اسلام آباد۔ 22دسمبر (اے پی پی) پاکستان ہاؤسنگ اتھارٹی فاؤنڈیشن نا زہمیک قومی احتساب بیورو (نیب) انا چیئرمین آن وزارت ہاؤسنگ و پاکستان ہاؤسنگ اتھارٹی فاؤنڈیشن اٹی پاننگوک بے ضابطگی تا برخلاف جاست وپاست نا خواست ءِ کرسا پارینو کہ جی ٹین ٹو اٹی 9 سال تدینگ انگ نا باوجود فلیٹ آتا جوڑ جاڑی کاریم نیم گڈلو سلوک ءِ و داسہ چندی بہانہ غاتے اٹ ملازم و سرکاری خزانہ ءِ نسخان رسیفنگ نا کوشست کننگ انگ ءِ۔ جمعہ نا دے پاکستان ہاؤسنگ اتھارٹی فاؤنڈیشن نا زہمی تے کن اڈ تروک ایکشن کمیٹی نا کنڈآن جاری بیان اٹی پاننگانے کہ بنجائی وزیر ہاؤسنگ و تعمیرات اکرم درانی نومبر 2015ء ٹی ایوان بالا ٹی ہریفوک آ سوج آتا ورندی ءِ ترسا پاریسس کہ G-10/2انا جوڑجاڑی کاریم اٹی کرپشن نا انکوائری ءِ ایف آئی اے کننگ ءِ ولے اِراسال تدینگ انگ نا باوجود انکوائری رپورٹ مون آ بننگ کتنے۔ اوایوان بالا ءِ پاریسس کہ G-10/2 نا پروجیکٹ دسمبر 2015ء ٹی پورو مریک ولے اِرا سال تدینگ انگ نا باوجود دا پروجیکٹ پورو مننگ کتو۔ سرکاری ملازم آتا فلیٹ آتا ٹھیکہ 2008 ء ٹی ٹیکنو انٹرنیشنل پنی ءُ کمپنی اسے تننگا۔ مسہ جوڑ جاڑی کمپنیک غٹ آن کم 146.26ملین روپئی نا آفر تسوسر ولے ہمووخت انا وزیر ہاؤسنگ و تعمیرات مبینہ وڑاٹ کانود ءِ اسہ پلو تخسا دا کمپنی ءِ 197.68ملین روپئی ٹی ٹھیکہ ءِ تس ہراڑآن قومی خزانہ ءِ 48.42ملین نا نسخان مس۔ بیان نا رداٹ سرکاری ملازم آتون وعدہ کننگاسس کہ دافلیٹ جولائی 2010ء ٹی پورو مریک ولے 9 سال تدینگ انگ نا باوجود فلیٹ نیم گڈلو سلوک ءِ بلکن داسہ چندی بہانہ غاتے اٹ ملازم و سرکاری خزانہ ءِ چونا خلنگ نا کوشست کننگ انگ ءِ۔ سرکاری ملازم آتیان کم و ود 8 لکھ روپئی پین خواہنگ انگ ءِ و پاننگ انگ ءِ کہ داسہ جوڑجاڑی خڑچہ غاک ودانو۔ بیان نا رداٹ ہندا کمپنی ءِ پاکستان ہاؤسنگ اتھارٹی کری پروجیکٹ نا ٹھیکہ ءِ ہم تسوسس و ہموڑے ہم کرپشن نا غاوک مون آ بسنو، جاگہ اس ہم وخت آ کاریم مس و نئے دا فرم ءِ بلیک لسٹ کننگا۔ بیان نا رداٹ محتسب اعلیٰ 27جون 2014ء آ تینا وسیلہ غاتے ٹی سلسا پاکستان ہاؤسنگ اتھارٹی ءِ دا فلیٹ آتا جوڑ جاڑ پورو کننگ و وخت ءِ زیان کننگ آن بیدس الاٹی تے فلیٹ تننگ نا پرمان کریسس۔ بیان نا رداٹ ماسٹر پلان نا خلاف ورزی ءِ کرسا زیات فلیٹ جوڑجاڑ کننگ انگ ءِ ، ہراجاگہءِ چلڈرن پارک ظاہر کننگا سس ہموڑے ہم فلیٹ جوڑ کننگ انگ ءِ ۔ پارکنگ نا جاگہءِ ہلانو و نئے چناتے کن پارک جوڑ کننگانے۔

متعلقہ مضامینمصنف کی طرف سے مزید