پاکستان ءُ ایران ءِ درئی کارانی وزیرانی گند ءُ نند، دو نیمگی سیادی ءَ را مھکم کنگ ءِ سر ءَ زور پر داتگ

اسلام آباد۔2اگست  (اے پی پی):پاکستان ءِ نائب مزن وزیرءُ درئی کارانی وزیر سینیٹر محمد اسحاق ڈار ءَ اسلام آباد ءَ ایران ءِ درئی کارانی وزیر سید عباس اراقچی ءَ گوں گند ءُ نند کتگ ءُ دوئیں رہشوناں پاکستان ءُ ایران ءِ سیادی ءَ را مھکم کنگ ءِ واستہ وتی جزم ءِ پدا پدر کتگ۔ دری کارانی کارگس ءِ جارکش ءِ نیمگ ءَ چہ شنگ بوتگیں بیان ءِ رد ءَ ایران ءِ دری کارانی وزیر ایران ءِ صدر ڈاکٹر مسعود پزیشکیان ءِ سروکی ءَ سرکاری تر ءُ تاب ءَ یک ڈل ءِ بھر اِنت۔ گند ءُ نند ءِ ساھت ءَ دوئیں رہشوناں پاکستان ءُ ایران ءِ سیادی ءَ را مھکم کنگ ءِ واستہ وتی جزم ءِ دوبر پدر کت، ایشی ءِ تہ ءَ دمگیبرجائی، تجارتیءُ اقتصادی کمک ءِ تہ ءَ گیشی ءِ سر ءَ ھاسیں دلگوشی دیگ بیت۔ وت مہ وتی دلچسپی ءِ کلیدی شوبگ آنی تہ ءَ دو نیمگی کمک ءَ را گیش کنگ ءِ ھوالگ ءَ ھم ھیال ریچی کت۔