معاون مزن وزیر ءُ وزیر ءِ درئی کار سینیٹر محمد اسحاق ڈار ءَ جمہوریہ اسلامی ایران ءِ صدر ءَ گوں گند ءُ نند کت، دو نیمگی کمک ءَ را گیش کنگ ءِ جزم ءِ درشان

اسلام آباد۔3اگست  (اے پی پی): معاون مزن وزیر ءُ دری کارانی وزیر سینیٹر  محمد اسحاق ڈار ءَ جمہوریہ اسلامی ایران ءِ صدر ءَ گوں گند ءُ نند کتگ۔ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ اے گند ءُ نند یک شمبے ءِ روچ ءَ اسلامی جمہوریہ ایران ءِ صدر ڈاکٹر مسعود پزشکیان  ءِ پاکستان ءِ دو روچی تر ءُ تاب ءِ ساھت ءَ بوتگ۔ ایران ءِ صدر ءِ پجارینگ ءِ وھد ءَ نائب مزن وزیر ءُ دری کارانی وزیر ءَ پاکستان ءِ ایران ءِ گوما وتی دوستی ءُ برات ءِ سیادی ءِ سر ءَ گہتریں جزم ءِ سر ءَ زور پر دات ءُ یکجائی راجدپتر ، یکجائی دود ءُ ربیدگی ورثہ ، سیادی ءُ یکوئی ءِ احترام ءِ مھکمیں بنیات آنی سر ءَ زور پر دات۔ صدر مسعود پزشکیان  ءَ پاکستان ءِ کمک ءَ را ساڑات ءُ یکجائی مفاد ءِ جتا جتائیں شوبگ آنی تہ ءَ دو نیمگی کمک ءَ را گیش کنگ ءِ واستہ ایران ءِ جزم ءِ سر ءَ زور پر دات۔ آئی ءَ دوئیں دوستیں ملک آنی نیام ءَ چاگردی ءُ اقتصادی سیادی آناں گیش مھکم کنگ ءِ واستہ پاکستانی سروک آنی گوما بامردیں گپ ءُ تران کنگ ءِ ضلورت ءِ ھم ذکر کتگ۔