بنجائی وزیر امور کشمیر و گلگت بلتستان انجینئر امیر مقام پیش کرے۔ قرارداد اٹی پاننگانے کہ 5 اگست 2019 آ بھارت نا کنڈآن اونا غیرکانودی کوزہ ٹی جموں وکشمیر نا بابت کروک آ غیرکانودی و اسہ کنڈی گام گیج آتا چرجوئی ٹی شش می یوم استحصال نا وخت آ داایوان کشمیری تا حق خودارادیت نا دوئی کننگ نا روا و اصولی جہد ، ہرا اقوام متحدہ نا سلامتی کونسل نا تعلقدار قرارداد آتیٹی امنامروک ءِ نا بدل مفروک سیاسی، سفارتی و اخلاقی مخ تفی نا درشانی ءِ کیک و تدوک آ 6 سال اٹی بھارت ناہمو غٹ گام گیج آتے مسترد کیک ہرافتے او جموں وکشمیر اٹی تینا کوزہ ءِ سوگو کننگ و اونا جہانی وڑاٹ امنامروک جھیڑہ ئی حیثیت ءِ چٹنگ کن ہرفینے۔ قرارداد اٹی پاننگانے کہ پاکستان بھارت نا ہمو غٹ کانود و پالیسی تے مسترد کیک ہرافتا مسخت بھارت نا غیرکانودی کوزہ ٹی جموں وکشمیر نا آبادیاتی پنجر و سیاسی نقشہ ءِ بدل کننگ ناءِ۔ قرارداد اٹی پاننگانے کہ دا ایوان داہیت آ زور شاغک کہ دا بھارتی گام گیج اقوام متحدہ نا سلامتی کونسل نا تعلقدار قرارداد و جہانی معاہدہ بشمول چارمیکو جنیوا کنونشن نا خلاف ورزی ءِ۔ دا ایوان کشمیری الس نا جیرت، بہادری و قربانی تے زبردست خراج تحسین پیش کیک ہرا بھارتی کوزہ نا برخلاف عزت و وقار و ثابت گامی اتون مزاحمت ءِ برجاتخانو۔ قرارداد اٹی پاننگاکہ بھارت نا کنڈآن اونا غیرکانودی کوزہ ٹی جموں وکشمیر اٹی برجاانسانی حق انا بھلا خلاف ورزی تا ترندی اٹ مذمت ءِ کیک۔ قرارداد اٹی پاننگانے کہ دا ایوان بھارت نا جارحانہ رویہ غاتیا گڑتی نا درشانی ءِ کیک ہرا سویلی ایشیانا سیکورٹی چاگڑد اٹی اسہ نزور ءُ عنصر اسے۔ دا ایوان آزاد کشمیر و گلگت بلتستان نا بارواٹی بھارت نا بیان و بے بنداو دعویٰ تے ہروڑاٹ مسترد کیک ۔ قراردا د اٹی پاننگانے کہ دا ایوان داہیت آ زور شاغک کہ جموں وکشمیر نا جھیڑہ اقوام متحدہ نا سلامتی کونسل نا قرارداد و کشمیری الس نا است خواہی تا رداٹ بایدے ایسر کننگے و داایوان خواست کیک کہ بھارت 5 اگست نا اسہ کنڈی وغیرکانودی گام ءِ پدی ہلے، انسانی حق آتا حالیت آتے گچین کے، کشمیری سیاسی بندی تے یلہ کے، مون انگا کانود آتے چٹفے و آجو انسانی حق انا مبصرین، صحافی و انسانی حق انا محافظ آتے غیرکانودی کوزہ ٹی کشمیر اٹی بے اڑاند آن رسائی ایتے۔
