بنجائی وزیر واپار جام کمال خان تون بنگلہ دیش نا ہائی کمشنر نا اوڑدہی، واپار و توانائی نا بشخ آتیٹی کمکاری ءِ ودفنگ آ امنا

اسلام آباد۔ 04 اگست (اے پی پی) بنجائی وزیر واپارجام کمال خان پارینے کہ توانائی، لاجسٹکس و فوڈ سیکورٹی کون آ اہم بشخ آتیٹی تین پہ تینی کمکاری نا کمک اٹ پاکستان و بنگلہ دیش مچ آ ڈیہہ اکن اسہ جوان ءُ زرگزرانی بدلی نا سوب جوڑ مننگ کیرہ۔ داخیال آتا درشانی ءِ او پاکستان اٹ تعینات بنگلہ دیش نا ہائی کمشنر محمد اقبال حسین خان تون اوڑدہی ٹی کرے۔ دوشنبے نادے آ جاری پریس ریلیز نا رداٹ اوڑدہی ٹی ہڑتوم آکنڈآتا واپار، توانائی، لاجسٹکس و صنعتی رابطہ غاتا مون آ دننگ آ سرجمی اٹ گپ وتران کننگا۔ اوڑدہی ٹی ہائی کمشنر اقبال حسین خان ساڑی آ دورہ جات اٹی پاکستان نا صنعتی ہند آتا مشاہدات و ہموجاگہ نا ہندی چیمبرز آف کامرس نا است خواہی نا ذکر ءِ کرے۔ اوخاص وڑاٹ بنگلہ دیش نا صنعتی گرج آتا رداٹ پاکستانی کولا و چُون انا خل انا خواست آ زور شاغا ہرا بنگلہ دیش نا بجلی پیدوار و سوڈاایش نا تیاری ٹی کاریم اٹ اتنگرہ ۔ اوڑدہی ٹی کشاری واپار نا مون آ دننگ آہم گپ وتران مس ہراٹی پاکستان نا کنڈآن بنگلہ دیش آن انناس نا درآمد و امب انا گمانی برآمد آتا بابت گپ وتران کننگا ہرا تکنیکی منظوری آن پد ممکن مریک۔ فریق آک ٹیکسٹائل، معدنی برآمدات(خاص کر سندھ آن بڑزکو آب انا چُون نا خل) و حلال سُو انا مصنوعات آتا بشخ آتیٹی وارخواہی پٹنگ آ امنا کریر۔ داکان بیدس لاجسٹک چیلنج آتا ایسری و بزنس ویزاپراسیسنگ ءِ آسان کننگ آ گپ وتران کننگا۔ اوڑدہی نا ایسری آ ہڑتوم آملک آک چندی بشخ آتیٹی کاروباری رابطہ غاتے سوگو کننگ و واپاری وڑوڈول ءِ گچین کننگ نا عزم انا درشانی ءِ کریر۔