بی آئی ایس پی ءِ چیئرپرسن سینیٹر روبینہ خالد ءَ گوشتگ کہ   بی آئی ایس پی ءَ چہ نپ چست کنوکیں ھاندانانی کساس یک کروڑ ءَ چہ گیش بوتگ، مئے مول ءُ مراد زالبولاں وت مستر کنگ انت

اسلام آباد۔5اگست  (اے پی پی):بے نظیر انکم سپورٹ پروگرام ءِ چیئرپرسن سینیٹر روبینہ خالد ءَ گوشت کہ بی آئی ایس پی ءَ چہ نپ چست کنوکیں ھاندان آنی کساس یک کروڑ ءَ چہ گیش بوتگ، اے ڈیوائس مافیا ھمک جاہ ءَ است، شکایت آنی سر ءَ کارروائی کنگ بوھگ ءَ اِنت۔ بی آئی ایس پی کس ءَ را کار کنگ ءَ چہ نہ رکین ایت بلکیں مالی کمک ءِ وسیلگ ءَ زالبول آناں وت مستر کنگ ءِ مول ءُ مراد اِنت۔ ہر سال سروے کنگ بیت ءُ نوکیں ھاندان ھوار کنگ بنت۔ یک یک ءَ ڈھک  ءِ دپ ءَ روگ ءُ  سروے ممکن نہ انت، نوں مردم سلہ ائیں  سروے ءِ وسیلہ ءَ ہوار کنگ بنت۔ پیسریگیں سرکار ءِ ردیں پالیسیانی سوب ءَ بازیں مردم چہ پروگرام ءَ گِستا کنگ بوتگ انت۔ بی آئی ایس پی ءِ وسیلگ ءَ وانگ ءُ زانگ ءِ ھاتر ءَ یک جنکے ءَ کرک  بورڈ ءَ چہ   اولی نمبر پاس بوتگ۔ سئے شمبے ءِ روچ ءَ ادا  بی آئی ایس پی ءِ ھیڈ  کوارٹر ءَ اھوالکاراں  گوں تران کنان ءَ بی آئی ایس پی ءِ چیئرمین سینیٹر  روبینہ  خالد ءَ گوشت کہ اے وھد ءَ پاکستان ءَ بی آئی ایس پی ءَ چہ سیت چست کنوکیں ھاندان آنی کساس یک کروڑ ءَ چہ گیش اِنت۔ آئی ءَ گوشت کہ پروگرام ءِ آھگ ءَ چہ پیسر اے کساس 9.3 ملین بوتگ بلے نوں یک کروڑ ءَ سر بوتگ ءُ ایوک ءَ یک سال ءِ تہ ءَ 7لکھ ھاندان اے پروگرام ءَ ھوار بوتگ انت۔ آئی ءَ گوشت کہ نفع مند آناں ہر سئے ماہ ءَ پد وظیفہ دیگ بیت ءُ اے 13500 کلدار ماہانہ انت۔ آئی ءَ گوشت کہ اے پروگرام ءِ مول ءُ مراد ایوک ءَ آھانی وظیفہ ءِ سر ءَ انحصار کنگ نہ اِنت بلکیں لھتیں مشکل آنی سر ءَ چہ دیم ءَ رؤگ ءِ واستہ لھتیں مالی کمک ءُ زالبول آناں وت مستر جوڑ کنگ اِنت تانکہ آ لوگ ءَ چہ درکپگ بہ بنت۔ اے کار ءَ چہ بازیں جنین آدماں شناختی کارڈ ءِ گرگ ءَ نپ رستگ، پیسر ءَ زالبولانی شناختی کارڈ ءِ گرگ ءَ گناہ لیکگ بوتگ۔ آئی ءَ گوشت کہ اے پروگرام ءِ وسیلگ ءَ ھر سئے سال ءِ سر ءَ یک سروے کنگ بیت ءُ نوکیں کھول پروگرام ءِ تہ ءَ ھوار کنگ بنت۔ ڈیوائس مافیا ءِ ھوالگ ءَ شکایت آنی سر ءَ بی آئی ایس پی ءِ چیئرمین ءَ گوشت کہ مارا ھر جاگہ ءَ شکایت رس ایت ما آھانی ھلاپ ءَ کارروائی کن ایں ۔ آئی ءَ گوشت کہ اے وھد ءَ بی آئی ایس پی ءَ کارمند آنی کمی اِنت پرچا کہ 2012ءَ پد بھرتی نہ بوتگ، نیم ءَ چہ گیش مردم ڈیپوٹیشن ءِ سر ءَ اَنت، آ لھتیں وھد ءَ کار کن اَنت، وانگ ءَ اَنت ءُ پدا یلہ کن اَنت۔ پروگرام ءِ بابت ءَ چیئرمین ءَ گشتگ گوست ءِ سرکار ءِ دروگیں پروپیگنڈا ءِ سبب ءَ برطانیہ ءِ نیمگ ءَ چہ رستگیں بیست ملین پونڈ بند کنگ بوتگ ایشی ءَ چہ مزنیں تاوانے بوتگ۔ آئی ءَ گوشت کہ اے پروگرام ءَ پاکستان ءِ حکومت ءِ ھوار ورلڈ بینک ءِ ھم کمک کنگ ءَ انت۔ آئی ءَ گوشت کہ اے پروگرام ءَ زھگ آنی وانگ ءُ زانگ ءِ سر ءَ سک باز اثر است انت۔ بی آئی ایس پی ءِ وسیلگ ءَ وانگ ءُ زانگ ءِ ھاتر ءَ یک جنکے ءَ کرائیک بورڈ ءِ اولی نمبر زرتگ۔ وھدے کہ فورٹ عباس ءِ زھگاں ھم سوبمندی رستگ کہ مئے مستریں سوبمندی اِنت۔ آئی ءَ گوشت کہ نشک پروگرام ءِ وسیلگ ءَ تاں 6درسد ءَ تاں گہتری بوتگ۔ آئی ءَ گوشت کہ بی آئی ایس پی ءِ جتا جتائیں پروگرام است انت کہ ایشاں چہ مردم سیت زورگ ءَ انت۔ آئی ءَ گوشت کہ صدر ءِ مملکت آصف علی زرداری ءَ پنت ءُ شون کتگ کہ زالبول آناں شرپ ءُ شرپ ءِ رنگ ءَ زر دیگ بہ بیت، اے درگت ءَ ما ڈیٹا والیٹ پروگرام ءَ آرگ ءَ ایں ایشی ءِ چیر دستی ءَ آ وتی اکاؤنٹ ءَ زر رس ایت۔ آئی ءَ گوشت کہ ھرکس ءَ را اے شکلہ ھست مارا رابطہ بہ کنت ما ترندیں پیگیری ءَ کن ایں ءُ کارروائی کن آں ۔ سرکاری ملازم آنی نیمگ ءَ چہ زرّ ءِ گرگ ءِ جست ءِ سر ءَ آئی ءَ گوشت کہ اے درگت ءَ پیسریگیں حکومت ءِ نیمگ ءَ آڈٹ پیرامیٹر ایر کنگ بوتگ اَنت، ایشی ءِ سبب ءَ مارا چہ آھاں زرّ جم کنگی اِنت، البت بازیں سرکاری ملازم ھما اَنت کہ کلاس فور ءِ تہ ءَ ھوار اَنت، ایشی ءِ تہ ءَ آ ھم ایشی ءِ حقدار اَنت۔ پیسریگیں سرکار ءِ ردیں پالیسیانی سوب ءَ بازیں مردم چہ پروگرام ءَ گِستا کنگ بوتگ انت۔ ھما مردم کہ یک رندے حج ءَ شتگ اَنت آ ھم چہ اے پروگرام ءَ در کنگ بنت ءُ ھما کہ زوتیں شناختی کارڈ زور اَنت آ ھم چہ اے پروگرام ءَ در کنگ بنت۔ آئی ءَ گوشت کہ ھما ھاندان کہ اہل انت آ بی آئی ایس پی ءِ مراکز ءَ سر بہ بنت ءُ دوبر رجسٹریشن بہ کن انت۔ ایشانی نفع پدا بندات بنت۔