درملکی مسافر آنی آسراتی ءِ واستہ ملک ءِ توامیں میان استمانی بالی پٹ آنی سر ءَ جتا جتائیں امیگریشن کاؤنٹر جوڑ کنگ ءِ پیسلہ

اسلام آباد۔2اگست  (اے پی پی):مزن وزیر محمد شہباز شریف ءِ ہدایت ءِ سرا دری مسافر آنی آسراتی ءِ واستہ ملک ءِ توامیں میاں اوستمانی بالی پٹ آنی سر ءَ جتا جتائیں امیگریشن کاؤنٹر جوڑ کنگ ءِ پیسلہ کنگ بوتگ۔ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اے گامگیج پاکستان ءَ سیل ءُ سواد ءِ دیمروئی، تجارتی چست ءُ ایر آنی برجائی ءُ درملکی سرمایہ کاری ءَ را گیش آسراتی پجاری ءِ ھاتر ءَ چست کنگ بوتگ۔ اے کاؤنٹر آنی جوڑ کنگ ءَ چہ بالی پٹ آنی سر ءَ امیگریشن ءِ کارروائی ءِ وھد کم بیت۔ کاؤنٹر آنی جتا کنگ ءِ سبب ءَ وتی ملک ءَ واتر بوھوکیں پاکستانی ھم اے گامگیج ءِ سبب ءَ کمیں وھد ءَ امیگریشن ءِ کار ءَ سرجم کن اَنت۔ حکومت ءِ اے گامگیج پاکستان ءَ را میاں اوستمانی سیل ءُ سواد، سرمایہ کار ءُ کاروباری ڈل آنی واستہ گیش دلکش ءُ دوست جوڑ کنگ ءِ حکمت عملی ءِ بھر اِنت۔