ما ھما بہادریں پولیس افسر ءُ سرمچاراں شگر ءُ منت وار ایں کہ آیاں پہ ملک ءُ راج ءَ وتی جان ندر کتگ اَنت، سرکار شہید انی وارس آنی  وشھالی ءِ واستہ ھرچ وڑیں گامگیج ءَ برجاہ دار ایت،  صدر  مملکت آصف علی زرداری

اسلام آباد۔4اگست  (اے پی پی): صدر آصف علی زرداری ءَ گوشت کہ ما وتی بامردیں پولیس افسر ءُ سپاھیگ آناں شگر ءُ منت پیش کن آں کہ آہاں ملک ءُ قوم ءِ واستہ وتی جان ندر کتگ انت، حکومت شہید آنی وارث آنی گہبودی ءِ واستہ ھمک رنگ ءِ گامگیج ءَ برجاہ دار ایت۔ دو شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ پولیس شہید آنی روچ ءِ درگت ءَ راج ءَ را وتی کلوہ ءِ تہ ءَ صدر آصف علی زرداری ءَ گوشت کہ پولیس ءَ ناشرکاری، جرم ءُ ناامنی ءِ ھلاپ ءَ مھکمیں رنگ ءَ جنگ کتگ۔ صدر ءِ مملکت ءَ گوشت کہ مرچی ما وتی بامردیں پولیس افسر ءُ سپاھیگ آناں شگر ءُ منت پیش کن آں کہ آہاں ملک ءُ قوم ءِ واستہ وتی سر ندر کتگ، ھزاراں بامردیں پولیس کارندہ آں ملک ءُ قوم ءِ رکھینگ ءِ واستہ وتی سر ندر کتگ انت۔ آصف علی زرداری ءَ گوشت کہ شہید  آنی قربانی الس ءِ جان ءُ مال ءِ رکھینگ ءِ واستہ آوانی بے دروریں جزم ءِ علامت انت، پولیس شہید آنی دلیری، وفاداری ءُ مزنیں قربانی آناں راج سلام انت۔ صدر ءِ مملکت ءَ گوشت کہ راج وتی شہید آنی قربانی ءَ را کدی شموشکار نہ بیت۔ آئی ءَ گوشت کہ حکومت شہید آنی وارث آنی گہبودی ءِ واستہ ھمک رنگ ءِ گامگیج ءَ برجاہ دار ایت۔ آصف علی زرداری ءَ گوشت کہ استیں چیلنج آنی گوما گر ءُ چیل بوھگ ءِ واستہ پولیس ءِ صلاحیت آناں گیش کنگ ءُ نوکیں تربیت ءُ سلاہ پجاری وھد ءِ لوٹ اِنت۔ صدر ءِ مملکت ءَ گوشت کہ ایوک ءَ یک پیشہ وارانہ ءُ نوکیں سامان ءَ گوں لیسیں پولیس ریاست ءِ دژمن آنی گوما موثر رنگ ءَ جنگ ءَ کت کنت، مئے دعا انت کہ اللہ تعالیٰ شہید آنی اڑ ءَ برز بہ کنت ءُ آھانی کھول آناں صبر ءُ دلیری بہ دنت۔