مزن وزیر شہباز شریف ءَ ایران ءِ صدر ڈاکٹر مسعود پزشکیان     ءَ گوں گند ءُ نند کتگ، دمگی ءُ جھان ءِ جیڈھ آنی سر ءَ تبادلہ، دوئیں ملک آنی نیام ءَ جتا جتائیں پڑ آنی تہ ءَ دو نیمگی سیادی ءُ کمک ءَ را گیش گیش کنگ ءِ ضلورت، شہباز شریف

اسلام آباد۔3اگست  (اے پی پی): مزن وزیر محمد شہباز شریف ءَ پاکستان ءُ ایران ءِ دیریں براتی سیادی ءِ ارزشت ءِ سرا زور پر داتگ ءُ گشتگ کہ آ ایران ءِ حکومت، سلاہ بندیں اُرد ءُ پاکستان ءِ مہلوک ءِ گوما سرجمی ءَ کمک ءُ اوشتاتگ آں ۔ پاکستان ءُ ایران ءِ نیام ءَ استیں دو نیمگی کمک ءَ را گیش وسعت دیگ ءِ ضلورت انت ھاسیں رنگ ءَ بیپار، رابطہ، دود ءُ ربیدگ ءُ الس ءِ نیام ءَ سیادی ءِ شوبگ ءَ۔ اے ھیالانی درشانی آئی ءَ جمھوریہ اسلامی ایران ءِ صدر ڈاکٹر مسعود پزشکیان     ءَ گوں تران کنان ءَ کت اَنت۔ ایران ءِ صدر کہ اے وھد ءَ پاکستان ءِ سرکاری تر ءُ تاب ءَ انت آئی ءَ یک شمبے ءِ روچ ءَ مزن وزیر گس ءَ مزن وزیر محمد شہباز شریف ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر گس ءَ سر بوھگ ءِ سر ءَ مزن وزیر ءَ را جوانیں وش اتک کنگ بوت۔ آئی ءَ را گارڈ آف آنر دیگ بوتگ۔ باقاعدہ استقبالیہ ءِ مراگش برجم دارگ بوت۔ دوئیں رہشون آنی نیام ءَ دو نیمگی گند ءُ نند بوت، ایشی ءَ پد ڈل ءِ تک ءَ گپ ءُ تران بوت۔ ڈل ءِ تک ءَ گپ ءُ تران ءِ ساھت ءَ مزن وزیر ءِ ھمراھی ءَ نائب مزن وزیر ءُ درئی کارانی وزیر جنئر محمد اسحاق ڈار، چیف آف آرمی اسٹاف فیلڈ مارشل صدام حسین منیر ءُ ایندگر ھاسیں وفاقی وزیر، مملکت ءِ وزیر ءُ حکومت ءِ مزنیں کارندہ ھم ھوار بوت اَنت۔ مزن وزیر ءَ پاکستان ءُ ایران ءِ نیام ءَ دیریں براتی سیادی آنی ارزشت ءِ سر ءَ زور پر دیان ءَ ایران ءِ راج، سلاہ بندیں اُرد ءُ الس ءِ واستہ پاکستان ءِ سرجمیں یکوئی ءُ کمک ءِ پدرائی کت کہ آھاں گوستگیں 12 روچی جنگ ءِ وھد ءَ اسرائیل ءِ زوراکی ءِ ھلاپ ءَ دلیری ءَ گوں جنگ کتگ۔ مزن وزیر ءَ اے جنگ ءِ ساھت ءَ ایران ءِ فوجی کارندہ ، زانتکار ءُ بے میاریں لس مردم آنی شھید بیگ ءِ سر ءَ دلپدردی ءِ درشانی کت ءُ ٹپیگ آنی زوت جان سلامتی ءِ دعا لوٹ اِت۔ آئی ءَ گوستگیں روچ ءَ پاک بھارت ءِ نیام ءَ جیڈھ ءِ وھد ءَ پاکستان ءِ کمک ءَ ایران ءِ شگر گپت۔ صدر پزشکیان     ءَ جنگ ءِ وھد ءَ ایران ءِ بے دروریں کمک ءِ پد ءَ پاکستان ءِ حکومت ءُ الس ءِ شگر ءُ منت گپت ءُ گوشت کہ ایرانی راج اے روح ءَ یک ھمشھر ءِ رنگ ءَ یات کنت۔ مزن وزیر ءَ پاکستان ئُُ ایران ءِ استیں دو نیمگی کمک ءَ را گیش پراھی کنگ ءِ ضلورت ءِ سر ءَ زور پر دات، ھاسیں رنگ ءَ تجارت، رسانک، دود ءُ ربیدگ ئُُ مردم ئُُ مردم ءِ سیادی ءِ شوبگ ءَ۔ اے درگت ءَ مزن وزیر ءَ 22می پاک ایران ءِ یکجائی اقتصادی کمیشن ءِ زوت دعوت دیگ ءِ ضلورت ءِ سر ءَ زور پر دات کہ زوت ایشی ءِ امیت انت۔ دوئیں رہشون آں وت مہ وتی دلچسپی ءِ جتا جتائیں شوبگ آنی تہ ءَ بازیں یادداشت ءُ معاہدگ آنی مراگش ءَ بھر زوری کت کہ ایشی ءَ چہ دو نیمگی سیادی ءَ را مھکم کنگ ءَ ھاسیں کرد پیلو کنت۔ تجارت ءِ دیمروئی ءِ واستہ بازیں گامگیج آنی سر ءَ گپ ءُ تران کنگ بوت، ایشی ءِ تہ ءَ بارٹر ٹریڈ ءِ آسراتی، برنج، میوہ ءُ گوشت ءِ برآمد ءِ واستہ کوٹہ ءِ تہ ءَ گیشی، سیمسر ءِ مارکیٹ آناں فعال کنگ ءُ تجارتی رکاوٹ آناں ھلاس کنگ ھوار اِنت۔ دوئیں راہشوناں پاک ایران ءِ بیپاری گپ ءُ تران ءِ دیمروئی ءِ سرا دل یکیمی ءِ درشانی کتگ۔ آہاں دو نیمگی تجارت ءِ 3ارب ڈالر ءِ انوگیں حجم ءَ را زوتاں چہ زوت 10ارب ڈالر ءِ ٹارگٹ ءَ سر کنگ ءِ وتی جزم ءِ پدا زور دات۔ دوئیں بامرد آں دمگی ءُ جھان ءِ جیڈھ آنی سر ءَ ھم ھیال ریچی کت ۔ پاکستان ءِ مزن وزیر ءَ ایران ءِ حکومت ءِ شگر ءُ منت گپت کہ آ فلسطینی الس ءَ را پچیں ءُ عملی کمک ءَ کنت کہ آ اسرائیل ءِ اُرد ءِ زوراکی ءِ آماچ انت۔ مزن وزیر ءَ اقوام متحدہ ءِ قرارداد آنی رد ءَ آجوئیں فلسطینی ریاست ءِ جوڑ کنگ ءِ واستہ پاکستان ءِ سرجمیں کمک ءِ پدرائی کت ءُ غزہ ءَ اسرائیل ءِ ظلم ءُ زوراکی آناں زوت ھلاسی ءُ اودا مظلومیں اُلس ءَ را انسانی کمک ءِ پھجارینگ ءِ لوٹ کت۔ دوئیں راہشوناں چہ میاں اوستمانی براتی ءَ لوٹ کتگ کہ آ بحران ءِ گیواری ءِ واستہ ترندیں گامگیج بہ زور انت۔ مزن وزیر ءَ ھندی مقبوضہ جموں ءُ کشمیر ءِ مظلوم الس ءِ واستہ کمک کنگ ءِ پد ءَ ایران ءِ ھم شگر ءُ منت گپت۔ مزن وزیر ءَ ایران ءِ صدر ءُ آئی ءِ ڈل ءِ شرپ ءَ نان ءِ نان ءِ میزبانی ھم کت۔ ایشی ءَ چہ پیسر دوئیں راہشون آں یکجائی پریس کانفرنس ءَ ھم بھر زوری کتگ ات۔