سرینگر۔ 05 اگست (اے پی پی) کنٹرول لائن نا ہڑتوم آکنڈ ، پاکستان و مچ آدنیاٹی رہینگوک کشمیریک اینو یوم استحصال کشمیر ءِ تہاردے انا وڑاٹ اڈتننگ ءُ تانکہ بھارت نا 5 اگست 2019 نا غیرکانودی و اسہ کنڈی گام گیج آتا برخلاف برانز ریکارڈ کرفنگ مرے۔ کشمیر میڈیا سروس نا رداٹ تہاردے ءِ اڈتننگ نا خواست کل جماعتی حریت کانفرنس و ایلو آجوئی پسند تنظیمک کرینو۔ کل جماعتی حریت کانفرنس نا نظربند چیئرمین مسرت عالم بٹ نئی دہلی نا تہاڑزندان آن جاری اسہ کلہو اسے ٹی مخلوق آن خواست کرے کہ او اینو مقبوضہ علاقہ ٹی پورو ہڑتال، سول کرفیوو برانزی ریلی تا بست وبند ءِ کیر۔ اوپارے کہ 5 اگست نا مودی حکومت نا اسہ کنڈی گام گیج آتا مسخت جموں وکشمیر ءِ زوراکی اٹ ضم کننگ و اونا مسلم گیشتری تشخص ءِ چٹفنگ ئس۔ زندان اٹی نظربند حریت راہشون بلال صدیقی پارے کہ اقوام متحدہ نا قراردادآتیا عملدرآمد ہی کشمیر نا جھیڑہ نا اسٹ انگا پرامن ایسری ءِ۔ وادی کشمیر و جموں ڈیہہ انا چندی علاقہ غاتے ٹی زندان تیٹی نظربند ممتاز حریت راہشون تا عکس والا پوسٹر خلنگانے ہرافتے ٹی پاننگانے کہ کشمیری بھارتی کوزہ ءِ مسترد کیرہ۔ پوسٹر آتیٹی اقوام متحدہ، اوآئی سی و یورپی یونین آن خواست کننگانے کہ او ڈغاری حق آتا جاچ ءِ ہلنگ کن تینا ٹیم تے مقبوضہ علاقہ غا گدریفر۔
