بھارت سویلی ایشیا نا امن کن بھلو خطرہ اسے، نن پک کرین کہ نن بلااشتعال جارحیت نا پبی ورندی تننگ نا لائخی تخنہ، عطاء اللہ تارڑ

اسلام آباد۔ 31 جولائی (اے پی پی) بنجائی وزیر حوالکاری و شینکاری عطاء اللہ تارڑ پارینے کہ بھارت سویلی ایشیاء نا امن کن بھلو خطرہ اسے، بھارت پاکستان اٹی دہشت گرد آتا کاٹم خواجہی ءِ کننگ ءِ ، پہلگام واقعہ نا ننے آ بے بنداو دوبہ خلنگا، نن بے کنڈ ہلوک جاست وپاست نا سلہ خلکن تو بھارت اونا ورندی ءِ تننگ نا جاگہ غا جنگی چاگڑد اٹی ودکی کرے، بھارت دِیر ءِ سلہہ نا وڑاٹ کاریم اٹ اتنگ ءِ ، دِیر انا بقاء ءِ ، اوڑآ ہچ ءُ سمجھوتہ اس مفک، بیانیہ و سفارتی پڑ آ سرسہبی و امن نا ست خواہی تخنگ آن پد ہم نن پک کرین کہ نن بلااشتعال جارحیت نا پبی ورندی ءِ تخنگ نا لائخی تخنہ، معرکہ حق آن پد کشمیر نا ویل جہانی کہول آ دُوارہ زندہ مسنے، کشمیر نا ویل انا ایسری آن بیدس ڈیہہ اٹی پائیدار امن ممکن اف۔ داخیال آتا درشانی ءِ او پنچ شنبے نادے آ داڑے ہندی ہوٹل اٹی انسٹیٹیوٹ آف ریجنل اسٹڈیز(آئی آر ایس) نا کنڈآن سویلی ایشیا ٹی امن آ پالیسی ڈائیلاگ آن تران کرساکرے۔ بنجائی وزیر حوالکاری پارے کہ اینو نا دااہم نشست اٹی بشخ ہلنگ کنکن گمر نا سوب ءِ۔ دامکالمہ نا بست وبند آ انسٹیٹیوٹ آف ریجنل اسٹڈیز و بیکن ہاؤس سینٹر فار پالیسی اینڈ ریسرچ نا است انا حب اٹ منتوار اُٹ۔ اوپارے کہ ہراتسکان سویلی ایشیاٹی امن و سوگوی نا تعلق ءِ، پاکستان نا موقف مدام پیدوار، آخبتی و غیر مبہم مسنے۔ پاکستان اسہ پرامن ملک اسے و او مدام دا ڈیہہ اٹی سوگوی، مفاہمت و مکالمہ ءِ مون آ دننگ اٹ تینا کڑد ءِ ادا کرینے۔ اوپارے کہ دا ڈیہہ اٹی ہرابگاڑ ءِ ہم خننگ اُن او بھارت اٹی ودوک آ بنداو پرستی و انتہاپسندی تون براہ راست تناسب تخک۔ ہندو توا نظریہ ہراوڑ مقبولیت دوئی کرینے و ہراوڑاٹ اونا تشہیر کننگ انگ ءِ او دا ڈیہہ ءِ مون تروک غٹ آن بھلا خطرہ ءِ۔ اوپارے کہ پاکستان امن نا خواہندار ءِ و داپک ہم کرینے کہ اگہ پاکستان آ بلااشتعال و بلاجواز جنگ مسلط کننگاتو ننتون اونا گچین ورندی ءِ تننگ نا لائخی و کچ ساڑی ءِ۔ بنجائی وزیر پارے کہ پاکستان اٹی دہشت گردی نا واقعہ غاتیٹی پیشن نا فنڈنگ نا شاہدی ساڑی ءِ و بھارت داٹی بھلو حداسسکان اوار ءِ ہرا ننا صوبہ غاتیٹی بدامنی و امن و ایمنی نا حالیت ودی کننگ ءِ۔ بنجائی وزیرپارے کہ پاکستان تینٹ دہشت گردی نا گواچی مسنے، داجنگ اٹی پاکستان 90 ہزار آن زیات جون تے ندر کرینے، انت دنیا نا پین ملک اس ارے ہرا دہشت گردی نا برخلاف داخہ در بھلو قیمت اس ادا کروئے؟ اوپارے کہ نن تینا ڈغار آ دہشت گردی ءِ تورین ہرا ایلو دنیاکن خطرہ اس جوڑ مننگ کریکہ۔ ننا چناک، الس، پولیس ، فوج و ادارہ غاتا قربانی بیرہ پاکستان کن آخا بلکن دنیا نا سلامتی کن ءِ، اگہ پاکستان دا قربانی تے تتوکہ تو او دہشت گرد ہرادے نن تورین اینو دنیا نا بھلا شار تیٹی پیری کنگورہ۔ اوپارے کہ ہراتم پاکستان آ دا دوبہ ءِ خلنگاکہ پاکستان پہلگام واقعہ نا زموارءِ تو نن تینا موقف ءِ پیش کرین کہ اسہ ہندن ءُ ملک اس ہرا تینٹ اینو ہم ہندا دہشت گرد آتا دوتیان زہمی ءِ او امر داگام گیج آتا کاٹم خواجہی ءِ کننگ کیک؟ نن ہڑدے ئی بنداو آ داوڑنا واقعہ غاتون مو ن تننگ اُن۔ اوپارے کہ بھارت اٹی اسہ واقعہ اس پیش بس و او بے بنداو دوبہ خلنگ نا بناءِ کرے۔ اوپارے کہ ہراتم وزیراعظم محمد شہباز شریف پہلگام واقعہ نا بے کنڈ ہلوک جاست وپاست نا پیش کش کرے تو بھارت اونا ورندی ءِ تننگ نا جاگہ غا جنگی جنون و جنگی چاگڑد اٹی ودکی کرے۔ اوپارے کہ ننا سیوتی و سنگت ملک آک دا مچ آ تنکی ٹی ننتون سلیسر، ننے سفارتی پڑآ سرسہبی دوئی ئس، نن خنان کہ ننا بیانیہ نا بنداو آ بھارت اٹی سوج بش مس و دا سوج آک اینو ہم بش مننگ ءُ۔ اوپارے کہ نریندر مودی وخت اس ہم داخہ در نزور پوزیشن آ الوکہ اخس کہ او داسہ ءِ انتئے کہ بھارت نا سول سوسائٹی ، میڈیا، دانشور تپہ و اپوزیشن غٹ اونا پالیسی تیا سوج ہرفنگ ءُ کہ بیدس جاست وپاست آن بیرہ اسہ واقعہ سے نا بنداو آ او جارحیت نا کسر ءِ تینا کرے و پاکستان اٹی کودک شاری تے شست کرے۔ اوپارے کہ پہلگام واقعہ نا دمدستی پد ای صحافی تا اسہ گروپ اسے کشمیر نا علاقہ بیلانور شاہ غا دریٹ ہراڑے بھارتی میڈیا دعویٰ کریسس کہ دہشت گرد آتا کیمپ ءِ و نن اوفتے نشان تسن کہ ہموڑے زند ہڑدے ئی نا وڑاٹ برجاءِ۔ ننتون جہانی میڈیا نا سنگت آک ہم ئسر، ہرافک نشان تسر کہ او اسہ پرامن علاقہ اسے، دوبہ غاک ہمو ڈٹ انا بشخ ئسر کہ صحافی تے مرید کے و بہاولپور آدننگ آن توننگا تانکہ دا تاثر زائل مف کہ ہموڑے دہشت گردی نا کیمپ ارے و ہرادے ننے سفر کروئی ئس اوڑآن اسہ نن اس مست بھارت دا جلہو آتے کرے۔ بنجائی وزیرپارے کہ بیانیہ نا محاذ و سفارتی پڑآ سرسہبی و امن نا است خواہی تخنگ آن پد ہم نن داپک کرین کہ ننا امن نا است خواہی ءِ نزوری تکنگپ۔ اوپارے کہ بھارت ننا امن نا است خواہی ءِ نزوری تکا، ننا سلہہ بند فوج  و بہادر سپاہی تا کنڈآن ہراردعمل ءِ تننگا او بھارت ءِ ننا عسکری طاقت نا اندازہ کرفے کہ نن بلااشتعال جارحیت نا پبی ورندی ءِ تننگ نا لائخی تخنہ۔ اوپارے کہ پہلگام واقعہ غان مست دِیر ءِ بطور سلہہ کاریم اٹ اتنگ نا سوچ ئس۔ اوپارے کہ ہراتم اسٹ اس امن ءِ نسخان تننگ خوائسکہ تو او مدام جہانی معاہدہ ٹی نیام تمنگ نا سجفک۔ داامر ممکن ءِ کہ اسہ جہانی معاہدہ اسے اسہ کنڈی وڑاٹ ایلو فریق نا رضامندی آن بیدس معطل کننگے یا معطل تخنگے۔ اوپارے کہ بھارت نا ہندا سوچ ئس کہ دِیر ءِ سلہہ نا وڑاٹ کاریم اٹ اتنگے۔ بنجائی وزیر پارے کہ پاکستان سہی وخت آ قومی سلامتی کمیٹی نا دیوان ءِ بٹنگا و دا پیدوار کلہو تس کہ دِیر ننا بقاء ءِ، اوڑآ ہچ ءُ سمجھوتہ اس کپنہ، دِیر انابہاؤ ءِ توننگ یا متاثر کننگ نا ہر کوشست نا فیصلہ کن ورندی تننگک۔ داپیدوار و دوٹوک کلہو ئس، دا قدرتی وسیلہ ننا 24 کروڑ الس نا حق ءِ، اونا خلاف ورزی ءِ سگنگ پننگک۔ اوپارے کہ بھارت کیہی پڑتے ملا انتئے کہ دا’’مون آ بروک بھارت‘‘ نا دروغ انا عکس آ او تینٹ یقین کریسرو حقیقت دادے کہ دا عکس بے کچ نزور بنداوتیا سلوک ئس و ہراتم اودے کانودی، سفارتی ، عسکری و بیانیہ نا کہول آ ہُننگا تو دا پورو وڑاٹ بے سہب مس۔ اوپارے کہ جنگ آن پد انا منظرنامہ ءِ ہُننگے تو نن پانہ کہ نن امن خوانہ ولے داامن تین پہ تینی شرف و غٹ جھیڑہ بشمول کشمیر نا ایسری آ بایدے تالان مرے۔ بنجائی وزیر پارے کہ دا ڈیہہ اٹی امن کن پاکستان مدام تینا کڑد ءِ ادا کرے، پاکستان آخبت ہم تینا کڑد ءِ ادا کرسا کیک و دا ساڑی آ بے چیٹی دنیا ءِ داباور کرفینے کہ نن اسہ قوم اسے نا وڑاٹ نئے بیرہ بلااشتعال جارحیت نا ورندی ءِ تننگ کینہ بلکن سفارتی پڑ اٹی ہم ننتون تینا ہیت ءِ منفنگ نا لائخی و مہارت ساڑی ءِ۔