پاکستان ءُ ایران ءِ سیادی مشترکہ دود ءُ ربیدگ ءُ مذہب ءِ سرا بندوک انت، دوئیں ملک آنی سروکی ءَ دو نیمگی بیپار ءِ حجم ءَ را 10 ارب ڈالر ءِ ٹارگٹ ءَ سر کنگ ءِ جزم انت، مزن وزیر شہباز شریف ءَ ایران ءِ صدر ءِ گوما یکجائی پریس کانفرنس

اسلام آباد۔3اگست  (اے پی پی): مزن وزیر محمد شہباز شریف ءَ گوشت کہ پاکستان ءُ ایران ءِ سیادی یکجاھیں دود ءُ ربیدگ ءُ مذھب ءِ سر ءَ بندوک اَنت، پاکستان ءُ ایران ءِ سروکی ءَ اے جزم اِنت کہ آ وت مہ وتی بیپار ءِ کساس ءَ را زوت چہ زوت 10 ارب ڈالر ءِ ٹارگٹ ءَ سر بہ کن اَنت، پاکستان ایران ءِ ایٹمی پروگرام ءِ حمایت ءَ کنت پہ امن ءُ ایمنی ءِ مول ءُ مراداں، پاکستان ءُ ایران ءِ ھلاپ ءَ ناشرکاری ءِ ھلاپ ءَ زھرشانی کنگ نہ بیت۔ برداشت کتگ۔ مزن وزیر محمد شہباز شریف ءَ اے ھیالانی درشانی ایران ءِ صدر ڈاکٹر مسعود پزشکیان   ءِ ھمراھی ءَ یک شمبے ءِ روچ ءَ ادا یکجائی پریس کانفرنس ءِ ساھت ءَ کرتگ ءُ منّگ نامہ آنی پجاری ءِ موہ ءَ کت۔ مزن وزیر محمد شہباز شریف ءَ ایران ءِ صدر ڈاکٹر مسعود پزشکیان   ءُ پاکستان ءَ ایران ءِ سفیر ءُ آئی ءِ ڈل ءَ را وش آتک کنان ءَ گوشت کہ مئے براتی ءُ دوستیں ملک ءِ صدر اولی رند ءَ صدر ءِ بستار ءَ پاکستان ءِ تر ءُ تاب ءَ انت ءُ آ آیوکیں وھد ءَ ھم آ تر ءُ تاب ءَ کنت۔ آئی ءَ گوشت کہ دو نیمگی گند ءُ نند آنی ساھت ءَ براتی، وت مہ وتی سیادی، مذہبی، دود ءُ ربیدگی ءُ جغرافیائی پڑ آنی تہ ءَ ھوار سرجمیں گپ ءُ تران بوتگ۔ آئی ءَ گوشت کہ ایران ءِ صدر ءَ پاکستان ءِ واستہ جوزہ است انت۔ آئی ءَ گوشت کہ اسرائیل ءَ جون ءَ بید ءِ ھچ وڑیں ٹھوس ثبوت ءَ ایران ءِ سر ءَ زوراکی بندات کت گڈا پاکستان ءِ الس ءُ حکومت ءَ ایشی ءِ سک مذمت کت۔ آئی ءَ گوشت کہ اے جنگ ءِ ھچ وڑیں جواز نیست۔ مزن وزیر ءَ پاکستان ءِ حکومت ءُ الس ءِ نیمگ ءَ جنگ ءِ تہ ءَ ایرانی زانتکار ، جنرل ءُ دگہ شھید آنی واستہ معاف کنگ ءُ ٹپی آنی زوت جان سلامتی ءِ واستہ دعا کت ءُ گوشت کہ سروک آیت اللہ خامنہ ای ءِ دلیر ءُ زانتکاریں سروکی ءِ چیر دستی ءَ ایران ءِ جنگی لشکر ءُ راج ءَ را جنگ ءِ تہ ءَ بدیں دفاع کتگ۔ ایران ءِ میزائلانی بارش ءَ چہ کشگ بوتگ۔ آئی ءَ گیش گوشت کہ جنگ ءِ وھد ءَ ایران ءِ الس ءُ سرکار ءَ وتی حاکمیت ءُ ایمنی ءِ سر ءَ زبردستی ءَ دفاع کتگ۔ مزن وزیر ءَ گوشت کہ پاکستان ءِ یک اصولی پست ءِ است انت کہ اقوام متحدہ ءِ منشور ءِ رد ءَ آئی ءَ را ایمنی ءِ مکسد آنی واستہ ایٹمی طاقت ءِ سرجمی ءَ ھک است انت۔ منی گمان اِنت کہ اے درگت ءَ پاکستان ایران ءِ اصولی لیکہ ءِ گوما اوشتاتگ۔ مزن وزیر ءَ گیش گوشت کہ مرچی بازیں منّگ ءُ مفاہمت نامہ ءِ سر ءَ دستخط کنگ بوتگ ۔ منی دعا اِنت کہ اے مفاہمت نامہ زوت معاہدہ ءِ تہا بدل کنگ بہ بنت ءُ مئے دو نیمگی تجارت زوتاں چہ زوت 10ارب ڈالر ءَ سر بہ بیت۔ اے درگت ءَ مئے ڈل گپ ءَ دیم ءَ برنت۔ آئی ءَ گوشت کہ ناشرکاری ءِ حلاف ءَ پاکستان ءُ ایران یکیں پگر ءِ انت۔ ہچ وڑیں ناشرکاری برداشت کنگ نہ بیت۔ ما ناشرکاری ءِ ھلاپ ءَ سرجمیں کمک ءَ را دل یکیمی کن ایں تانکہ سداں کلومیٹر ءِ سیمسر پچ بہ بنت تانکہ دمگ ءَ امن ءُ دیمروئی ءِ شاہراہ پچ بہ بنت تانکہ ناشرکاری پہ ابد ھلاس کنگ بہ بیت۔ مزن وزیر محمد شہباز شریف ءَ ایران ءِ سروک آیت اللہ خامنہ ای ءُ ایران ءِ صدر ءَ را شگر ءُ منت گپت ءُ گوشت کہ پاکستان ءَ مدام غزہ ءُ فلسطین ءِ اُلس ءِ واستہ وتی توار چست کتگ۔ گوستگیں روچاں نائب مزن وزیر ءَ اقوام متحدہ ءَ اے درگت ءَ پاکستان ءِ موقف پیش کتگ۔ آئی ءَ گوشت کہ ھمک دمان ءَ بے گناھیں مردم سارت کنگ بوگ ءَ انت، کوچگ پیر، زالبول ءُ ورنا آنی ھوناں چہ سُھر انت۔ چہ ایشی ءَ گیشتر زالمیں گپ ایش انت کہ آ آپ، ورگ ءُ دوا ءِ راہ ءَ بند کنگ ءَ گوں گُرس ءَ کشگ ءَ مجبور بوتگ انت۔ اے ندارگانی چارگ ءِ ہمت نہ بیت۔ مزن وزیر ءَ گوشت کہ غزہ ءِ ھوالگ ءَ سرجمیں دُگنیا یکوئی ءَ گپ بہ جنت۔ امن ءِ قیام ءِ ھاترا میان استمانی براتی ءَ وتی توانائی کارمرز کنگی انت اگاں نہ راجدپتر مارا معاف نہ کنت۔ ناجائزیں مقبوضہ جموں ءُ کشمیر ءِ جاور ھال آنی حوالہ ءَ مزن وزیر محمد شہباز شریف ءَ گوشت کہ سرجمیں درہ بے گناھیں کشمیری آنی ھون ءَ گوں رژناہ اِنت، کشمیری آں ھم آجوئی ءِ ھک ھست ءُ ایشی ءِ ھست نہ بوھگ ءَ آھانی آجوئی سرجم نہ بیت، پاکستان ءَ ھم اے درگت ءَ وتی توار چست کتگ ءُ ما اے گپ ءَ را دیم ءَ برگ ءَ اِنت۔ مدام کشمیری آنی حق آنی واستہ وتی توار چست کتگ۔ مزن وزیر ءَ سعدی شیرازی ءِ لچہ ھم حوالہ داتگ اَنت کہ آئی ءِ تہ ءَ گوشگ بوتگ کہ شریں ساھت ءَ ھرکس سنگت اِنت ءُ دوستی ءِ دعویٰ کنت بلے دوست ھما اِنت کہ ھرابیں ساھت ءَ سنگت ءِ دست ءَ بہ دار ایت ۔ اے موہ ءِ سر ءَ تران کنان ءَ ایران ءِ صدر ڈاکٹر مسعود پزشکیان   ءَ قرآن ءِ آیاتانی حوالہ دات ءُ گوشت کہ مئے دوست ءُ ھمساھگیں ملک پاکستان مئے دومی گس انت۔ مزن وزیر محمد شہباز شریف ءُ حکومت ءِ نیمگ ءَ چہ جوانیں مہمان داری ءِ سر ءَ شگر ءُ منت واری ءِ درشان کنان ءَ آئی ءَ گوشت کہ پاکستان ءِ حکومت، پارلیمنٹ ءُ الس ءَ ایران ءِ سر ءَ امریکی ءُ اسرائیل ءِ زوراکی ءِ ھلاپ ءَ مھکمیں موقف زرتگ ءُ مئے کمک کتگ، ایشی ءِ واستہ ما منت وار ایں ۔ آئی ءَ گوشت کہ مشرق ءِ شاعر علامہ اقبال ءَ ھم وتی لچہانی تہ ءَ تپاکی ءُ براتی ءِ سکین داتگ ءُ اسلامی قوم ءَ را یکوئی ءِ نام داتگ۔ آئی ءَ گوشت کہ مئے دوستی ءِ سیادی گہتریں راجدپتری ءُ ثقافتی سیادی ءَ گوں بندوک انت۔ آئی ءَ گوشت کہ مئے پیغمبر ءَ ھم مذھب ءِ بنیات ءَ تپاکی ءِ درس داتگ ات ءُ داں ما تپاک بہ باں مئے حاکمیت سلامت مان ایت۔ ایران ءِ صدر ڈاکٹر مسعود پزشکیان   ءَ گشتگ کہ ایران پاکستان ءَ نہ ایوک ءَ وتی ہمساہگ لیکیت بلکیں وتی برات ہم لیکیت۔ آئی ءَ گوشت کہ وت مہ وتی سیادی ءُ کمک ءَ را گیش گیش کنگ ءَ ما وت مہ وتی تجارت ءَ را 3ارب ڈالر ءَ چہ 10ارب ڈالر ءِ ٹارگٹ ءَ سر کنگ ءَ سک زوت کت کن ایں ۔ مرچی ما سیاست، دود ءُ ربیدگ ءُ دگہ پڑاں یکے دومی ءِ کمک ءَ را گیش کنگ ءِ ھاترا یکجائی دستاویزات ءِ سر ءَ دستخط کتگ کہ ایشی ءَ چہ ٹرانسپورٹ، سائنس ءُ ٹیکنالوجی، دود ءُ ربیدگ، سیل ءُ سواد ءُ کاروباری شوبگ آنی دیمروئی ءَ کمک رسیت۔ آئی ءَ گوشت کہ اے ھاسیں معاہدگ آنی سر ءَ عمل کنگ ءَ را دل یکیمی کنگ ءِ واستہ ما وت مہ وتی سیادی آناں دیمروئی دیگ ءِ واستہ جزمیگ آں۔ ایران ءِ صدر ءَ گوشت کہ ٹرانزٹ تجارتی راہداری، ریل، سڑک ءُ دریائی راہ آنی دیمروئی، سیمسر ءِ بازار آنی دیمروئی، ءُ یکجائی آزاد اقتصادی زون آنی جوڑ کنگ مئے واستہ انتہائی المی انت کہ ایشی ءَ چہ دوئیں ملک آنی نیام ءَ سیادی آناں مھکم ءُ گیش کنگ بیت۔ آئی ءَ گیش کرتگ کہ سرحدی دمگ آنی تہ ءَ ناشرکار آنی نیمگ ءَ چہ ھترہ آنی رد ءَ دوئیں ملک آنی اُلس ءِ رکھینگ ءِ واستہ یکے دومی ءِ گامگیج المی اِنت۔ ایران ءِ صدر ءَ گوشت کہ دوئیں ملک آنی تہ ءَ دمگی ءُ جہانی جیڈھ آنی سر ءَ یکجائی لیکہ است انت ءُ اقتصادی سیادی آنی دیمروئی ءَ چہ دیمروئی ءُ وشھالی دل یکیمی بوت کنت۔ آئی ءَ فلسطین، لبنان ءُ شام ءَ انسانی ھکانی لگتمالی ءِ اسرائیل ءِ کارروائی سک باز مذمت کتگ ءُ گْوشتگ کہ اسرائیل نسل کشی ءِ کارانی گناہ گار اِنت۔ آئی ءَ زوت جنگ بندی ءِ لوٹ کتگ ءُ گوشت کہ پاکستان ءُ ایران ءِ ھیال انت کہ دمگی ءُ جھان ءِ تک ءَ وت مہ وتی کمک ءَ را دیم ءَ برگ ءَ چہ توسیپ پسندیں عزائم آناں گر ءُ دار کنگ بیت تانکہ دمگ ءَ ایمنی ءُ برجائی دل یکیمی کنگ بہ بیت۔ آئی ءَ گیش گوشت کہ اسرائیل ءِ زوراکی ءِ ھلاسی ءِ واستہ دمگی ءُ جھان ءِ کمک ءِ ضلورت اِنت۔ اقوام متحدہ ءِ سلامتی کونسل دو رہبنداں یلہ بہ کنت ءُ تجاوزات ءِ ھلاسی ءَ را دل یکیمی بہ کنت۔ اقوام متحدہ ءِ جامع کرد ءِ ضلورت انت تانکہ باسکیں ملک آنی حاکمیت ءَ را دل یکیمی کنگ بہ بیت۔ وتی کلوہ ءِ گڈ ءَ آئی ءَ یک رندے پدا مہمان داری ءِ سر ءَ وتی شگر ءُ منت واری درشان کت ءُ مزن وزیر محمد شہباز شریف ءَ را ایران ءِ تر ءُ تاب ءِ دعوت دات تانکہ وت مہ وتی سیادی ءَ را دیمروئی دیگ ءِ عمل ءَ را گیش گہتر بہ کنت۔ ایشی ءَ چہ پیسر پاکستان ءُ ایران ءِ نیام ءَ جتاجتائیں معاہدگ ءُ مفاہمت نامہ ءِ مٹ ءُ بدلی کنگ بوتگ، اے درگت ءَ ایران ءِ صدر ڈاکٹر مسعود پزشکیان   ءِ پاکستان ءِ تر ءُ تاب ءِ موہ ءَ مزن وزیر گس ءَ ھاسیں مراگش ءِ برجائی کنگ بوتگ۔ مراگش ءَ مزن وزیر محمد شہباز شریف ءُ ایران ءِ صدر ڈاکٹر مسعود پزشکیان   ءَ ھم اے مراگش ءَ بہر زرتگ ات۔ اے موہ ءِ سر ءَ کل 12 دستاویزات ءِ تبادلہ کنگ بوتگ کہ ایشی ءِ تہ ءَ مستریں دستاویز پلانٹ پروٹیکشن ءُ پلانٹ قرنطینہ ءِ معاہدہ بوتگ۔ ایران ءِ معدنیات، صنعت ءُ تجارت ءِ وزیر محمد عطابک ءُ وفاقی وزیر ءِ راجی وردن ءُ وراک ءِ سلامتی ءُ پٹ ءُ پول رانا تنویر حسین ءَ کاگد ءِ بدلی کتگ۔ پاکستان ءُ ایران ءِ نیام ءَ ایران ءِ درئی کارانی وزیر سید عباس اراقچی ءُ ھزانگ ءِ وزیر بلال اظہر ءِ نیمگ ءَ میرجاوی تفتان بارڈر گیٹ ءِ وت مہ وتی کارمردی ءِ ھوالگ ءَ معاہدے ءِ ھوالگ ءَ کاگد مٹ ءُ بدلی کنگ بوت۔ اے موہ ءِ سر ءَ پاکستان ءَ ایران ءِ سفیر رضا امیری  مقدم  ءُ سائنس ءُ ٹیکنالوجی ءِ وفاقی وزیر خالد حسین مگسی ءِ نیمگ ءَ ایران ءِ پردیز ٹیکنالوجی پارک ءُ پاکستان کونسل آف سائنسی ءُ انڈسٹریل ریسرچ ءِ نیام ءَ سائنس، ٹیکنالوجی ءُ انوویشن ءِ پڑ ءَ کمک ءِ واستہ مفاہمت نامہ ءِ دستاویز آنی مٹ ءُ بدلی کنگ بوت۔ ایشی ءَ ابید ایران ءِ معدنیات، صنعت ءُ تجارت ءِ وزیر محمد عطابک ءُ آئی ٹی ءِ وفاقی وزیر شزہ   فاطمہ خواجہ ءِ نیام ءَ انفارمیشن ءُ کمیونیکیشن ٹیکنالوجی ءِ پڑ ءَ کمک ءِ واستہ مفاہمت نامہ ءِ دستاویزات ءِ تبادلہ کنگ بوتگ۔ ھمے رنگ ءَ دود ءُ ربیدگ ءُ راجی ورثہ ءِ وفاقی وزیر محمد اورنگزیب خان کھیچی   ءُ ایران ءِ درئی کارانی وزیر اورنگزی سیید ءِ نیمگ ءَ دود ءُ ربیدگ ءُ آرٹ، سیل ءُ سواد، سائنس، وانگ ءُ زانگ، ٹیکنالوجی، جان سلامتی ءُ ھاندان ءِ کار، رسانکدر ءُ کھیڈ آنی پڑ ءَ دو نیمگی کمک ءِ دیمروئی ءِ واستہ یک تبادلہ پروگرام ءِ واستہ دستاویزات ءِ تبادلہ کنگ بوتگ۔ پاکستان ءُ ایران ءِ موسمیاتی ادارگ آنی نیام ءَ وت مہ وتی کمک ءِ ھوالگ ءَ مفاہمت نامہ ءِ کاگد آنی تہ ءَ وفاقی وزیر دفاع خواجہ محمد آصف ءُ ایران ءِ وزیر محمد عطابک ءِ نیمگ ءَ مفاہمت نامہ ءِ مذاکرات ءِ مٹ ءُ بدلی کنگ بوت۔ دریائی ایمنی ءُ آتشزدگی ءِ ھوالگ ءَ مفاہمت نامہ ءِ کاگد ایران ءِ سڑک ءُ شہری دیمروئی ءِ وزیر فرزانہ صادق ءُ دریائی کارانی وفاقی وزیر جنید انور چوہدری ءَ تبادلہ کتگ۔ مراگش ءِ ساھت ءَ مجرمانہ معاملات آنی تہ ءَ عدلیہ ءِ کمک ءِ ھوالگ ءَ مفاہمت نامہ ءِ کاگد ھم مبادلہ کنگ بوت اَنت ءُ کاگد آنی تہ ءَ وزیر مملکت طلال چوہدری ءُ ایران ءِ درئی کار آنی وزیر سید عباس اراقچی ءِ نیمگ ءَ مفاہمت نامہ ءِ مٹ ءُ بدلی کنگ بوت۔ ھمے رنگ ءَ وزارت دفاع ءِ سیکرٹری لیفٹیننٹ جنرل (ریٹائرڈ) محمد علی ءُ ایران ءِ سڑک ءُ شہری دیمروئی ءِ وزیر فرزانہ صادق ءَ تپاک نامہ یک ءُ دگر ءُ دات ۔ ایشی ءَ ابید پاکستان ءُ ایران ءَ وفاقی وزیر سائنس ءُ ٹیکنالوجی خالد حسین مگسی ءُ پاکستان ءَ ایران ءِ سفیر رضا امیری مقادم ءِ نیمگ ءَ چہ پیداوار ءِ رجسٹریشن، انسپکشن، ٹیسٹنگ ءُ دگہ ھوالگ ءَ ایران ءِ نیشنل اسٹینڈرڈز آرگنائزیشن ءُ پاکستان اسٹینڈرڈز اینڈ کوالٹی کنٹرول اتھارٹی ءِ نیام ءَ مفاہمت نامہ ءِ سر ءَ عمل کنگ ءِ ھوالگ ءَ دستاویزات ءِ تبادلہ کتگ۔ مزن وزیر ءِ سیاسی کار ءُ بین صوبائی رابطہ کاری ءِ مشیر رانا ثنا اللہ خان ءُ ایران ءِ وزیر فرزانہ صادق ءَ 2025-2027 ءِ سال آنی تہ ءَ سیل ءُ سواد ءِ شوبگ ءَ وت مہ وتی کمک ءِ سر ءَ عمل درآمد ءِ ھوالگ ءَ دستاویز آنی مبادلہ کت۔ مراگش ءِ گڈ ءَ وفاقی وزیر تجارت جام کمال خان ءُ ایران ءِ وزیر محمد عطابک ءِ نیمگ ءَ آزاد تجارت ءِ معاہدے ءِ ھوالگ ءَ بین وزارتی بیان ءِ سر ءَ دستاویزات ءِ مبادلہ کنگ بوت۔