فیصل آباد ۔ 20 دسمبر (اے پی پی)مزن وزیر شاہد خاقان عباسی ءَ گوشت کہ دیمروئی ءِ واستہ جمہوری نظام ءَ را گہتر آپشن نامینان ءَ گوشت کہ استیں حکومت وتی حکومتی وھد ءُُ پاس آنی تہ ءَ سرجم کنت، گچین کاری وتی گیشینتگیں وھد ءُُ پاس آنی تہءَ بنت ءُُ پیسلہ اُلس کنت، بازیں شوبگ آنی تہءَ در ملکی سرمایہ کاری حکومت ءِ جوانیں پالیشی ءِ سرءَ دل یکیمی اِنت، حکومت سرمایہ کار آناں ھمک آسراتی پپُجارینگ ءَ انت، حکومت ءِ جوانیں پالیشی ءِ آسر دیم ءَ پیداک اَنت۔ آئی ءَ اے گپ ادا ہنڈائی کار پلانٹ ءِ بن ھشتی مراگش ءَ تران کنان ءَ کت۔ اے موہ ءِ سرءَ وزیر ءِ تجارت پرویز ملک، وزیر ءِ مملکت عابد شیر علی، طلال چوہدری، پارلیمانی باسک، شرپ مندیں صنعت کار ءُُ کاروباری مردم اے موہ ءَ ساڑی اتنت۔ مزن وزیر ءَ بھر زرتگیں مردم آناں وش اتک ءُُ گوشت کہ حکومت ءِ جوانیں پالیشی آنی آسر دیم ءَ دپیداک انت، ہنڈائی ءُُ نشاط گروپ ءِ سرمایہ کار ایشی ءِ شگر ءُُ منت وار آں، اے حکومت ءِ سرمایہ کار دوستیں پالیشی آنی سر ءَ دل یکیمی ءِ آدینک اَنت، حکومت ءِ جوانیں پالیشی آنی رچ ءِ نتیجگ ءَ اے پڑ جوانی ءَ دیمروئی کنگ ءَ اِنت۔ آئی ءَ گوشت کہ پاکستان ءَ نجکاری ءِ پالیشی کامیات بوتگ، حکومت ءِ کار کاروبار کنگ نہ اِنت، اے ھاترا پیسریگیں مزن وزیر نواز شریف ءَ ملک ءَ نجکاری ءِ کار بندات کت، مرچی ھر کس ایشی ءِ گپ ءَ جنت۔ آئی ءَ گوشت کہ گوستگیں زمانگ ءَ سیاسی جاور آنی نہ گیگی ءِ سبب ءَ جیڈھ دیم ءَ پیداک اَنت بلے پالیشی ءِ برجائی ءُُ رِ چ ءِ نتیجگ ءَ کامیاتی رسگ ءَ اِنت ءُُ بازیں شوبگ آنی تہءَ در ملکی سرکایہ کاری بوھگ ءَ اِنت، اے آ راستیں پاکستان اِنت کہ آھودا سرمایہ کاری بوھگ ءَ اِنت ءُُ ھندی ءُُ درملکی سرمایہ کار حکومتی پالیشی ءِ سرءَ دل یکیمی ءِ درشان کنگ ءَ اَنت۔ آئی ءَ گوشت کہ دیم ءَ جزگ ءِ واستہ جمہوری نظام گہتریں آپشن اِنت، حکومت وتی وھد ءُُ پاس ءَ سرجم کنت، گچین کاری آیوکیں سال ءَ وتی گیشینتگیں وھد ءَ بنت ءُُ الس پیسلہ کنت۔ مزن وزیر ءَ اُمیت سہرا کت کہ ہنڈائی ءِ سرمایہ کاری ھندی شوبگ آنی دیمروئی ءِ واستہ سک باز نپ ءُُ سیت مند سہرا بیت، حکومت سرمایہ کارآناں ھمک آسراتی پُجارینگ ءَ اِنت۔ آئی ءَ گوشت کہ استیں حکومت ءَ توان ءُُ گیس ءِ لوڈ شیڈنگ ءِ کمیگ ءَ را گر ءُُ دار کتگ، مرچی جوانیں پالیشی آنی سبب ءَ ملک ءَ سستائیں توان رسگ ءَ اِنت، ایشی ءَ ابید ملک ءَ گیس ٹرمینل ھم جنگ بوھگ ءَ انت ءُُ موٹرویز جوڑ بوھگ ءَ اِنت، استیں حکومت وھد ءِ سروکی ءَ اتکگ گڈا ملک ءَ 580کلومیٹر دراج بُریں موٹر ویز بوتگ ءُُ مرچی 1800کلومیڑءَ چہ گیش موٹر ویز جوڑ بوتگ اَنت یا سرجمی ءِ سیم سر ءَ اَنت۔
