بروک آ مالی سال انا خراج ہلنگ و اصلاحاتی ہدف آتے ٹی ہچ ءُ بدلی اس کننگپک، وزیراعظم

اسلام آباد۔ 05 اگست (اے پی پی) وزیراعظم محمد شہباز شریف فیڈرل بورڈ آف ریونیو (ایف بی آر) اٹی اصلاحات نا نتیجہ ٹی جی ڈی پی نا کچ آن خراج ہلنگ اٹی ودکی ءِ است جم گوندسا پارینے کہ بروک آ مالی سال انا خراج ہلنگ واصلاحاتی ہدف آتیٹی ہچ ءُ بدلی اس کننگپک، فیڈرل بورڈ آف ریونیو و کسٹم کلیئرنس نا اصلاحاتی نظام آن السی آگاہی کن ہڑتوم آ ادارہ غاک وزارت حوالکاری وشینکاری نا کمک اٹ تینا کاریم نا کچ ءِ ودفر۔ سے شنبے نادے آ وزیراعظم آفس نا میڈیاونگ انا کنڈآن جاری بیان نا رداٹ داخیال آتا درشانی ءِ او فیڈرل بورڈ آف ریونیو ٹی سلاہ ئی اصلاحات آ ہفتہ وار جاچ دیوان نا کماشی ءِ کرساکرے۔ دیوان اٹی بنجائی وزیر اقتصادی امور ڈویژن احدخان چیمہ، بنجائی وزیر حوالکاری و شینکاری عطاء اللہ تارڑ، بنجائی وزیر کانود اعظم نذیر تارڑ، بنجائی وزیر پیٹرولیم علی پرویز ملک، وزیر مملکت خزانہ بلال اظہر کیانی، اٹارنی جنرل ، چیئرمین ایف بی آر تون اوار تعلقدار سرکاری آفیسر و عہدیدارآک بشخ ہلکر۔ وزیراعظم پارے کہ بنجائی حکومت نا کنڈآن فیڈرل بورڈ آف ریونیو ٹی کروک آ اصلاحات اٹی جی پی ڈی ٹی خراج ہلنگ نا کچ اٹی ودکی حکومت کن است جمی نا قابل ءِ، بنجائی حکومت و ای تینٹ کمامدارآتا کنڈآن ہلوک آ اصلاحاتی گام گیج آتا پورو مخ تفی و رکھ ءِ کیوہ، بروک آمالی سال اٹی مہالو آن خلوک آ خراج آتا گچین و عمدہ نفاذ خراج کلیکشن ءِ پین ودفنگ اٹ اہم کڑد ادا کیک، ایف بی آر نا بروک آمالی سال انا خراج ہلنگ و ایلو اصلاحاتی ہدف آتا منظور مروک تخوک آ وخت اٹی ہچ ءُ بدلی اس کننگپک۔ وزیراعظم پارت کرے کہ اصلاحات نا کسر اٹی خیسن آ فیتہ و ادارہ جاتی اڑاند آتے چٹفسا اصلاحات نا آخبتی نفاذ ءِ پک کیر، کسٹم کلیئرنس اٹی انقلابی اصلاحات نا مچ آملک اٹی اسہ وڑ و گچین نفاذ ءِ پک کننگے، کسٹم کلیئرنس نا اصلاحاتی ایجنڈاٹی ٹیکنالوجی نا کاریم اٹ اتنگ آن ادارہ جاتی کارروائی تیٹی درکار وخت ءِ کم آن کم کننگے، ایف بی آر اصلاحات اٹی خراج کلیکشن نا بھرم تے بروک آ مالی سال اٹی برقرار تخنگ کن بنجاو صوبہ غاک تین پہ تینی ہم گرنچی و مربوط حکمت عملی اٹ کاریم کیر۔ وزیراعظم فیڈرل بورڈ آف ریونیو و کسٹم کلیئرنس نا اصلاحاتی نظام آن السی آگاہی کن ہڑتوم آ ادارہ غاک وزارت حوالکاری وشینکاری نا کمک اٹ تینا کاریم نا کچ ءِ ودفنگ نا ہم پارت کرے۔ وزیراعظم ءِ پاننگاکہ وزیراعظم محمد شہباز شریف نا خصوصی پارت آ انکم خراج گوشوارہ جمع کرفنگ نا فارم ءِ آن لائن و اردو ٹی مرتب کننگانے، انکم خراج گوشوارہ غاتا آن لائن فارم ءِ آسان فہم کننگ و اردوزبان اٹی لاگو کننگ آن کم وود 84 درسد فائلرز فائدہ ہرفرہ، ایف بی آر پوسکن آ مالی سال انا اولیکو تُو جولائی ٹی تینا خراج ہلنگ نا ہدف ءِ پورو کرینے و بروک آ تُوتیٹی ہم پورو ہدف دوئی کننگ نا اومیت ءِ، مچ آملک اٹی کسٹم کلیئرنس کن ڈیجیٹل انفورسمنٹ سٹیشن تا جوڑ کننگ اولیتی بنداو تیا برجاءِ، کسٹم کلیئرنس اٹی سینٹر لائزڈ اسیسمنٹ یونٹ (CAU) و فیس لیس کسٹم سسٹم نا پورو نفاذ آن کسٹم کلیئرنس نا نظام ءِ مستعد و شفاف کننگ اٹ کمک رسینگک، فیڈرل بورڈ آف ریونیو و کسٹم کلیئرنس اٹی اصلاحات نا نفاذ کن پالیسی فریم ورک ، حکمت عملی ٹی بدلی و چندی بشخ آتیٹی گام گیج مقرر کروک ٹارگٹ نا رداٹ برجاءِ۔