بنجائی وزیر پروفیسر احسن اقبال نا فورتھ آپٹیکل سیٹلائٹ نا سرسہب لانچنگ آ قوم ءِ مبارکباد

اسلام آباد۔ 31 جولائی (اے پی پی) بنجائی وزیر ڈٹ بندی، شونداری و اصلاحات و خصوصی گام گیج پروفیسر احسن اقبال فورتھ آپٹیکل ریموٹ سینسنگ سیٹلائٹ نا سرسہب لانچنگ آ مچ آقوم ءِ مبارکبادی ترسا پارینے کہ ای اہل وطن و مچ آ پاکستانی قوم ءِ است انا حب اٹ مبارکبادی تننگ خواوہ کہ اینو، الحمداللہ پاکستان نا فورتھ آپٹیکل سیٹلائٹ چین اٹی سرسہبی اٹ لانچ مس و بحفاظت تینا مدارآ سرمسنے، دا سرسہبی پاکستان نا خلائی پروگرام نا تاریخ اٹی اسہ پین مزل نا نشان اسے۔ اوپارے کہ ننا وژن ءِ کہ پاکستان ءِ دُوارہ اسپیس ٹیکنالوجی نا بشخ اٹی اسہ قائدانہ کڑد اس کروک آ ملک آتا صفت اٹی اوار کین، ان شاء اللہ ، بروک آ سال پاکستان نا اولیکو خلا باز چین نا کمک اٹ خلاٹی کاہک و خلائی اسٹیشن آ گام تخک، ننا ہدف ءِ کہ 2035 اسکان پاکستان نوک آ مشن ءِ سرسہبی اٹ پورو کے۔ بنجائی وزیر سیٹلائٹ مشن نا سرسہب پوروی آ سپارکو نا ٹیم، انجینئرز و سائنسدان تے ہم پبی خراج تحسین پیش کرے ہرافک دے و نن خواری اٹ داقومی مشن ءِ سرسہب کریر۔ پروفیسر احسن اقبال چین نا متکن آ کمکاری آ خصوصی منت واری ءِ ہرفسا پارے کہ نن تینا آہنی ایلم چین انا بے مٹ کمکاری آ است انا حب اٹ منت وار اُن، ہراہرگا م و ہربشخ اٹی پاکستان نا شونداری سفر اٹی ننتون ہم کوپہ سلوک ءِ۔