پاکستان ایران ءِ نیام ءَ آزاد بیپاری معاہدہ بوتگ، دو نیمگی بیپاری ءَ گیشی بیت، وفاقی وزیر تجارت جام کمال خان ءَ پاکستان ایران بزنس فورم ءَ گشتانک

اسلام آباد۔3اگست  (اے پی پی): وفاقی وزیر تجارت جام کمال خان ءَ گشتگ کہ بلوچستان ءِ الس ایران ءِ گوما تجارت ءِ سرا انحصار کن انت، سیم سری تجارت دوئیں ملکانی واستہ المی انت، مند پشتینا سیم سری بازار پدا سرگرم بوتگ، چاگی کوہاک ءُ گبد رمضان مارکیٹ زوت فعال بنت، سیم سری دمگ ءَ را نپ رسیت۔ اے ھیالانی درشانی آئی ءَ یک شمبے ءِ روچ ءَ برجم داشتگیں پاکستان ایران بزنس فورم ءَ گوں تران کنان ءَ کت۔ ایران ءِ ڈل ءَ را پجار کنان ءَ وفاقی وزیر تجارت ءَ گوشت کہ پاک ایران ءِ سیادی براتی براتی ءِ سر ءَ انت، بلوچستان ءِ الس ایران ءِ گوما تجارت ءِ سر ءَ بندوک انت، سیمسر بیپاری دوئیں ملک آنی واستہ المی انت۔ آئی ءَ گوشت کہ مند پشتینا سیمسر ءِ بازار پدا سرگرم بوتگ، بازار 30 جولائی ءَ پچ کنگ بوتگ، جام کمال خان ءَ گیش گوشت کہ چاگی کوھک ءُ گبد رمضان بازار زوت سرگرم کنگ بنت۔ نوکیں بازار آں چہ سیمسر دمگ آناں سیت رسیت ۔ وزیر تجارت ءَ گوشت کہ جندی شعبہ 10ارب ڈالر ءِ تجارتی ٹارگٹ ءِ سرجم کنگ ءَ ھاسیں کرد پیلو کت کنت۔ آئی ءَ گوشت کہ پاکستان ایران ءِ آزاد بیپاری معاہدہ ءَ را گڈی رنگ ءَ داتگ، معاہدہ ءَ چہ دو نیمگی تجارت ءِ تہ ءَ گیشی کیت۔ آئی ءَ گوشت کہ بارٹر ٹریڈ ءِ زوت سر ءَ عمل کنگ ءُ نان ٹرن اوور ءِ رکاوٹ آناں ھلاس کنگ المی اِنت۔ وت مہ وتی تجارت ءِ دیمروئی ءِ ھوالگ ءَ آئی ءَ گوشت کہ دوئیں ملک آنی کسٹم ءِ کمک ءُ انفراسٹرکچر ءَ را گہتر کنگ بیت۔ وزیر تجارت ءَ گوشت کہ کشت ءُ کشاری، کان کنی ءُ توانائی ءِ پڑ ءَ دو نیمگی کمک ءِ واستہ مزنیں گنجائش است انت، حکومت سرمایہ کاری ءِ واستہ آسراتی دیگ ءَ انت، ما ایرانی کمپنی آناں پاکستان ءَ وش اتک کن ایں ۔ جام کمال خان ءَ ایران ءِ کاروباری ءُ صنعتی براتی ءَ را ھم یکجائی منصوبگ آنی تہ ءَ شریک بوھگ ءِ دعوت داتگ۔ جام کمال خان ءَ گوشت کہ اے دیوان دوستی ءِ نشان انت، ایرانی صنعت کار پاکستان ءَ استیں سرمایہ کاری ءِ موہ آں چہ پائدگ چست بہ کن انت، اے پاک ایران بیپاری ءِ نوکیں دور ءِ بندات بیت۔ وفاقی وزیر برائے تجارت ءَ کاروباری فورم ءَ ایران ءِ صدر ءِ بھر زوری ءِ سر ءَ منت واری ءِ درشان کنان ءَ بھر زوری ءَ را وش اتک کنان ءَ گوشت کہ زوت ایران ءَ یکجائی اقتصادی کمیشن ءِ دیوان گوانک جنگ بیت، یکجائی کمیشن ءِ وسیلگ ءَ تجارت ءَ را دیمروئی دیگ بیت۔ ایران ءِ وزیر تجارت محمد عطابک ءَ ھم بزنس فورم ءَ گشتانک دات۔ دوئیں ملک آنی مزن اگدہ دار آں پاک ایران بزنس فورم ءِ تہ ءَ بھر زوری کت، مراگش ءِ تہ ءَ نائب مزن وزیر ءُ دری کارانی وزیر جنین محمد اسحاق ڈار ءَ ھم بھر زوری کت۔