ایران ءِ وزیر فرزانہ صادق ءَ گوں وفاقی وزیراں یکجائی گند ءُ نند کتگ، دو نیمگی سیادی ءَ را گیش دیمروئی دیگ ءِ ھاتر ءَ جتا جتائیں جیڈھ آنی سر ءَ گپ ءُ تران کتگ، ھاسیں رنگ ءَ ٹرانسپورٹ ءِ گہتری ءِ ھاتر ءَ ھیال ریچی

اسلام آباد۔3اگست  (اے پی پی):ایران ءِ سڑک ءُ شہری دیمروئی ءِ وزیر فرزانہ صادق ءَ مواصلات ءِ وفاقی وزیر عبدالعلم خان، تجارت ءِ وزیر جام کمال خان ءُ ریلوے ءِ وزیر حنیف عباس ءِ گوما یکجائی گند ءُ نند ءَ بہر زرتگ۔ ھاسیں رنگ ءَ ٹرانسپورٹ ءِ گہتری ءِ سر ءَ دیوان ءَ گپ ءُ تران کنگ بوت۔ پاکستان ءُ چین ءِ گوما ریشم ءِ راہ ءِ منصوبہ ءِ تہا ایران ءِ بہر زورگ ءُ گوادر چابهار دریائی راہ ءِ سرا وت مہ وتی بیپاری ءِ دیمروئی ءِ بابت ءَ گپ ءُ تران بوتگ۔ وفاقی وزیر مواصلات عبدالعالم خان ءَ ایران ءِ صدر ءُ آئی ءِ ڈل ءِ پجار کنان ءَ گوشت کہ پاکستانی الس ایران ءَ را مبارک بات دنت کہ آئی ءَ اسرائیل ءِ ھلاپ ءَ سروکی کتگ کہ سرجمیں اسلامی دگنیا ءِ واستہ فخر ءُ وشی ءِ وسیلگ اِنت۔ عبدالعلم خان ءَ گوشت کہ ایران ءُ پاکستان مدام یک دومی نیمگ ءَ دومی نیمگ ءِ حمایت کتگ وھدیکہ گوستگیں جنگ ءَ دوئیں ملک یکے دومی ءَ گوں نزیک کتگ انت۔ مواصلات ءِ وفاقی وزیر عبدالعالم خان ءَ ایران ءِ سڑک ءُ شہری دیمروئی ءِ وزیر فرزانہ صادق ءَ را 23 ءُ 24 اکتوبر ءَ پاکستان ءَ برجم دارگ بوؤکیں وزارتی کانفرنس ءَ بہر زورگ ءِ دعوت داتگ کہ ایشی ءِ تہا 20 ملک بہر زور انت۔ ایران ءِ وزیر ءَ اسرائیل ءِ زوراکی ءِ ھلاپ ءَ سرجمی ءَ کمک کنگ ءِ پد ءَ پاکستانی الس ءِ منت واری درشان کتگ۔ آئی ءَ گوشت کہ پاکستان ءُ ایران ءِ نیام ءَ استیں گاڑی آنی تہ ءَ گیشی کنگ المی انت ءُ ما کوئٹہ ءَ چہ زاھدان ءَ استیں روٹ ءَ را ھم نوکیں رنگ ءَ جوڑ کت کناں۔ مواصلات ءِ وفاقی وزیر عبدالعالم خان ءَ دوئیں ملک آنی نیمگ ءَ چہ ورکنگ گروپ آنی تجویز داتگ تانکہ دو نیمگی جیڈھ آناں گیش دیمروئی دیگ بہ بیت۔ گند ءُ نند ءَ وفاقی وزیر تجارت جام کمال خان ءَ ایران ءِ وزیر ءَ را تجارت ءِ حجم ءِ تہ ءَ گیشی ءُ جتاجتائیں جیڈھ آنی بابت ءَ سرپد کت۔ آئی ءَ گوشت کہ دوئیں ملک یکے دومی ءِ واستہ تجارتی مارکیٹ ثابت بوت کن اَنت پرچا کہ بازیں شوبگ آنی تہ ءَ مزنیں گنجائش است اِنت۔ ریلوے ءِ وفاقی وزیر حنیف عباسی ءَ اسلام آباد، تہران ءُ استنبول ریل منصوبگ ءِ سر ءَ چار ءُ تپاسی کنان ءَ گوشت کہ پاکستان زاھدان ءَ چہ ریلوے ٹریک آناں اپ گریڈ ءُ گیش کنت۔ ایران ءِ سڑک ءُ شہری دیمروئی ءِ وزیر فرزانہ صادق ءَ وفاقی وزیر آنی منت گپت کنان ءَ ایران ءِ نیمگ ءَ چہ ھرچ وڑیں کمک ءِ دل یکیمی دات ءُ گوشت کہ آوانی پاکستان ءِ تر ءُ تاب سک باز وش ءُ یاتگار اِنت، ایشی ءَ چہ دوئیں ملک آناں گیش سرگرمیں رنگ ءَ کار کنگ ءِ موہ رس ایت۔ مواصلات ءِ وفاقی وزیر عبدالعلامہ خان ءَ ایران ءِ گوستگیں تر ءُ تاب ءِ حوالہ ءَ دوئیں ملک آنی نیام ءَ بوتگیں پیشرفت ءَ را جوانیں لیک اتگ۔ آئی ءَ ایران ءِ سڑک ءُ شہری دیمروئی ءِ وزیر فرزانہ صادق ءَ را ھم تحفہ دات ءُ ایران ءِ الس ءِ منت واری ءِ  واھگ آنی   درشانی کت۔