5G زوت ملک ءَ بندات کنگ بیت، ملک ءَ بے رکاوٹ ءُ تیز رفتار انٹرنیٹ ءِ پجارینگ اولی ترجی انت، شزہ فاطمہ خواجہ

اسلام آباد۔4اگست  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ ملک ءَ زوت 5 جی ءِ بندات کنگ بیت، ملک ءَ بے رکاوٹ ءُ تیز رفتار انٹرنیٹ ءِ پجارینگ اولی ترجی انت، اسمارٹ فون فار آل پالیسی ءِ چیر دستی ءَ درستیں شہری آناں موبائل فون آسانیں قسط آنی سر ءَ پجارینگ بیت۔ آئی ءَ اے ھیالانی درشانی ٹک ٹوک ایپ ءِ فیچر اسٹیم فیڈ ءِ بندات ءِ مراگش ءَ گوں تران کنان ءَ کت۔ آئی ٹی ءِ وفاقی وزیر شزہ فاطمہ خواجہ ءَ گوشت کہ پاکستان ءَ آئی ٹی ءِ شوبگ ءَ گوں ترندی ءَ دیمروئی کنگ ءَ انت، ٹیکنالوجی توامیں شوبگ آنی تہ ءَ یک لوٹ ءِ جوڑ بوتگ، نوں مارا ایشی ءِ جوانیں کارمردی ءَ را دل یکیمی کنگی انت۔ آئی ءَ گوشت کہ ورنا آناں نوکیں چیزے زانگ ءُ وانینگ لوٹ ایت، ٹیکنالوجی ءِ اخلاقی ءُ ذمہ واریں رنگ ءَ کارمردی ءَ را دل یکیمی کنگ ءِ مئے دوئیں ذمہ واری انت۔ آئی ءَ گوشت کہ ٹیکنالوجی ءِ کارمرد کنگ ءَ یک انفرادی مردمے ھم وانگ ءُ زانگ، روزگار ءُ ایندگر شوبگ آنی تہ ءَ انقلاب آرگ ءَ انت، ورنا ھنر ءُ زانت ءِ دربرگ ءَ بہ کن انت، وانندہ ءُ نا وانندہ مردم ٹک ٹوک ءَ کارمرد کن انت، حکومت ءِ گوں ٹک ٹوک ءَ جوانیں سیادی است انت، ٹک ٹوک مئے ملک ءِ کانود آنی پد ءُ رند ءَ کنت۔ شزہ فاطمہ خواجہ ءَ گشتگ کہ ما ٹک ٹاک ءَ را یک وانگ ءِ پلیٹ فارم جوڑ کنگ لوٹ اِتگ، ٹک ٹوک ءَ را لاکھوں کارمرز کنوک اَنت، مئے مول ءُ مراد ایش اِنت کہ ٹک ٹاک ءَ را اے مردمانی واستہ وانگ ءُ زانگ ءِ محور جوڑ کنگ بہ بیت، اسٹیم فیڈ اے مول ءُ مراد ءِ سرجم کنگ ءَ کمک کنت۔ آئی ءَ اے ھاسیں گامگیج ءِ واستہ وزارت وانگ ءُ زانگ، وزارت ءِ اھوالکاری ءُ نشریات، مزن وزیر ءِ ورنا پروگرام ءُ ٹک ٹاک ٹیم ءِ ساڑات ءُ شگر ءُ منت گپت۔ آئی ءَ گوشت کہ انفارمیشن ٹیکنالوجی ءِ بابت ءَ سرپدی ءِ تہ ءَ رسانکدر ءِ ھاسیں کرد اِنت، ورنا ھم اے پلیٹ فارم آناں کارمرد کنگ ءِ واستہ ذمہ واری ءِ درشان کنگ لوٹ اَنت ءُ ایشی ءِ بابت ءَ دگراں ھم سرپد کنگ لوٹ اَنت، اخلاقی ءُ ذمہ واری ءِ وسیلگ ءَ ما اے پلیٹ فارم آناں ملک ءِ دیمروئی ءِ واستہ کارمرد کن ایں، کانود جوڑ کنگ بوتگ کہ ملک ءِ واستہ ڈیجیٹل پجار جوڑ کنگ بہ بیت ایشی ءِ تہ ءَ ھر یک زھگ ءُ مردم ءِ واستہ ڈیجیٹل پجار جوڑ کنگ بہ بیت۔ یک پلیٹ فارمے ءِ سر ءَ ءُ اے درستیں ڈیٹا یکجا کنگ بہ بنت، ڈیجیٹلائزیشن ءِ گوما درستیں دستاویز ءُ زانتکاری یک کلک ءِ سر ءَ دست کپ اَنت، ڈیجیٹل نیشن پاکستان ءِ تہ ءَ پیشرفت ءَ پد ھر مردم ءِ ڈیجیٹل پجار جوڑ کنگ بیت۔ آئی ءَ گوشت کہ ترند ءُ مُدامی انٹرنیٹ ءِ پھجاری اولی ترجی انت، گوستگیں سال ءَ انٹرنیٹ ءِ لوٹ 25درسد گیش بوتگ، پاکستان 2023 ءَ دیوالیہ بوھگ ءِ نزیک ءَ بوتگ، نوں ملک ءِ معیشت دیمروئی ءِ راہ ءَ انت، سرجمیں دگنیا ءَ پاکستان ءِ نام برز بوھگ ءَ انت۔ آئی ءَ گوشت کہ مئی ءَ پاکستان ءَ نا ایوک ءَ روایتی جنگ سوبمند بوتگ بلکینگ ءَ ٹیکنالوجی ءِ پڑ ءَ دژمن ءَ را پچکڑ کتگ۔ ما یک نیمگ ءَ بالی گراب ایر جت اَنت، دومی نیمگ ءَ ورناھاں ھوار دراھیں پاکستانیاں ٹیکنالوجی ءِ جنگ ءَ یکجاہ ءَ دژمن پروشت۔ اے جنگ ءِ تہا ٹیکنالوجی ءَ مزنیں کردے پیلو کتگ۔ پاکستان ءَ دُگنیا ءِ تہ ءَ ٹیکنالوجی ءِ شوبگ ءَ نامداریں جاھ حاصل کتگ ۔ ملک ءَ مہنگائی ءُ سود ءِ تہ ءَ مزنیں کمی یے بوتگ۔ آئی ءَ گوشت کہ 2014 ءَ محمد نواز شریف ءِ دور ءَ ملک ءَ فور جی اتکگ ات۔ ملک ءَ 550 میگاہرٹز ءَ برگ بیت۔ زوت یک نیلامی یے برجم دارگ بیت، ایشی ءَ چہ نہ ایوک ءَ 3G ءُ 4G ءِ سپیڈ گیش بیت بلکیں ملک ءَ 5G ھم دیم ءَ آرگ بیت۔ آئی ءَ گوشت کہ نیشنل فائبرائزیشن پلان ءِ چیر دستی ءَ سرجمیں ملک ءَ فائبر نیٹ ورک ایر کنگ بیت۔ انٹرنیٹ ءِ اے وسیلہ گیشتر معتبر ءُ تیز تر اِنت۔ آئی ءَ گوشت کہ سئیں نوکیں آبدوز کیبل آنی تہ ءَ چہ درستاں مستریں کیبل پاکستان ءَ سر بوتگ ءُ اے سال ءِ گڈ ءَ تاں کار بند کنگ بیت۔ دگنیا ءِ دراھیں دمگاں چہ سیٹلائٹ انٹرنیٹ ءَ را ملک ءَ آرگ ءِ واستہ گامگیج کنگ بوھگ ءَ انت۔ آئی ءَ گوشت کہ مزن وزیر محمد شہباز شریف ءَ اسمارٹ فون برائے آل ءِ پالیشی ءِ جار جتگ۔ اے پالیسی ءِ رد ءَ درستیں شہری آناں آسانیں قسط آنی سر ءَ بے تبعیض ءَ اسمارٹ فون دیگ بیت۔ زالبولانی واستہ مالیات ءِ رسائی یک مزنیں چیلنجے ۔ مئے سرکار ءِ وھد ءَ تاں انوگ ءَ یک ءُ نیم لکھ لیپ ٹاپ بھر ءُ بانگ کنگ بوتگ ۔ مزن وزیر ءِ ورنا پروگرام ءِ چیر دستی ءَ اے سال ءَ میرٹ ءِ رد ءَ لائک ءُ مستحقیں نودربر آناں یک لکھ لیپ ٹاپ بھر ءُ بانگ کنگ بوھگ ءَ انت۔ وزیر مملکت برائے وانگ ءُ زانگ ءُ پیشہ وارانہ تربیت واجہ قمر ءَ گوشت کہ ٹک ٹوک دلگوش دلگوش ءِ واستہ یک جوانیں پلیٹ فارمے، بلے اے گامگیج ءَ چہ ورنا آنی تہ ءَ وانگ ءُ زانگ ءِ عمل ءَ را دیم ءَ برگ ءَ کمک رسیت۔ ورنا مئے باندات انت۔ اے گامگیج ءِ وسیلگ ءَ آ وتی مہارتاں شرتر کن اَنت ءُ کارمرز کن اَنت۔ آئی ءَ گوشت کہ انفارمیشن ٹیکنالوجی ءِ شوبگ ءَ ورنا آناں تربیت دیگ حکومت ءِ اولی ترجی اِنت، ورنا موبائل فون یا لیپ ٹاپ ءِ وسیلگ ءَ دگنیا ءِ کجام ھم دمگ ءَ چہ زانتکاری زرت کن اَنت۔ آئی ءَ گوشت کہ وزارت ءِ انفارمیشن ٹیکنالوجی، وزارت ءِ وانگ ءُ زانگ ءُ مزن وزیر ءِ ورنا آنی پروگرام ورنا آنی واستہ ٹیکنالوجی ءِ رسائی ءَ را دل یکیمی کنگ ءِ واستہ سک باز کار کنگ ءَ انت، ما یک یکجاھیں حکمت عملی ءِ وسیلگ ءَ دیم ءَ روگ ءَ سوبمند بئیں، وفاقی دارالحکومت ءِ اسکول آنی 100درسد زھگ آناں ٹیکنالوجی ءِ رسائی ھست۔ آئی ءَ گوشت کہ اے سال ءِ دسمبر ءَ تاں وفاقی دارالحکومت ءِ توامیں اسکول فائبر آپٹک ءَ گوں ھوار کنگ بنت ءُ آھاں تیز رفتار انٹرنیٹ پجاری کنگ بیت۔