بھارت کشمیری تا بنداوی انسانی حق ءِ خلسا مچ آ دامان ءِ اسہ زندان اسے ٹی بدل کرینے، چیئرمین سینیٹ سید یوسف رضاگیلانی نا یوم استحصال کشمیرنا وخت آ کلہو

اسلام آباد۔ 05 اگست (اے پی پی) چیئرمین سینیٹ سید یوسف رضاگیلانی پارینے کہ بھارت مقبوضہ جموں وکشمیر اٹی غیرکانودی و غیرآئینی گام گیج آتا کمک اٹ نئے بیرہ کشمیری تا بنداوی انسانی حق ءِ کُنگ بلکن مچ آ دامان ءِ اسہ زندان اسے ٹی بدل کرینے، نن کشمیر نا ویل انا پرامن ، انصاف اٹ و اقوام متحدہ نا قرارداد آتا رداٹ ایسری ءِ خوانہ۔یوم استحصال کشمیر نا وخت آ تینا خصوصی کلہو اٹی اوپارے کہ 5 اگست 2019 ہموالمناک دے ئس ہراتم بھارت مقبوضہ جموںو کشمیر اٹی غیرکانودی و غیرآئینی گام گیج آتا کمک اٹ نئے بیرہ کشمیری تا بنداوی انسانی حق ءِ خلک بلکن مچ آ دامان ءِ اسہ زندان اسے ٹی بدل کرے ۔ اوپارے کہ بھارتی حکومت اسہ کنڈی گام انا رداٹ مقبوضہ دامان اٹی مریس انگا لاک ڈاؤن نافذ کرے ہراٹی کشمیری الس ءِ اوفتا اُراتے ٹی گھیڑ کرسا ظلم ، جور و بربریت نا بدترین درور اس جوڑ کننگا، پیرانگاک مریر یا چناک ، زالبول آک مریر یا ورناک، غٹ ءِ ریاستی جور انا شست کرسا پابند سلاسل کننگا، داوڑنا بربریت نا درور انسانی تاریخ اٹی کم ملک۔ چیئرمین سینیٹ پارے کہ دا غیرانسانی گام گیج آتیا نئے بیرہ اقوام عالم گڑتی نا درشانی ءِ کرے  بلکن چندی جہانی ادارہ غاک ہم بھارتی پالیسی تیا سوج کریر، بھارتی ظلم ڈیہہ انا امن ءِ بھلا خطرہ غاتا گواچی کرینے و شونداری ، شونہالی و سوگوی نا کسر اٹ اڑاند سلفینے۔ اوپیدوار کرے کہ پاکستان نا موقف مدام پیدوار و دوٹوک مسنے، نن کشمیر نا ویل انا پرامن، انصاف اٹ و اقوام متحدہ نا قرارداد آتا رداٹ ایسری ءِ خوانہ۔