ظلم و بیدادی، عدالت آن ایڑتر خون، میڈیا بلیک آؤٹ، درشانی سلاہ غا پابندی و پدریسہ کرفیو بھارت نا غیرکانودی کوزہ ٹی جموں وکشمیر ءِ انسانی حق انا قبرستان جوڑ کرینے، بنجائی وزیر داخلہ محسن نقوی نا یوم استحصال کشمیر آ کلہو

اسلام آباد۔ 05 اگست (اے پی پی) بنجائی وزیر داخلہ محسن نقوی پارینے کہ 5 اگست بھارت نا غیرکانودی کوزہ ٹی جموں وکشمیر نا تاریخ نا تہارانگا دے ءِ، بھارت جموں وکشمیر نا خصوصی آئینی حیثیت ءِ مسخ کرسا اقوام متحدہ نا قرارداد و جہانی کانود نا کھلی خلاف ورزی کرے۔ بنجائی وزیر داخلہ محسن نقوی یوم استحصال کشمیر آ تینا کلہو اٹی پارے کہ ظلم و بیدادی، عدالت آن ایڑتر خون، میڈیا بلیک آؤٹ، درشانی سلاہ غا پابندی و پدریسہ کرفیو دامان ءِ انسانی حق انا قبرستان جوڑ کرینے۔ محسن نقوی پارے کہ پوسکن آ ڈومیسائل کانود نا رداٹ لکھ آ ہندو باتی تے دامان اٹی آباد کننگ انگ ءِ تانکہ ہندی آبادی ءِ اقلیت اٹی بدل کننگ مرے۔ کشمیر نا تنکی جہانی برادری نا بے حسی نا نوحہ ءِ۔ وزیرداخلہ محسن نقوی پارے کہ امریکی صدر ڈونلڈ ٹرمپ نا ثالثی نا سلاہ غا ہم مودی سرکار ٹس آن مس متو۔ محسن نقوی پارے کہ اسہ کنڈی بھارتی گام گیج سویلی ایشیانا امن کن بھلو خطرہ اسے، کشمیر نا ویل دمدستی وڑاٹ جہانی چکارنا خواہندار ءِ۔ وزیرداخلہ پارے کہ کودک کشمیری تا جہد ءِ سلام، ہرا غیرکانودی و غیرانسانی چم آتیان پد ہم آجوئی نا شمع ءِ بڑز کرینو۔ اوپارے کہ پاکستان نا چناچنا کشمیری تتون سلوک ءِ و ہرفورم آ اوفتا اخلاقی ، سیاسی و سفارتی مخ تفی ءِ برجاتخنہ۔