گلگت۔4اگست (اے پی پی): مزن وزیر محمد شہباز شریف ءَ موسمی مٹ ءُ بدلی ءَ چہ پیداکیں چیلنج آناں گیواری ءِ واستہ گامگیج آناں وھد ءِ مستریں لوٹ لیک اتگ ءُ گوشت کہ پاکستان ھمک سال موسمی مٹ ءُ بدلی ءِ سبب ءَ آفت آنی دیم ءَ انت۔ دوشمبے ءِ روچ ءَ مزن وزیر ءَ وتی تر ءُ تاب ءِ ساھت ءَ گلگت ءَ گوستگیں ھور ءُ سیلاب آنی سر ءَ چار ءُ تپاسی ءِ واستہ برجم داشتگیں دیوان ءَ گوں تران کنان ءَ گوشت کہ گوستگیں روچ آنی تہ ءَ گلگت بلتستان ءِ جتا جتائیں جاھاں جمبر ءِ ٹکر ءِ سبب ءَ سک باز تباہی بوتگ ایشی ءَ چہ بابوسر، گنچھے، دیاھے ءَ ھوار بازیں دمگ آنی سر ءَ سک باز تاوان بوتگ۔ مزن وزیر ءَ حادثہ آنی تہ ءَ بیران بوتگیں مردمانی معافی ءُ ٹپیگ آنی زوت جان سلامتی ءِ دعا کت ءُ گوشت کہ من مرچی ادا اتکگ آں کہ آ مواصلات، آپی وسیلگ، این ڈی ایم اے ءَ ھوار سیادی داروکیں وزارت ءُ محکمہ آنی وزیر ءُ کارندہ آنی گوما جاور ھال آنی سر ءَ چار ءُ تپاسی بہ کنت۔ مزن وزیر ءَ گوشت کہ جھان ءِ تک ءَ کاربن گیس آنی کشگ ءِ تہ ءَ مئے بھر سک کم اِنت، بلے موسمی مٹ ءُ بدلی ءَ چہ سک باز آماچیں ملک آنی تہ ءَ پاکستان ھوار اِنت۔ آئی ءَ گوشت کہ ھمک سال سیلاب تباہی ءِ سوب بنت، موسمیاتی مٹ ءُ بدلی ءِ چیلنج آں گوں گر ءُ چیل بوھگ ءِ واستہ گامگیج وھد ءِ ضلورت انت۔ آئی ءَ موسمیاتی بدلی ءِ وزارت ءَ را ہدایت کت کہ آ اے درگت ءَ المی گامگیج بہ زوریت، موسمیاتی بدلی ءِ ھوالگ ءَ دگنیا ءَ بازیں کانفرنس است انت کہ ایشی ءِ تہ ءَ ما ھم بھر زوری کن ایں، لچکداریں بنیاتی ڈھانچگ ءِ ھوالگ ءَ دگنیا ءَ چہ فنڈز بیار ایں پرچا کہ گلگت بلتستان ءُ آزات کشمیر ءَ ھوار سرجمیں ملک موسمی بدلی ءَ چہ آماچ بوھگ ءَ انت۔ مزن وزیر ءَ گوشت کہ آ زوت پدا گلگت بلتستان ءِ تر ءُ تاب ءَ روت، ایشی ءِ تہ ءَ گلگت بلتستان ءَ ڈینش اسکول ءِ بُن ھشت ایر کنگ بیت۔ آئی ءَ گوشت کہ سولر پارک منصوبگ ءِ سر ءَ وت ذاتی نگرانی ءَ کنگ ءَ آں، ایشی ءِ سر ءَ کار ءَ را تیز کن آں ءُ وتی ذاتی نگرانی ءَ منصوبگ ءَ را سرجم کناں۔
