صدر مملکت آصف علی زرداری تون گھاناکن پندار سفیر نجیب درانی نا اوڑدہی

اسلام آباد۔ 31 جولائی (اے پی پی) صدر مملکت آصف علی زرداری پاکستان و گھانا نا دوستانہ تعلقداری تے تین پہ تینی فائدہ کن سوگو کننگ نا گرج آ زور شاغسا پارینے کہ ہڑتوم آ ملک آتا واپاری و زرگزرانی رابطہ غاتا مون آ دننگ نا گرج ءِ۔ ایوان صدر نا پریس ونگ آن جاری بیان نا رداٹ داخیال آتا درشانی ءِ صدر مملکت پنچ شنبے ناد ے آ گھانا کن پاکستان نا پندار سفیر نجیب درانی تون اوڑدہی ٹی کرے۔ اوڑدہی ٹی گپ وتران کرسا صدر مملکت آصف علی زرداری پارے کہ پاکستان و گھانا نا دوستانہ تعلقداری تے ہڑتوم آملک آتا تین پہ تینی مفاد کن پین سوگو کننگ و ہڑتوم آ کنڈآتا واپاری و زرگزرانی تعلقداری نا مون آ دننگ نا گرج ءِ۔ اوپارے کہ پاکستان کاروباری وارخواہی تیکن سازگار چاگڑد فراوان کیک۔ صدر مملکت پندار سفیر ءِ پارت کرے کہ او گھانا نا کمپنی تے پاکستان اٹ اسیجائی ڈٹ آتیٹی زرکاری کن اتے، پاکستان و گھانانا ادارہ جاتی تعلقداری بایدے پین سوگو مرے۔ اوپارے کہ گھانانا سفارت کار و انجینئر آتا پاکستان اٹ تربیت ستاکڑزک۔ آصف علی زرداری سفیر نجیب درانی ءِ پوسکن آ زمواری تے سنبھالنگ آ مبارکبادی تس و نیک است خواہی نا درشانی ءِ ہم کرے۔