ایران ءِ مزن تکی ڈل اسلام آباد چیمبر آف کامرس اینڈانڈسٹری ءِ تر ءُ تاب

اسلام آباد۔2اگست (اے پی پی): سپریم کونسل آف فری ٹریڈ، انڈسٹریل اینڈ سپیشل اکنامک زونز ءِ سیکرٹری رضا مسرور ءِ سروکی ءَ مزن تکی ایرانی ڈل ءَ شمبے ءِ روچ ءَ اسلام آباد چیمبر آف کامرس اینڈ انڈسٹری (آئی سی سی آئی) ءِ تر ءُ تاب کتگ ءُ ناصر منصور قریشی ءَ گوں دو براتیں ملک آنی نیام ءَ اقتصادی کمک آناں گیش جھلانک کنگ ءِ واستہ نوکیں کشک پٹ ءُ پول کنگ ءِ واستہ آسری گند ءُ نند کت۔ ایرانی ڈل ءَ چیمبر آف فری زون ءِ منیجنگ ڈائریکٹر محمد سعید اربابی، سعید ربیع، علی رضا خیامی، مس زہرہ قادیانلو، کمرشل کونسلر؛ آصف غیاث، منیجنگ ڈائریکٹر زینتھ؛ ءُ با فائزہ حسینی ھوار اتنت۔ آئی سی سی آئی ءِ نیمگ ءَ سینئر نائب صدر عبدالرحمان صدیقی، چیئرمین فاؤنڈر گروپ شیخ طارق صادق، ایگزیکٹو ممبران محمد عمران منہاس، وسیم چوہدری ءُ آئی سی سی آئی ءِ صدر ءِ مشیر نعیم صدیقی ءَ نماھندگی کت۔ دوئیں نیمگ ءَ تجارت، یکجائی منصوبگ، سرمایہ کاری ءُ صنعتی کمک ءِ دیمروئی ءِ سر ءَ تپاک کنگ بوتگ ءُ وت مہ وتی فائدگ مندیں اقتصادی گامگیج آنی ضلورت ءِ سر ءَ زور پر داتگ۔ رضا مسرور ءَ ایران ءِ آزاد تجارتی زون آنی ھاسیں رنگ ءَ چابهار فری زون ءِ مزنیں توانائی ءِ سر ءَ چمشانک دات ءُ پاکستانی کاروباری مردم آناں سرمایہ کاری ءِ موہ آناں پٹ ءُ پول کنگ ءِ واستہ تر ءُ تاب ءِ دعوت دات۔ آئی ءَ یکجائی نمائش ءُ کاروباری کمک ءِ آسراتی ءِ واستہ چابہار فری زون ءُ آئی سی سی آئی ءِ نیام ءَ یک مفاہمت نامہ ءِ وسیلگ ءَ شریکداری ءَ را رسمی کنگ ءِ سفارش کتگ۔ آئی سی سی آئی ءِ صدر ناصر منصور قریشی ءَ ڈل ءَ را وش آتک کنان ءَ پاکستان ءُ ایران ءِ نیام ءَ گہتریں سیادی ءِ سر ءَ زور پر دات ءُ دو نیمگی تجارت ءِ تہ ءَ گیشی ، یکجائی نمائش آنی برجم دارگ ءُ مردم آنی نیام ءَ ءُ کاروباری رابطہ آناں گیش کنگ ءِ سر ءَ زور پر دات۔ آئی ءَ گوشت کہ پاکستان ءِ دوائی، سرجیکل ءُ اسپورٹنگ سامان، معدنیات، گلابی نمک ءُ آئی ٹی سروسز ایران ءَ برآمد کنگ ءِ واستہ سک باز گنجائش ءِ واھند انت۔ آئی ءَ قدر ءِ گیشی، سرحد ءِ سرا تجارت ءُ دود ءُ ربیدگ ءِ تبادلہ ءِ ھاتر ءَ آئی سی سی آئی ءِ سرگرمیں رنگ ءَ کمک کنگ ءِ وعدہ کتگ۔ صدر قریشی ءَ ایران ءِ نیمگ ءَ را آئی سی سی آئی ءِ میاں اوستمانی صنعتی نمائش ءَ بہر زورگ ءِ دعوت ھم داتگ کہ ستمبر ءَ برجم دارگ بیت۔ بانی گروپ ءِ چیئرمین شیخ طارق صادق ءُ ایگزیکٹو باسک عمران منہاس ءُ وسیم چوہدری ءَ دوئیں ملک آنی نیام ءَ مھکمیں اقتصادی بندش ءُ گیشیں ھوار بوھگ ءِ ضلورت ءِ سر ءَ زور پر دات۔ سینئر نائب صدر عبدالرحمن صدیقی ءَ وتی منت واری درشان کت ءُ اسلام آباد ءَ ایران ءِ سفارتی مشن ءِ نیمگ ءَ وت مہ وتی تجارتی سیادی ءَ را دیمروئی دیگ ءِ کوشست آناں ساڑات۔ آئی ءَ اسرائیل ءِ گوستگیں زوراکی ءَ چہ آماچیں ایرانی شہید آنی کھول آنی گوما ھم دل ءِ جہلانکی ءَ یکوئی ءِ درشانی کتگ۔ گند ءُ نند دو نیمگی تجارت ءَ را ترند کنگ، سرمایہ کاری ءِ آسراتی ءُ دمگی اقتصادی یکوئی ءِ واستہ یکجائی ءَ کار کنگ ءِ یکجائی جزم ءِ گوما جوانیں رنگ ءَ آسر بوت۔