چیئرمین سینیٹ سید یوسف رضاگیلانی نا ویسٹ انڈیز نا برخلاف ٹی۔20 سیریز اٹی شاندار سرسہبی آ پاکستان کرکٹ ٹیم ءِ مبارکباد

اسلام آباد۔ 04 اگست (اے پی پی) چیئرمین سینیٹ سید یوسف رضاگیلانی ویسٹ انڈیز نا برخلاف ٹی۔ 20 سیریز اٹی شاندار سرسہبی آ قومی کرکٹ ٹیم ءِ است انا ہب اٹ مبارکبادی تسنے۔ دوشنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ پاکستان ٹیم انا گوازی گرآک میدان اٹی ہراجوزہ، نظم و ضبط و ٹیم ورک انا درشانی ءِ کریر او ستاکڑزک۔ اوپارے کہ پاکستانی بلے باز و گیند باز آک ویسٹ انڈیز نا برخلاف بھلو کارکڑد اس پیش کریر ہراداہیت انا شاہدی ءِ کہ پاکستان ٹیم جہانی ٹیم اسے شکست تننگ نا پورو لائخی تخک۔ سید یوسف رضاگیلانی دااومیت نا درشانی ءِ کرے کہ قومی ٹیم آخبت اٹی ہم ہندا جوش و عزم اتون میدان اٹ دڑنگک و پاکستان نا پن ءِ روشنا کیک۔ اوپارے کہ پاکستان نا ٹی ۔20 ٹیم اٹی اوار گوازی گر آک لائخ و سنبرینگوک ءُ ہرافک قوم انا اومیت آتیا پورو سلنگ نا پبی کوشست کریر۔ چیئرمین سینیٹ ٹیم انا کوچنگ اسٹاف و انتظامیہ نا کوشست آتا ہم ستاءِ کرے و پارے کہ اوفتا خواری داسرسہبی ٹی اہم کڑد ادا کرینے۔