پاک امریکہ واپاری معاہدہ نا مسخت ہڑتوم آ کنڈآتا واپار نا مون آ دننگ، زرکاری ءِ اتنگ و واپاری کمکاری ءِ ودفنگ ءِ، وزارت خزانہ

اسلام آباد۔ 31 جولائی (اے پی پی) پاکستان وامریکہ نا نیام اٹ واپاری معاہدہ نا مسخت ہڑتوم آکنڈآتا واپار نا مون آ دننگ، اسہ ایلو نا منڈی تسکان رسینگ ءِ ودفنگ، زرکاری ءِ اتنگ و تین پہ تینی است خواہی نا بشخ آتیٹی کمکاری ءِ مون آ دننگ ءِ۔ وزارت خزانہ نا کنڈآن جاری بیان نا رداٹ داہیت انا درشانی ءِ وزیرخزانہ سینیٹر محمد اورنگزیب نا امریکی سیکرٹری کامرس(وزیر واپار) ہاورڈ لوٹنک و امریکی واپاری نمائندہ (یوایس ٹی آر) جیمیسن گریر تون اوڑدہی ٹی کننگا، ہندا اوڑدہی آن پد پاکستان و امریکہ نا نیام اٹ واپاری معاہدہ طے مننگ نا پڑو امریکی صدر ڈونلڈ ٹرمپ سوشل میڈیا غا تینا پوسٹ انا کمک اٹ کرے۔ وزارت خزانہ نا رداٹ اوڑدہی ٹی سیکرٹری کامرس جواد پال و امریکہ ٹی پاکستان نا سفیر رضوان سعید شیخ ئسک ہم ساڑی ئسر۔ دامعاہدہ ٹی تین پہ تینی ٹیرف خاص وڑاٹ امریکہ ٹی پاکستانی مصنوعات آ لگوک آ ٹیرف اٹی کمتی بریک، دامعاہدہ ہڑتوم آ ملک آتا نیام اٹ اہم اقتصادی بشخ خاص وڑاٹ توانائی، معدنیات، آئی ٹی، کرپٹو کرنسی و ایلوفتے ٹی اقتصادی کمکاری نا اسہ پوسکن ءُ دور اسے نا بنانا سوب جوڑ مریک۔ دامعاہدہ ریاست ہائے متحدہ تون پاکستان نا واپاری تعلقداری تے مون آ دننگ خاص کر دا تعلقداری تے امریکی ریاست آتسکان ودفنگ نا بابت برجاکوشست آتیٹی کمکار مریک۔ دانا رداٹ ہڑتوم آملک آتے اسہ ایلو نا منڈی تسکان گچین رسینگ دوئی مریک۔ داکان بیدس، دامعاہدہ غان پاکستان نا بنداوی پنجر و شونداری ڈٹ آتیٹی امریکی زرکاری ٹی ودکی گمانی ءِ۔ داواپاری معاہدہ ہڑتوم آملک آتا سرکڑدہ غاتا کنڈآن ہڑتوم آ کنڈآتا تعلقداری تے پین کڑمب کننگ و واپار و زرکاری رابطہ غاتے سوگو کننگ کن غٹ کوشست آتے کاریم اٹ اتنگ نا عزم انا پیدواری ءِ کیک۔