پولیس نا شہید آتے خراج عقیدت، 04 اگست نادے ملک انا داخلی سلامتی نا نگہبان تا پن ہرافک تینا نہادی جون تے ندر کرسا ریاستی عملداری ءِ پک کریر، وزیرداخلہ محسن نقوی

اسلام آباد۔ 04 اگست (اے پی پی) بنجائی وزیر داخلہ محسن نقوی پولیس نا غٹ شہید آتے خراج عقیدت پیش کرسا پارینے کہ 04 اگست نادے ملک انا داخلی سلامتی نا نگہبان تا پن ہرافک تینا نہادی جون تے ندر کرسا ریاستی عملداری ءِ پک کریر۔ دوشنبے نادے آ یوم شہدائے پولیس آ تینا کلہو اٹی بنجائی وزیر داخلہ پارے کہ پولیس نا غٹ شہید آتے خراج عقیدت پیش کیوہ، ہمو عظیم محافظ آتے سلام پیش کیوہ ہراشہیدی نا بڑزکو مرتبہ غا فائز مرسا امر مسر۔ اوپارے کہ دہشت گردی، ڈوہ و راج دشمن زموار آتا برخلاف بہادری اٹ جنگ ترسا جون تے ندر کروک آ پولیس آفیسر وورناک قوم انا ہیروک ءُ۔ محسن نقوی پارے کہ پولیس نا شہید آک فرض ءِ پورو کرسا تینا زندءِ ندر کرسا تاریخ اٹی تینا ہند ءِ امرکریر، ریاست ہمو عظیم خاہوت آتا مقروض ءِ ہرافتا مارک امن و رکھ اکن تینا جون تے ندرکریر۔ وزیرداخلہ پارے کہ شہید ایس ایس پی اشرف مارتھ، شہید کیپٹن مبین و غٹ پولیس شہید آک ننا است آتیٹی مدام زندہ ءُ و زندہ سلرہ۔ محسن نقوی پارے کہ نن ہرلمحہ پولیس نا شہید آتا خاہوت آتون اوار اُن و اوار سلنہ، ہمو قوم مدام سرسہب مریک ہرا تینا شہید آتا تکریم ءِ کیک۔ اوپارے کہ اینو نن تینا ضمیر نا مون آ قول کینہ کہ نئے نن پولیس شہیدآتے است آن دینہ و نئے اوفتا خاہوت آتے تنیا اِلینہ۔