کشمیر پاکستان نا شہ رگ و ننا قومی میرات ءِ، سید علی گیلانی نا نعرہ’’نن پاکستانی اُن، پاکستان ننا ءِ‘‘ مچ آ دنیا ٹی توار پِننگ ءِ، عطاء اللہ تارڑ

اسلام آباد۔ 05 اگست (اے پی پی) بنجائی وزیر حوالکاری و شینکاری عطاء اللہ تارڑ پارینے کہ کشمیری تا پاکستان تون رشتہ لازوال ءِ، کشمیرپاکستان نا شہ رگ و ننا قومی میرات ءِ، سید علی گیلانی نانعرہ ’’نن پاکستانی اُن، پاکستان ننا ءِ‘‘ مچ آ دنیا ٹی اینو ہم دا توار پِننگ ءِ، پاکستان دنیا نا ہرفورم آ کشمیر نا مقدمہ تون مون ترسا کیک۔ داخیال آتا درشانی ءِ او سے شنبے نادے آ داڑے ڈی چوک اٹی یوم استحصال کشمیرریلی نا بشخ ہلوک آتیان تران کرساکرے۔ بنجائی وزیر حوالکاری پارے کہ پنچ اگست تاریخ نا تہارانگا دے ءِ ہراتم بھارت اسہ ناپاک سازش اسے نا رداٹ تینا غیرکانودی کوزہ ٹی جموں وکشمیر نا خصوصی آئینی حیثیت ءِ چٹفسا ہموڑے غیرکانودی کوزہ مسلط کننگ نا کوشست کرے۔ بھارت ءِ دا معلوم مرے کہ داہمودامان ءِ ہراڑے برہان وانی کون آ ورناودی مریک ہرانا جنازہ پاکستان نا سوز ہلالی بیرک اٹ پیڑوک مریک۔ بنجائی وزیرپارے کہ پاکستان تون کشمیری تا لازوال رشتہ ءِ۔ اینوہم سید علی گیلانی نا نعرہ ’’نن پاکستانی اُن، پاکستان ننا ءِ‘‘ مچ آ دنیا ٹی داتوار پِننگ ءِ  وکشمیری تا گچین توار جوڑ مسنے۔ اوپارے کہ یوم استحصال کشمیر قول انا پوسکنی نا دے ءِ، وزیراعظم پاکستان ہرجہانی فورم آ مظلوم کشمیری تا توار ءِ بڑزکرینے۔ نائب وزیراعظم اسحاق ڈار اقوام متحدہ نا سلامتی کونسل نا دیوان اٹی پاکستان نا موقف ءِ پبی وڑاٹ پیش کرے و پیدوار کرے کہ پاکستان کشمیری تا سفارتی ، سیاسی و اخلاقی مخ تفی ءِ برجاتخک۔ کشمیربیرہ نان تاریخ آخا، ننا شہ رگ ءِ۔ بنجائی وزیر پارے کہ جنت نظیر دامان ءِ کشمیر اٹی ظلم کننگ انگ ءِ، اقوام متحدہ نا قرارداد آتا رداٹ کشمیری تے اوفتا حق خودارادیت ضرور ملک انتئے کہ دا اوفتا بنداوی و ناقابل تنسیخ حق ءِ۔ اوپارے کہ حکومت پاکستان ہرجہانی فورم آ کشمیری نا مقدمہ تون گچین وڑاٹ مون تسنے و اینونادے تینا کشمیری ایڑھ ایلم تے دا کلہو تننگ خواہک کہ او تنیا افس، پاکستان اوفتے تون تفوک ءِ۔ بنجائی وزیر حوالکاری پارے کہ نریندر مودی لغوری جلہو کرسا تینا شونق ءِ پوروکرے۔ ہراتم او پاکستان نا کنڈآ خراب انگا نظر اٹ ہرا تو بیرہ اونا جہاز ہی تمیتو بلکن اونا غرور و گھمنڈ ہم زمین بوس مس۔ پاکستان نا فوج اودے مشن کنفے۔ بھارت ءِ نئے بیرہ عسکری پڑاٹ شکست فاش مس بلکن بیانیہ وسفارتی پڑآ ہم شکست مس۔ پاکستان نا فوج پبی جیرت و دلیری اٹ دشمن ءِ ورندی تس و مچ آقوم سوگو ءُ دیوال اس جوڑمرسا تینا وطن نا دفاعءِ کرساکرے۔ اوپارے کہ معرکہ حق تاریخ اٹی روشنا لوز آتیٹی نوشتہ کننگک۔ اوپارے کہ فیلڈ مارشل جنرل سید عاصم منیر نا کماشی ٹی پاک فوج بھلو حکمت عملی و شجاعت نا درشانی ءِ کرے ہرا مچ آ دنیا نا عسکری ادارہ غاتیٹی بطور مثال پیش کننگک۔ بنجائی وزیر حوالکاری پارے کہ قوم انا ورناک، میڈیاو غٹ تپہ غاک کشمیرنا ویل آ یکجہتی و سیوت نا پبی درشانی ءِ کریر۔ او پارے کہ معرکہ حق اٹی سرسہبی کشمیری تا حوصلہ ءِ بڑزکرے و بھارت نا غاصبانہ کوزہ داسہ زیات ہرے اسکان برقرار سلنگ کپک۔ کشمیریک اینو ہم اسہ ہی نعرہ اس خلیرہ کہ ’’ نن انت خوانہ؟۔ آجوئی، کشمیرجوڑمریک، پاکستان‘‘۔ عطاء اللہ تارڑ پارے کہ بنجائی وزیر امور کشمیر انجینئر امیر مقام کشمیرکاز اکن مدام فعال کڑداداکرینے۔ اوپارے کہ کشمیر پاکستان نا شہ رگ و قومی میرات ءِ، پاکستان ہرموقع غا کشمیری تا توار جوڑ مریک و دنیا نا ہرفورم آ اوفتا مقدمہ تون مون ترسا کیک۔ داوخت آ نائب وزیراعظم اسحاق ڈار، وزیر امور کشمیر امیر مقام، وزیراعظم نا سلاہکار بین الصوبائی رابطہ رانا ثناء اللہ خان تون اوار زمردخان، شبیر عثمانی ، وجیہہ قمر، رانا قاسم نون، سردار تنویرالیاس و حریت کانفرنس نا راہشونک و سرکڑدہ غاتون اوار مخلو ق نا بھلو کچ اس ساڑی ئسر۔ داکان مست یوم استحصال کشمیر ریلی دفترخارجہ غان بناکرے ہرا ریڈیو پاکستان چوک آن مرسا ڈی چوک آ سرمس۔ ریلی ٹی دفترخارجہ نا سینئر کمامدارآتون اوار چندی زند انا تپہ غاتیان تعلق تخوک آ بندغ، طالب علم و زالبول آتا بھلو کچ اس ساڑی ئسر۔ ریلی ٹی پاکستان و آزاد کشمیر نا بیرک ءِ چست کننگا وخت اس کہ ریلی ٹی بشخ ہلوک آک کشمیر مریک پاکستان و بھارتی کوزہ نامنظور نا نعرہ خلنگا۔ ڈی چوک آ سرمننگ آ پورو 10 بجہ غا سائرن ءِ خلنگا و اسہ منٹ انا چُپی اختیار کرسا تحریک آجوئی کشمیر نا شہید آتے خراج عقیدت پیش کننگا۔