سینئر اسرائیلی وزیر، پارلیمنٹ نا باسک، سرکاری کمامدار و ہزار آ اسرائیلی آبادکار آتا کنڈآن مسجد اقصیٰ نا بے شرفی جارحانہ و اشتعال انگیز گام اسے، ترجمان دفترخارجہ

اسلام آباد۔ 04 اگست (اے پی پی) پاکستان سینئر اسرائیلی وزیر، پارلیمنٹ نا باسک، سرکاری کمامدار و ہزار آ اسرائیلی آباد کارآتا کنڈآن اسرائیلی پولیس نا سیکورٹی ٹی مسجد اقصیٰ نا بے شرفی ءِ جارحانہ و اشتعال انگیز گام اس گوندسا اونا مذمت ءِ کرینے۔ دفترخارجہ نا ترجمان نا کنڈآن دوشنبے نادے آ جاری بیان اٹی پاننگانے کہ سینئر اسرائیلی کمامدارآتا ساڑی گری و اوفتا بیان و نفرت آمیز پڑو کہ’’ٹیمپل ماؤنٹ(القدس شریف) ننا ءِ‘‘، مچ آ دنیا ٹی مذہبی جوزہ غاتے ہُشکائفنگ، بے چیٹی ٹی ودکی کننگ و مسجد اقصیٰ نا حیثیت ءِ بدل کننگ نا اسہ خطرناک و دانستہ کوشست اسے۔ اسرائیلی نا توسیع پسندانہ کوشست ڈیہہ ءِ نزور کننگ و امن نا ہربامعنی کسر ءِ لتاڑنگ نا دانستہ گام اسے۔ دا اشتعال انگیزی آن مچ آ ڈیہہ اٹی بیدادی نا بھسکار چرجوئی بناکننگ نا خطرہ ءِ۔ دنیا ءِ داوڑنا منظم، غیرکانودی، غیرانسانی و غیرکانودی جارحیت نا مون آ بایدے چُپ سلپ۔ داوڑنا گام گیج جہانی انسانی حق و انسانی کانود، اقوام متحدہ نا چارٹر تون اوار اوار اقوام متحدہ و او آئی سی نا چندی قرارداد آتا اسُل خلاف ورزی ءِ۔ نن جہانی برادری خاص کر اقوام متحدہ غان خواست کینہ کہ او اسرائیل ءِ اونا غیرکانودی گام گیج آتا جوابدہ گوندنگ و مسجد اقصیٰ نامذہبی تقدس و فلسطینی الس نا حق خاص کر حق خودارادیت نا رکھ اکن دمدستی و پبی گام گیج کے۔ پاکستان جون 1967ء نا سیم تیا تالان اسہ وتواجہ، آجو، قابل عمل و باہم متصل فلسطینی ریاست نا جوڑ کننگ کن تینا بدل مفروک مخ تفی نا درشانی ءِ کیک، ہرانا دارالحکومت القدس الشریف مرے۔