بنجائی وزیر ڈٹ بندی احسن اقبال نا چائنا اٹامک انرجی اتھارٹی و چین نا خلائی ایجنسی نا چیئرمین شان زونگڈے تون اوڑدہی

بیجنگ۔ 04 اگست (اے پی پی) بنجائی وزیر ڈٹ بندی، شونداری وخصوصی گام گیج پروفیسر احسن اقبال دوشنبے نادے آ بیجنگ اٹی چائنا اٹامک انرجی اتھارٹی و چین نا خلائی ایجنسی نا چیئرمین شان زونگڈے تون اہم اوڑدہی کرے۔ اوڑدہی ٹی پاکستان و چین نا نیام اٹ جوہری توانائی و خلائی پٹ وپول نا بشخ آتیٹی ہڑتوم آکنڈآتا کمکاری ءِ پاکستان نا شونداری ہدف آتون ہم گرنچ کننگ آ سرجمی اٹ گپ وتران کننگا۔ بنجائی وزارت ڈٹ بندی، شونداری و خصوصی گام گیج نا کنڈآن جاری بیان نا رداٹ بنجائی وزیرپارے کہ چین۔ پاکستان اقتصادی راہداری (سی پیک) پاکستان نا توانائی و انفراسٹرکچر نا بشخ آتیٹی بنداوی اڑاند آتے مرکرینے و اونا رداٹ جوہری توانائی ٹی کمکاری پدریسہ شون ہلنگ ءِ۔ اوکے۔2، کے۔3 و سی۔5 نیوکلیئر پاور پلانٹ آتے دا شریداری نا سرسہب درور گوندا۔ پروفیسر احسن اقبال موسمیاتی بدلی تا رداٹ ایٹمی توانائی ءِ المی گوندسا پارے کہ وزیراعظم شہباز شریف نا وژنری کماشی نا رداٹ پاکستان نا خلائی پروگرام ءِ پوسکن ءُ تحریک اس ملانے ہرانارداٹ ’’اڑان پاکستان‘‘ نا سرحال آن خلائی سائنس آ خصوصی چکار کننگ انگ ءِ۔ اوپارے کہ زوت آتے اٹ  ہی پاکستان چین نا کمک اٹ مسہ سیٹلائٹ سرسہبی اتون خلاء غا گدریفینے و 2026ء ٹی اولیکو پاکستانی خلاباز چینی خلائی اسٹیشن آ مون تننگ کن تیار ءِ۔ پاکستان نا خلائی ایجنسی ءِ 2035 اسکان نوک آ مشن آ گدریفنگ نا ہدف تننگانے۔ احسن اقبال پارے کہ پاکستان اٹ بڑزکو آب انا انسانی وسیلہ دوئی ءِ ہرافتا لائخی تیان چین بھلو کچ اسے آ فائدہ ہرفنگ کیک۔ اومستی پارے کہ آخبت نا ٹیکنالوجی چیلنج آتا رداٹ پاکستان اٹ کوانٹم کمپیوٹنگ نا سینٹر جوڑکننگانے و سائنس ، ٹیکنالوجی و انجینئرنگ نا بشخ آتے قومی شونداری تون ہم گرنچ کننگ نا جوان پروگرام اسے نا بناءِ کننگانے۔ او چینی کمامدارآتیا زو رشاغاکہ ورناپاکستانی سائنسدان تیکن تبادلہ پروگرام نا کمک اٹ خلائی ٹیکنالوجی ٹی بڑزکو تعلیم نا وارخواہی تے پین ودفنگے۔