چیئرمین سینیٹ یوسف رضا گیلانی ءَ ایران ءِ صدر مسعود پزشکیان  ءَ گوں گند ءُ نند کتگ، وت مہ وتی مفاد ءِ جیڈھ آنی سر ءَ گپ ءُ تران کنگ بوتگ

اسلام آباد۔3اگست  (اے پی پی):پارلیمنٹ گس اسلام آباد ءَ سینیٹ ءِ چیئرمین پاکستان سید یوسف رضا گیلانی ءَ ایران ءِ صدر ڈاکٹر مسعود پزشکیان  ءَ گوں گند ءُ نند کت۔ یک شمبے ءِ روچ ءَ سینیٹ سیکرٹریٹ ءِ نیمگ ءَ جاڑی بوتگیں بیان ءِ رد ءَ چیئرمین سینیٹ ءَ ایران ءِ صدر ءَ را گرمیں وش اتک کتگ ءُ گوشت کہ آئی ءِ پاکستان ءِ تر ءُ تاب دوئیں ملک آنی نیام ءَ دوستی، براتی ءُ وت مہ وتی کمک ءَ را گیش مھکم کنگ ءِ واستہ سنگ میل ءِ ثابت بیت۔ گند ءُ نند ءِ ساھت ءَ چیئرمین سینیٹ ءَ صدر پشکیشیان ءَ را اسرائیل ءِ گوما گوستگیں جیڈھ ءِ تہ ءَ ایران ءِ راجدپتری سوبمندی ءِ سر ءَ مبارکی دات۔ آئی ءَ گوشت کہ پاکستان اولی ملک اِنت کہ آئی ءَ اقوام متحدہ ءِ منشور ءِ رد ءَ ایران ءِ وت رکینگ ءِ ھک من اِتگ ءُ پاکستانی پارلیمنٹ ءَ اسرائیل ءِ زوراکی ءِ ھلاپ ءَ ءُ ایران ءِ وت واجھی ءِ حمایت ءَ یک متفقہ قرارداد منظور کتگ۔ چیئرمین سینیٹ ءَ اے گپ ءِ سر ءَ زور پر دات کہ پاکستان دراھیں جیڑھانی پرامنیں رنگ ءَ گیش ءُ گیوار ءِ لوٹ ءَ کنت ءُ جنگ ھچ جیڈھ ءِ گیواری نہ اِنت۔ آئی ءَ امیت سہرا کت کہ میاں اوستمانی ءُ مغربی ایشیا ءَ دائمی امن، برجائی ءُ دیمروئی ممکن بیت۔ آئی ءَ ایران ءِ پارلیمنٹ ءَ صدر پیشکیان ءِ گشتانک ءِ وھد ءَ ”شکر اِنت پاکستان“ ءِ نعرہ آناں دوئیں ملک آنی نیام ءَ دیریں ءُ گہتریں دوستی ءِ درشان لیک اِتگ ءُ جموں ءُ جموں ءِ جیڈھ ءِ سر ءَ ایران ءِ سروک آیت اللہ علی خامنہ ایش ءِ مدام ءُ اصولی کمک ءَ را شگر ءُ منت گپتگ۔ گند ءُ نند ءِ تہ ءَ وت مہ وتی سیادی، پارلیمانی کمک، تجارت، معیشت، دود ءُ ربیدگ ءُ اے دگہ شوبگ آنی سر ءَ سرجمی ءَ گپ ءُ تران کنگ بوت۔ چیئرمین سینیٹ ءَ پارلیمانی تک ءَ سیادی ءَ را گیش مھکم کنگ ءِ جزم ءِ یک رند ءَ پدر کنان ءَ گوشت کہ پاکستان ایران ءِ پارلیمانی دوستی گروپ کانود سازی، برجاھیں رابطہ ءُ مردم آنی نیام ءَ سیادی ءِ تہ ءَ کمک ءَ را دیمروئی دیگ ءِ واستہ کلیدی کرد پیلو کنگ ءَ انت۔ آئی ءَ وانگ ءُ زانگ ءُ دود ءُ ربیدگ ءِ سیادی آناں گیش کنگ ءِ ضلورت ءِ سر ءَ ھم زور پر دات تانکہ دوئیں ملک آنی اُلس آنی نیام ءَ وت مہ وتی مفاہمت ءُ نیک راھی ءَ را گیش دیمروئی دیگ بہ بیت۔ آئی ءَ ایران ءِ حکومت ءِ ھم پاکستانی زیارتی آں گوں مھروانیں سلوک ءُ مہمان داری ءِ شگر ءُ منت گپت۔ سینیٹ ءِ چیئرمین ءَ دل یکیمی دات کہ ایران ہر مشکلیں ساھت ءَ پاکستان ءِ بے مٹیں کمک ءِ سر ءَ بھروسہ کت کنت۔ ایران ءِ صدر ڈاکٹر مسعود پیزکیان ءَ سینیٹ ءِ چیئرمین ءِ ھیالانی سر ءَ تپاک کنان ءَ اے گپ ءِ سر ءَ زور پر دات کہ پاکستان ءُ ایران ءِ سیادی یکے دومی ءِ سر ءَ بھروسہ ، دود ءُ ربیدگ ءِ نزیکی ءُ یکجاھیں مذھبی ءُ تہذیبی میراث ءِ سر ءَ راجدپتری بنیات آنی سر ءَ جوڑ کنگ بنت۔ آئی ءَ دمگی امن، مھکم ءُ وشھالی ءِ دیمروئی ءِ واستہ یکجائی کوشست آنی ضلورت ءِ سر ءَ زور پر دات ءُ گوشت کہ ایران پاکستان ءِ گوما تجارت، معیشت ءُ سرمایہ کاری ءُ دگہ پڑ آنی تہ ءَ کمک ءَ را گیش وسعت دیگ ءِ واھشت مند اِنت تانکہ دوئیں ملک آنی اُلس ءَ را نپ چست بہ بیت۔ صدر پیزکیان ءَ گوستگیں ایران ءُ اسرائیل ءِ جیڈھ ءِ وھد ءَ پاکستانی حکومت، پارلیمنٹ ءُ الس ءِ کمک ءِ سر ءَ دل ءِ جہلانکی ءَ منت واری درشان کت ءُ گوشت کہ پاکستان ءِ پارلیمانی قرارداد ءُ السی یکوئی ستا کرزیں ءُ راستیں دوستی ءِ درشان اِنت۔ آئی ءَ دوئیں ملک آنی نیام ءَ پارلیمانی سیادی ءَ را گیش مھکم کنگ ءِ ضلورت ءِ سر ءَ زور پر دات ءُ وانگ ءُ زانگ، دود ءُ ربیدگی ءُ مردم آنی تہ ءَ مردم آنی تک ءَ تبادلہ ءِ دیمروئی ءِ حمایت کت۔ ایران ءِ صدر ءَ ایران ءِ جہانی امن، یکے دومی ءِ احترام ءُ امن ءِ ہمراہ داری ءِ سرا یک رندے پدا گوشت کہ پاکستان ءُ ایران دنیا ءَ را اے پیغام ءِ دیم دیگ لوٹ ایت کہ دائمی امن ءِ راستیں راہ گپ ءُ تران، کمک ءُ براتی ءِ تہا انت۔ اے ھاسیں گند ءُ نند ءَ راجی اسمبلی ءِ اسپیکر سردار اسپیکر قومی اسمبلی سردار ایاز صادق، سینیٹر سلیم مانڈوی والا، سینیٹر عرفان صدیقی ، ءُ راجی اسمبلی ءِ باسک نوید قمر ھم ساڑی بوتگ انت۔