وزیراعظم شہباز شریف نا اسرائیلی وزیر آتا کنڈآن آباد کار گروپ آتون مسجد اقصیٰ آ جلہو کننگ نا مذمت

اسلام آباد۔ 04 اگست (اے پی پی) وزیراعظم محمد شہباز شریف اسرائیلی وزیر آتا کنڈآن آباد کار گروپ آتون اواری اٹ مسجد اقصیٰ غا جلہو کننگ نا مذمت ءِ کرسا پارینے کہ مسجد اقصیٰ نا بے شرفی نئے بیرہ اسہ ارب آن زیات مسلمان تا عقیدہ نا توہین ءِ بلکن جہانی کانود و انسانی اجتمامی ضمیر آہم براہ راست جلہو ءِ۔ دوشنبے نادے آ راجی رابطہ نا ویب سائٹ’’ایکس‘‘ آ اسہ پوسٹ اسے ٹی وزیراعظم پارے کہ پاکستان مسجد اقصیٰ غا اسرائیلی وزیر آتا کنڈآن آباد کار گروپ آتون اواری اٹ و اسرائیلی پولیس نا ڈھال اٹی جلہو نا مذمت ءِ کیک۔ اوپارے مسلمان تا مقدس انگا ہند آتیان اسٹ نا دا بے شرفی نئے بیرہ اسہ ارب آن زیات مسلمان تا عقیدہ نا توہین ءِ بلکن جہانی کانود و انسانیت نا اجتماعی ضمیر آہم براہ راست جلہو ءِ۔ اوپارے کہ کوزہ گیر اسرائیلی حکومت نا کنڈآن داوڑنا منظم اشتعال انگیزی امن نا گمان تے خطرہ ٹی شاغانے۔ اوپارے کہ اسرائیل نا جارحانہ گام گیج رزاک اٹ فلسطین و ڈیہہ اٹی بے چیٹی ءِ تہوتننگ ءِ و دے ٹک نیامی ءِ پین نزوری و جھیڑہ غاتا کنڈآ دننگ ءِ۔ وزیراعظم پارے کہ پاکستان جہانی کانود و اقوام متحدہ نا تعلقدار قرارداد آتا رداٹ دمدستی جنگ بندی، غٹ جارحیت نا چٹفنگ و اسہ پت انا قابل امن عمل نا احیا نا خواست انا درشانی ءِ کیک ہراڑآن فلسطین نا اسہ آجو و قابل عمل ریاست اس جوڑ کننگے ہرانا دارالحکومت القدس الشریف مرے۔