دلیر پولیس آفیسر و ورناتے خراج عقیدت پیش کینہ ہرافک ملک و قوم انا خاطر تینا جون تے ندر کریر، صدر  مملکت آصف علی زرداری

اسلا آباد۔ 04 اگست (اے پی پی) صدرمملکت آصف علی زرداری پارینے کہ اینو نا دے نن تینا دلیر پولیس آفیسر و ورناتے خراج عقیدت پیش کینہ ہرافک ملک و قوم انا خاطر تینا جون تے ندر کریر ، حکومت شہید آتا وارث آتا راجی آسودہی کن غٹ ممکن گام گیج کرسا کیک۔ دوشنبے نادے آ ایوانِ صدر نا پریس ونگ آن جاری بیان نا رداٹ یوم شہداء پولیس آ قوم انا پن تینا کلہو اٹی صدر ءِ مملکت آصف علی زرداری پارے کہ پولیس دہشت گردی ، ڈوہ و بدامنی نا برخلاف پبی جہد کرینے۔ صدر ءِ مملکت پارے کہ اینو نا دے نن تینا دلیر پولیس آفیسر و ورناتے خراج عقیدت پیش کینہ ہرافک ملک و قوم انا خاطر تینا جون تے ندر کریر، ہزار آ دلیر پولیس ورناک ملک و قوم انا رکھ اکن تینا جون تے ندرکریر۔ آصف علی زرداری پارے کہ شہید آتا قربانی الس نا جان ومال انا رکھ اکن اوفتا بدل مفروک عزم انا نشانی ءِ، قوم پولیس نا شہید آتا جیرت، وفاداری و عظیم قربانی تے سلام پیش کیک۔ صدر ءِ مملکت پارے کہ قوم تینا شہید آتا قربانی تے اسُل است آن دپک۔ اوپارے کہ حکومت شہید آتا وارث آتا راجی آسودہی کن غٹ ممکن گام گیج کرسا کیک۔ آصف علی زرداری پارے کہ ساڑی چیلنج آتون مون تننگ کن پولیس نا لائخی تیٹی ودکی و پوسکن تربیت و سلہہ فراوان کننگ وخت انا گرج ءِ۔ صدر ءِ مملکت پارے کہ کسبی و پوسکن سازوسامان تیان شُپ پولیس ہم دشمنانِ ریاست نا گچین مقابلہ ءِ کننگ کیک، ننا دعاءِ کہ اللہ تعالیٰ شہید آتا درجہ غاتے بڑز کے و اوفتا خاہوت ءِ صبر وحوصلہ عطاکے۔