پاکستان ءُ ایران ءَ تجارت ءِ وزیر آنی مزن تک ءِ گند ءُ نند ءَ بیپار ءُ سیمسر کمک ءِ دیمروئی ءِ سر ءَ تپاک کتگ

اسلام آباد۔3اگست  (اے پی پی): پاکستان ءُ ایران ءِ نیام ءَ دو نیمگی اقتصادی کمک ءَ را دیمروئی دیگ ءِ واستہ تجارت، سیمسر ءُ وت مہ وتی بھروسہ ءِ بنیاد ءَ شریکداری ءَ را گیش پراھی کنگ ءِ سر ءَ تپاک کنگ بوتگ۔ وفاقی وزیر تجارت جام کمال خان ءَ اسلام آباد ءَ ایران ءِ صنعت، کان کنی ءُ تجارت ءِ وزیر محمد عطابک ءَ گوں گند ءُ نند ءِ ساھت ءَ تجارت ءُ سیم سر ءِ کمک ءَ را دیمروئی دیگ ءِ سر ءَ تپاک کتگ۔ دوئیں وزیرانی گند ءُ نند ایران ءِ صدر ڈاکٹر مسعود پزشکیان     ءِ دو روچی پاکستان ءِ سرکاری تر ءُ تاب ءِ موہ ءَ بوتگ۔ وزارت تجارت ءِ رد ءَ مزن تک ءِ گپ ءُ تران ءَ دوئیں وزیر آں تجارت ءِ دیمروئی، سیم سر ءِ بندش آنی ھلاسی ءُ جتاجتائیں شوبگ آنی تہ ءَ معتبریں کمک ءِ نوکیں راہ آنی جوڑ کنگ ءِ سر ءَ زور پر داتگ۔ ایران ءِ وزیر محمد عتابک ءَ پاکستانی حکومت ءُ وزارت تجارت ءِ فعالیں کرد ساڑات ءُ گوشت کہ اگاں شما وتی نیمگ ءَ ترندی ءُ سنگینیں کوشست مہ کتیں گڈا ما اے جاہ ءَ سر نہ بوتگ اتیں ۔ اے المی انت کہ اے پیشرفت منظم بہ بیت ءُ ایشی ءِ آسر ءَ را تجارتی ڈھانچہ ءِ تہا ڈھالگ بہ بیت۔ وفاقی وزیر جام کمال خان ءَ ھم ھمے جزبگ ءِ درشانی کت ءُ گوشت کہ حکومت ءُ جندی دوئیں پڑ آنی تہ ءَ مزنیں جزم ءُ جزبگ است انت۔ سفارتی پڑ ءَ یک انچیں ساھتے کیت کہ آہن گرم بیت ءُ اے ہما ساھت اِنت کہ مارا زوت گامگیج زورگ لوٹیت پرچا کہ معاملہ ءِ دیر کنگ ءَ معاملہ گیشتر پیچیدہ بنت۔ آئی ءَ اے گپ ءِ سر ءَ زور پر دات کہ ایوک ءَ جذبہ ءُ سیاسی جزم ءِ پد ءَ باقاعدہ گامگیج چست کنگ بنت ءُ پاکستان یکجائی اقتصادی کمیشن، بزنس ٹو بزنس گند ءُ نند ءُ شعبہ جاتی تجارتی ڈل آنی وسیلگ ءَ ایران ءِ گوما اقتصادی سیادی ءَ را گیش مھکم کنگ ءِ واھشت مند اِنت۔ دوئیں وزیراں کشت ءُ کشاری، لائیو سٹاک، سروسز، توانائی ءُ سرحد ءِ سرا رسد ءِ سر ءَ زور پر دات کہ اے ھاسیں شوبگ اَنت۔ آئی ءَ گوشت کہ اے شوبگ وت مہ وتی کمک ءَ را دیمروئی دیگ ءَ ھاسیں کرد ءَ پیلو کن اَنت۔ جام کمال خان ءَ سوج دات کہ وفاقی ءُ صوبائی چیمبر آف کامرس اینڈ انڈسٹری ءِ نمائندگ آنی سر ءَ ھواریں مرکوزیں تجارتی ڈل جوڑ کنگ بہ بنت تانکہ مارکیٹ ءِ رسائی ءُ رھبند ءُ رھبند آنی سر ءَ سرجمیں گپ ءُ تران کنگ بہ بیت۔ آئی ءَ گوشت کہ ما اے ماڈل ءَ را بیلاروس ءَ ھوار بازیں ملک آنی تہ ءَ سوبمندیں رنگ ءَ آزمائش کتگ ءُ ایران ءِ گوما ممکنہ شوبگ آنی تہ ءَ وت مہ وتی کمک ءَ را گیش کنگ لوٹ ایت تانکہ دو نیمگی سیادی آنی دیمروئی ءَ چہ راستیں نپ درست بہ بنت۔ دوئیں وزیر آنی نیام ءَ استیں تجارتی راہداری ءُ سیمسر آنی آسراتی آناں گیش کارمرد کنگ ءِ سر ءَ ھم تپاک کنگ بوتگ۔ جام کمال خان ءَ دمگی تجارت ءِ ارزشت ءِ سر ءَ زور پر دیان ءَ گوشت کہ آسیان ءِ ملک آناں وتی ھمساھگیں ملک آنی گوما تجارت ءِ وسیلگ ءَ چون پیشرفت کتگ۔ آئی ءَ گوشت کہ جغرافیہ نعمت اِنت، پاکستان ءُ ایران شارٹ ڈسٹنس ءِ برتری ءَ کارمرد بہ کن اَنت، اگاں ما اے موہ ءَ چہ زبہر بہ بئیں گڈا وھد ءُ ھرچ دوئیں ءِ تاوان بیت۔ آئی ءَ پیش گوئی کتگ کہ اگاں دوئیں ملک وتی توانائی ءَ را سرجمی ءَ کارمرد بہ کن اَنت گڈا آیوکیں لھتیں سال آنی تہ ءَ باہمی تجارت سالانہ 5 ءَ چہ 8ارب ڈالر ءَ سر بوت کنت۔ آئی ءَ گیش گوشت کہ ایران ءُ پاکستان ءِ تجارتی شریکداری ترکی، میان اُستمانی ایشیا، روس ءُ میاں اوستمانی تک ءَ دیم ءَ شُت کنت ءُ یک مزنیں ءُ زوراکیں دمگی تجارتی بلاک ءِ تہ ءَ بدل بوت کنت۔ ایران ءِ وزیر محمد عطابک ءَ ہر مزن تک ءِ تر ءُ تاب ءِ وھد ءَ ھاسیں بی ٹو بی روچ ءِ ایر کنگ ءِ تجویز ءِ حمایت کنان ءَ گوشت کہ ما ایران ءَ چہ کاروباری ڈل آناں پاکستان ءَ آرگ ءِ واستہ تیار ایں ۔ آئی ءَ پاکستانی برآمدات ءِ تہ ءَ گیشی ءِ واستہ برجاھیں گپ ءُ تران ءِ ذکر کت ءُ دوئیں حکومت آنی سر ءَ زور پر دات کہ نوکیں منوگری آناں زوتاں چہ زوت عمل کنگ بہ بیت۔ آئی ءَ گیش گوشت کہ دوئیں ملک آنی تاجر ءُ صنعت کار دوست انت، آ یکے دومی ءِ سر ءَ بھروسہ کن انت ءُ آھاں بس مئے نیمگ ءَ چہ یک ھاسیں ءُ برجاھیں آسراتی ءِ نظام ءِ ضلورت انت۔ گپ ءُ تران ءِ ساھت ءَ دوئیں راہشوناں اے گپ ءِ سر ءَ ھم زور پر دات کہ پاکستان ءُ ایران ءِ الس ءِ دود ءُ ربیدگی ءُ زبانی یکوئی دو نیمگی سیادی ءِ بُن ھشت اِنت۔ جام کمال خان ءَ اسپیشل اکنامک فری زون ءِ سی ای او ءِ گوما انوگیں گند ءُ نند ءِ حوالہ ءَ گشتگ کہ آئی ءَ بلوچی زبان ءَ گپ جتگ کہ ایشی ءَ چہ دوئیں ملکانی جہلیں سیادی ءِ درانگازی انت۔ آئی ءَ گوشت کہ ایشی تہنا بیپار ءِ گپ نہ اِنت بلکینگ ءَ مردم ءِ سیادی ءِ گپ اِنت۔ مئے تاجر آنی نیام ءَ واقفیت ءُ اعتماد پائیدار معاشی انضمام ءِ ھاتر ءَ مھکمیں بُن ھشت جوڑ بوت کنت۔ گند ءُ نند ءِ گڈسرا دوئیں وزیراں پاکستان ءِ منت واری ءِ درشانی کت۔ ایران ءَ زوتاں چہ زوت یکجائی اقتصادی کمیشن ءِ آیوکیں دیوان ءِ دعوت دیگ ءِ سرا تپاک کتگ ءُ سرکاری ءُ نجی شعبہ ءِ ھوار بوھگ ءَ را گیش کنگ ءُ سرحد ءِ سرا کمک ءُ تجارتی رسد ءَ را اولیت دیگ ءِ سرا تپاک کتگ۔ دیوان ءِ عمومی بنگپ ایش ات کہ “نوں کار ءِ وھد اِنت۔” پاکستان ءُ ایران مزن تک ءِ ھمگرنچی ءُ وت مہ وتی بھروسہ ءِ گوما اسٹریٹجک اقتصادی شریکداری ءِ نوکیں دور ءَ داخل بوھگ ءِ واستہ تیار اَنت کہ سرجمیں دمگ ءِ تجارتی ندارگ ءَ را بدل کت کنت۔