مھکمیں دیمروئی ھد ءُُ ابیل آنی سرءَ ترندی ءَ کار ءِ واستہ چیلنجز ءُُ موہ آنی سر ءَ ھیال ریچی کنگ بوت
اسلام آباد ۔ 21 دسمبر (اے پی پی)مزن وزیر شاہد خاقان عباسی ءَ گوں اقوام متحدہ اقتصادی ءُُ چاگردی کمیشن برائے ایشیا ءُُ بحرالکاہل ءِ انڈر سیکرٹری جنرل ڈاکٹر شمشاد اختر ءَ پنچ شمبے ءِ روچ ءَ ادا گند ءُُ نند کت۔ مزن وزیر ءَ باسکیں ملک آنی نیام ءَ مھکمیں نمبگ ءُُ اقتصادی کمک آنی دیمروئی ءِ ھاترا کمیشن ءِ مول ءُُ مراد آنی ودینگ ءَ ڈاکٹر شمشاد اختر ءِ کرد ءَ را ساڑات۔ مزن وزیر ءَ آسر کشیں منصوبگ، تکنیکی کمک ءِ گوما بزگری ءِ تہ ءَ کمی، تجارت، سرمایہ کاری، انفارمیشن اینڈ کمیونیکیشن، چاگردی دیمروئی ءُُ بلا ءُُ آپت آنی بیم ءُُ ترس آناں کم کنگ ءَ باسکیں ملک آنی کار رپک ءَ را گیش ودینگ ءِ سبب ءَ پڑ ءِ جیڈھ ءُُ چیلنج آنی گر ءُُ دار ءِ ھوالگ ءَ اقوام متحدہ اقتصادی ءُُ چاگردی کمیشن برائے ایشیاءُُ بحرالکاہل ءِ لائک ءِ شرپ ءُُ ازمت آنی ھم توسیپ ءُُ ساڑا کت۔ گند ءُُ نند ءَ مھکمیں دیمروئی ءِ ھد ءُُ ابیل آنی سر ءَ ترندی ءَ کار ءِ واستہ چیلنج ءُُ موہ آنی سر ءَ گپ ءُُ تران بوت۔ ڈاکٹر شمشاد اختر ءَ کامسیٹس ءِ کرد ءَ را ساڑات ایشی ءِ گوما چیر دستیں کمیشن ءَ مھکمیں چاگردی ءُُ اقتصادی دیمروئی ءِ ھاترا سائنس، ٹیکنالوجی ءُُ زرمبشیں گامگیج ءِ ھوالگ ءَ یک تپاکی منگ نامہ ءِ سر ءَ دست چنگل کتگ ۔ آئی ءَ مزن وزیر ءَ را چیر دستیں گامگیج ءُُ زالبول ءُُ کاروباری چست ءُُ ایر آنی دیمروئی ءِ واستہ وزارت سائنس ءُُ ٹیکنالوجی ءَ را پُجارین ءِ واستہ کمک ءِ باروا ھم سرپدی دات۔
