خصوصی کمکار ہارون اختر خان نا انجینئرنگ ڈویلپمنٹ بورڈ انا صدر دفترنا دورہ

اسلام آباد۔ 31 جولائی (اے پی پی) وزیراعظم نا خصوصی کمکار صنعت وپیدوار ہارون اخترخان پنچ شنبے نادے آ انجینئرنگ ڈیولپمنٹ بورڈ (ای ڈی بی) نا مرکزی دفتراسلام آباد نا دورہ ءِ کرے۔ داوخت آ سی ای او خدابخش خصوصی کمکار ءِ بخیرکرےو ادارہ نا چندی بشخ و آسراتی تیان معلومدار کرے۔ دورہ ٹی خصوصی کمکار بورڈ انا ماڑی ، انفراسٹرکچر ، ایمرجنسی ایگزٹس و رکھی ازباب آتا سرجمی اٹ معائنہ ءِ کرے۔ اوپارت کرے کہ ادارہ نا غٹ نظام پوسکن آ خواست آتون ہم گرنچ، پورو وڑاٹ آن لائن و ڈیجیٹل مریر تانکہ شفافیت و کارکڑد اٹی گچینی اتنگ مرے۔ خصوصی کمکار پارے کہ وزیراعظم شہباز شریف نا وژن اسہ شفاف، میرٹ آ تالان و گچین نظام نا جوڑ کننگ ءِ، ننے انجینئرنگ ڈویلپمنٹ بورڈ ءِ جہانی آب انا ادارہ جوڑ کننگ ءِ ہرا انجینئرنگ نا بشخ و برآمد آتیٹی اہم کڑد ادا کے۔ ہارون اختر خان پیدوار کرے کہ السی کہول آ ادارہ نا بابت گڑاس غلط تاثر ارے ہرافتے بیرہ میرٹ، شفافیت و نتیجہ خیز گام گیج آتا کمک اٹ بدل کننگ مریک۔ اوپارے کہ ادارہ تون تعلقدار غاوتا چٹفنگ کن اسہ پوسکن غاو پورٹل و اسہ واکدار غاوی کمیٹی اس جوڑ کننگک تانکہ شاری و اسٹیک ہولڈر آتا توار ءِ بِننگ مرے۔ خصوصی کمکار پارے کہ ای تینٹ انجینئرنگ ڈویلپمنٹ بورڈ انا کارکڑد آ پدریسہ نظر تخنگ اٹی اُٹ، ننے شون ہلوک ملک آتیانبار نتیجہ غاتیا تالان حکمت عملی اس تینا کروئی مریک ہراٹی شفاف عمل، زمواری و کمکاری اہم حیثیت تخک۔ اومستی پارے کہ چندی ادارہ و اسٹیک ہولڈر آتا نیام اٹ ہم گرنچی و اجتماعی کوشست آتا کمک اٹ نئے بیرہ ای ڈی بی ءِ اسہ جوان ءُ ادارہ اس جوڑ کننگ کینہ،  بلکن پاکستان نا انجینئرنگ صنعت ءِ ہم جہانی کہول آ نمان ہند اس ترفنگ کینہ۔