مزن وزیر شہباز شریف ءَ آبادکاریں گلانی کمک ءَ اسرائیل ءِ وزیرانی مسجد الاقصی ءِ سر ءَ اُرش ءِ مذمت کتگ

اسلام آباد۔4اگست  (اے پی پی): مزن وزیر محمد شہباز شریف ءَ اسرائیل ءِ وزیر آنی نیمگ ءَ آبادکاریں گل آنی کمک ءَ مسجد الاقصی ءِ سر ءَ اُرش ءِ مذمت کتگ ءُ گوشت کہ اقصی مسیت ءِ بے حرمتی نہ ایوک ءَ یک ارب ءَ چہ گیش مسلمان آنی ایمان ءِ توہین اِنت بلکیں میاں اوستمانی کانود ءِ سر ءَ دیم پہ دیمیں اُرش اِنت۔ دو شمبے ءِ روچ ءَ سوشل نیٹ ورکنگ ویب سائٹ ’ایکس‘ ءِ سر ءَ وتی پوسٹ ءِ تہ ءَ مزن وزیر ءَ گوشت کہ پاکستان آبادکار گل آنی کمک ءَ ءُ اسرائیلی پولیس ءِ کور ءِ چیر ءَ اسرائیلی وزیر آنی نیمگ ءَ مسیت الاقصیٰ ءِ سر ءَ اُرش ءِ مذمت کنت۔ آئی ءَ گوشت کہ مسلمان آنی یک مقدس تریں جاھ آنی اے بے حرمتی نہ ایوک ءَ یک ارب ءَ چہ گیش مسلمان آنی ایمان ءِ توہین اِنت بلکیں میاں اوستمانی کانود ءُ انسانیت ءِ اجتماعی ضمیر ءِ سر ءَ براہ راست اُرش اِنت۔ آئی ءَ گوشت کہ قبضہ گیریں اسرائیل حکومت ءِ نیمگ ءَ اے وڑیں منظم اشتعال انگیزی ءَ چہ امن ءِ آسراتی ھترناک بوتگ اَنت۔ آئی ءَ گوشت کہ اسرائیل ءِ زوراکیں کارروائی زانت ءُ زانت ءَ فلسطین ءُ دمگ ءَ کش ءُ چیل ءَ را گیش کنگ ءَ انت ءُ میاں اوستمانی تک ءَ را گیش بے رھبندی ءُ جیڈھ ءِ نیمگ ءَ کشگ ءَ انت۔ مزن وزیر ءَ گوشت کہ پاکستان ترندیں جنگ بندی، سرجمیں زوراکی ءِ بند کنگ ءُ میاں اوستمانی کانود ءُ سیادی داروکیں اقوام متحدہ ءِ قرارداد آنی رد ءَ معتبریں امن عمل ءِ زندگ کنگ ءِ لوٹ ءَ را یک رندے پدا کنت، ایشی ءِ سبب ءَ فلسطین ءِ یک آجو ءُ زندگ داروکیں ریاست ءِ جوڑیشت ءِ سبب ءَ القدس الشریف ءِ دارالحکومت بیت۔