ایران ءِ صدر ءِ پاکستان ءِ تر ءُ تاب ءَ چہ پاک ایران ءِ نیام ءَ سیادی، بیپار، سرمایہ کاری ءُ سیمسر ءِ کمک ءَ را گیش ءُ گیوار بیت، عطا اللہ تارڑ

اسلام آباد۔2اگست  (اے پی پی):وفاقی وزیر ءِ اطلاعات ءُ شنگکاری عطا اللہ تارڑ ءَ ایران ءِ صدر مسعود پیزیشکیان ءِ پاکستان ءِ تر ءُ تاب ءَ را پاک ایران ءِ نیام ءَ سیادی ، بیپار ، سرمایہ کاری ءُ سیم سر ءِ کمک ءِ دیمروئی ءِ واستہ سک باز المی لیک اتگ ءُ گوشت کہ ایران ءِ دارالحکومت ءِ صدر ءِ وش آتک کنگ ءِ واستہ درستیں بندوبست سرجم کنگ بوتگ انت۔ اسلام آباد ءَ وشحالی ءُ وش اتک جوڑ کنگ بوتگ، اے تر ءُ تاب ءَ چہ دو نیمگی سیادی گیش مھکم بنت۔ شمبے ءِ روچ ءَ ادا میڈیا ءَ گوں تران کنان ءَ وفاقی وزیر ءِ اھوالکاری ءَ گوشت کہ ایران ءِ صدر مسعود پیششکیان ءِ وش آتک کنگ ءِ تیاری سرجم انت، چیف کمشنر اسلام آباد ھم بندوبست آنی سر ءَ چار ءُ تپاسی ءِ واستہ ادا انت، وھدیکہ سرجمیں روٹ ءَ را پاکستان ءُ ایران ءِ راجی بیرک آنی گوما جوانیں رنگ ءَ آراستہ کنگ بوتگ۔ آئی ءَ گوشت کہ شرپداریں مہمان ءِ آیگ ءِ واستہ وفاقی دارالحکومت ءَ را ھاسیں رنگ ءَ آرائش کنگ بوتگ، وھدیکہ پاکستان ءُ ایران ءِ سروکی ءِ عکس ھم نامداریں جاھاں ایر کنگ بوتگ انت، اسلام آباد ءَ وشی ءُ وش اتک ءِ چاگرد راجی انت۔ آئی ءَ گوشت کہ ایران ءِ صدر مزن وزیر محمد شہباز شریف ءِ دعوت ءِ پد ءَ پاکستان ءِ تر ءُ تاب ءَ انت ایشی ءَ چہ دو نیمگی سیادی گیش مھکم بنت۔ ایشی ءَ چہ پیسر دوئیں رہشوناں آذربائیجان ءَ ھم گند ءُ نند کتگ ات وھدے کہ مزن وزیر شہباز شریف ءِ ایران ءِ تر ءُ تاب ھم سوبمند بوتگ ات کہ ایشی ءِ تہ ءَ فیلڈ مارشل عاصم منیر ھم آئی ءِ ھمراھی ءَ بوتگ ات۔ وفاقی وزیر ءَ گوشت کہ اے تر ءُ تاب بیپار، سرمایہ کاری ءُ پاک ایران ءِ سیادی آنی دیمروئی ءِ واستہ سک باز ارزشتی اِنت، پاکستانی راج ایران ءِ صدر ءَ را گرمیں رنگ ءَ وش اتک کنت۔ آئی ءَ گوشت کہ ایران ءِ صدر باندا  دزگٹیں روچ  ءِ  گوازین ایت، وت مہ وتی گند ءُ نند بیت، وھدیکہ آئی ءِ شرپ ءَ نان ءُ شپ ءِ ورگ ءِ میزبانی ھم کنگ بیت۔ یک جستے ءِ پسو ءَ آئی ءَ گوشت کہ ایران ءِ پیسریگیں صدر شھید ابراہیم رئیسی ءِ پاکستان ءِ تر ءُ تاب ءِ وھد ءَ بیپار ءُ دو نیمگی کمک ءِ سر ءَ سرجمی ءَ گپ ءُ تران کنگ بوتگ۔ ایران ءِ صدر ءِ انوگیں تر ءُ تاب ءِ وھد ءَ بازیں معاہدہ ءِ سر ءَ دستخط کنگ ءِ گمان اِنت۔ اے تر ءُ تاب ءِ ساھت ءَ بارڈر مارکیٹ آنی جوڑیشت، تجارتی کساس ءِ تہ ءَ گیشی ءُ جتاجتائیں شوبگ آنی تہ ءَ کمک ءِ دیمروئی ءِ بابت ءَ گپ ءُ تران کنگ بیت۔ آئی ءَ گوشت کہ ایران ءِ صدر ءِ اے تر ءُ تاب سک باز پائدگ مند ثابت بیت، ایشی ءَ چہ نہ ایوک ءَ بیپار ءُ سرمایہ کاری گیش بیت بلکینگ ءَ سیمسر ءُ ایمنی ءِ جیڈھ آنی سر ءَ یکجاھیں مارکیٹ آنی جوڑیشت ءِ سر ءَ ھم پیشرفت ءِ امیت انت۔