جموں وکشمیر نا جھیڑہ ئی حیثیت ءِ بدل کننگ نا اسہ کنڈی و غیرکانودی بھارتی گام گیج اقوام متحدہ نا چارٹرنا خلاف ورزی ءِ، نائب وزیراعظم و وزیرخارجہ محمد اسحاق ڈار نا یوم استحصال آ کلہو

اسلام آباد۔ 05 اگست (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ بھارت تیناغیرکانودی کوزہ ٹی جموں وکشمیر نا جھیڑہ ئی حیثیت ءِ بدل کننگ نا بابت چندی اسہ کنڈی و غیرکانودی گام گیج کرے ہرااقوام متحدہ نا چارٹر، سلامتی کونسل نا قرارداد و جہانی کانود بشمول چارمیکو جنیوا کنونشن نا اسُل خلاف ورزی ءِ، کشمیریک تدوک آ ہفت دہائی آن اقوام متحدہ نا سلامتی کونسل نا قول آتا پوروی نا چاری ءُ، وخت انا خواست ءِ کہ جہانی برادری بھارت آ زور شاغے کہ او اونا غیرکانودی وڑاٹ کوزہ ٹی جموں وکشمیراٹی انسانی حق انا خلاف ورزی تے چٹفے و تعلقدار اقوام متحدہ نا سلامتی کونسل نا قرارداد آتیا عملدرآمد کے۔ نائب وزیراعظم ، وزیرخارجہ اسلامی جمہوریہ پاکستان، سینیٹر محمد اسحاق ڈار نا یوم استحصال 5 اگست 2025آ کلہو اٹی پارے کہ اینونادے ، شش سال مست، بھارت مقبوضہ جموں وکشمیر(IIOJK)نا جھیڑہ ئی حیثیت ءِ بدل کننگ نا بابت چندی اسہ کنڈی وغیرکانودی گام گیج کرے ہرا جہانی کہول آ امنا مروک جھیڑہ ئی حیثیت ءِ نزور کننگ و بھارتی کوزہ ءِ سوگو کننگ نا کوشست ئس۔ وزیرخارجہ پارے کہ 5 اگست 2019 آن پد آن بھارت مقبوضہ کشمیر نا آبادیاتی پنجر و سیاسی منظرنامہ ءِ بدل کننگ کن چندی کانود درستی راستی کرفینے۔ غیرکشمیری تے ڈومیسائل سرٹیفکیٹ جاری کننگ، عارضی ہنکینی تے ووٹرلسٹ آتیٹی اوار کننگ، اسمبلی حلقہ غاتا حدبندی ٹی بدلی، ڈغار و جائیداد نا مالکانہ کانود آتیٹی ترمیم، و پن انا گورنرءِ انتظامی واکداری تننگ کون آ بے کچ گام گیج آک ءُ ہرا اقوام متحدہ نا چارٹر، سلامتی کونسل نا قرارداد و جہانی کانود بشمول چارمیکو جنیوا کنونشن نا خلاف ورزی ءِ۔ اسحاق ڈار پارے کہ لکھ آ بھارتی فوجی تا ساڑی گری ٹی، مقبوضہ کشمیر دنیا نا بے کچ فوجی زون تیان اسٹ جوڑ مسنے۔ ہزار آکشمیری سیاسی بندی سال آتیان زندان تیٹی سڑنگ ءُ۔