اقتصادی رابطہ کمیٹی پنجاپ و سندھ حکومت آتے بالترتیب 15لکھ و 5لکھ ٹن خولم بشمول خولم مصنوعات آتا برآمد آتا منظوری ءِ تس
اسلام آباد۔ 22 دسمبر (اے پی پی) اقتصادی رابطہ کمیٹی (ای سی سی ) پنجاپ و سندھ انا حکومت آتے بالترتیب 15لکھ و 5لکھ ٹن خولم بشمول خولم نا مصنوعات آتا برآمد و پاک چین اقتصادی راہداری ڈٹ انا رداٹ نیشنل ہائی وے اتھارٹی نا بنداوی ڈھانچہ نا ڈٹ آتے کن جوڑجاڑی مواد آ درآمدی خراج وڈیوٹی تا استثنیٰ نا سلاہ نا منظوری ءِ تسنے۔ وزیراعظم شاہد خاقان عباسی نا کماشی ٹی اقتصادی رابطہ کمیٹی نا دیوان جمعہ نادے داڑے وزیراعظم ہاؤس اٹی اڈ ہلک۔ اقتصادی رابطہ کمیٹی نا دیوان اٹی پاک چین اقتصادی راہداری ڈٹ انا رداٹ نیشنل ہائی وے اتھارٹی نا بنداوی ڈھانچہ نا ڈٹ آتے کن جوڑ جاڑی مواد آ درآمدی خراج و ڈیوٹی تا استثنیٰ نا سلاہ نا منظوری ءِ تس۔ دا استثنیٰ پشاور آن کراچی اسکان موٹروے نا سکھر ملتان سیکشن نا جوڑ جاڑ آ لاگو مریک۔ اقتصادی رابطہ کمیٹی مالیاتی شمولیت و بنداوی ڈھانچہ نا ڈٹ انا نفاذ نا بابت اسٹیٹ بینک آف پاکستان ءِ فنڈ جاری کننگ کن حکومت پاکستان نا ری لینڈنگ پالیسی آن استثنیٰ تننگ نا ہم منظوری ءِ تس۔ اقتصادی رابطہ کمیٹی وزارت قومی غذائی رکھ و پٹ وپول نا کنڈآن پنجاپ و سندھ انا حکومت آتے بالترتیب 1.5و0.5ملین ٹن خولم بشمول خولم نا مصنوعات آتا برآمد نا سلاہ نا ہم منظوری ءِ تس۔ خولم و خولم نا مصنوعات آتا برآمد آتا عمل 30جون 2018ء اسکان پورو کننگک۔ اقتصادی رابطہ کمیٹی سرکاری بشخ انا یونیورسٹی تے انکم خراج آرڈینس مجریہ 2001ء نا سیکشن 113آن استثنیٰ تننگ نا سلاہ نا ہم منظوری ءِ تسنے۔ دیوان اٹی فیڈرل بورڈ آف ریونیو نا کنڈآن گڑاس گڑاتیا گڑاس انضباطی ڈیوٹی تیٹی کمتی نا منظوری ءِ تننگا۔ ہنداوڑ دیوان اٹی حکومت پاکستان تون خصوصی معاہدہ کروک آ کمپنی تیا انکم خراج آرڈیننس 2001 ء نا سیکشن 5Aنا نفاذ آن استثنیٰ نا سلاہ نا منظوری ءِ تننگانے۔ دیوان اٹی ٹینڈر نا عمل نا کمک اٹ شوگر مل آتون ودکی بورہ نا اسٹاک آن 0.3ملین میٹرک ٹن بورہ نا ہلنگ و گڑاس ازاں دافتے جہانی ٹینڈر نا کمک اٹ برآمد کننگ نا سلاہ نا ہم منظوری ءِ تننگا۔ دافیصلہ غان شوگر مل آتے گنڈیری نا کشارگر آتون تخوک آ نرخ آتیا گنڈیری نا ہلنگ و اوفتے بروخت ادائیگی ٹی آسراتی رسینگک۔ اقتصادی رابطہ کمیٹی خیبر پختونخوا و حکومت پنجاپ نا بجلی نا خالص فائدہ غاتا سلوک آ پیسہ غاتا ادائیگی کن واپڈا ءِ حکومت پاکستان نا وت واجہ ضمانت نا رداٹ بینک آتیان مالی امداد ہلنگ نا موکل ہم تسنے۔
